Dikarang Rengenyan Labang//
BEJADI: Dr. Hilmi mangkung tawak kelai bejadi Pengerami Konvokesyen 2016 ILKKM Zon Sarawak seraya diperatika Ellam (kanan) enggau Dr. Sim (tengah).
KOTA SAMARAHAN: Bisi 928 iku graduet ari Institusyen Latih Opis Menteri Pengerai Malaysia (ILKKM) Zon Sarawak nerima Setipikit, Diploma enggau Diploma Lanjutan ba Majlis Konvokesyen 2016 ILKKM Zon Sarawak apin lama udah.
Ba konvokesyen nya mega bisi 109 iku graduet Kursus Dalam Perkhidmatan ungkup Peningkatan Secara Latihan (PSL), iya nya ari nyadi Indu Misi Raban Bansa ngagai Indu Misi.
Sida ke graduet nya belajar sereta belatih ba empat kolej Opis Menteri Pengerai Malaysia (KKM) nyengkaum Kolej Sains Kesihatan Bersekutu (KSKB) Kuching; Kolej Kesihatan (KK) Sibu; Kolej Kesihatan Awam (KKA) Kuching enggau Kolej Jururawat Masyarakat (KJM) Serian.
Paing Jawi, 23, asal ari Lubok Kachong, Engkilili seiku ari raban graduet ti nerima Gelar Pencapaian Graduan Cemerlang beserimbai enggau konvokesyen nya.
Iya ke ngambi Diploma Kejururawatan ba KSKB udah tu deka gawa ba Sepital Kuala Lumpur, ngasaika kus ti diambi iya nya ukai nyadi penanggul lelaki nyadi derisa.
“Agi baru suba aku endang bisi asai enda ulih nerima diri nyereta kus tu tang pengudah meda bala sida ke tuai agi ti lelaki nyadi derisa, diatu aku udah ulih nerima, lalu ba aku taja pan lelaki nadai penanggul nyadi derisa.
“Aku temegah ati ngagai diri empu sereta beterima kasih ngagai apai indai laban asil ari pengawa bekebun bumai seduai ulih nyengulaka aku nyentukka aku nyulut sehari tu,” ku iya seraya madahka apai indai iya bumai enggau bekebun lada.
Patricia Jalley James Dana, 28, ngambi Diploma Kejururawatan (KPSL) seiku ari graduet ti nerima Gelar Pencapaian Graduan Cemerlang maya konvokesyen 2016 ILKKM kemari.
Indai ti bisi seiku anak nya, sebedau ke nampung pelajar renggat diploma udah gawa nyadi Misi Raban Bansa ba Sepital Sibu pengelama tiga taun.
Pengudah tembu belajar renggat Diploma tu tadi iya ke asal ari Nanga Tada, Kanowit dianjung gawa ba Klinik 1Malaysia, Teku, Sibu.
“Aku endang ari mit ngembuan juluk deka nyadi indu misi, kebuah pia laban deka mantu nyumanka orang ti sakit,” ku iya ti mega nerima Gelar ke sama maya ngambi renggat setipikit suba.
Kelimpah ari nya Halina Hasbi,26, ke ngambi Diploma Lanjutan Kebidanan ti udah bepeneleba gawa empat taun ba Klinik Pengerai Indai enggau Anak (KKIA) Kidurong, Bintulu madahka diri terus gawa ba KKIA nya pengudah graduet Diploma Lanjutan nya.
Lebuh dipinta bekunsi peneleba iya madah, dalam bidang nyadi bidan iya betapi enggau pemar tang nya ukai nyadika kebuah iya enda gawa ngeraika mensia mayuh.
“Pemar ke ditapi aku iya nya lebuh deka minta pesakit nitihka ajar tauka jaku lalau baka ngajung anak berubat nitihka maya ti ditimpuh ngambika dituchuk nitihka vaksin ke udah ditetapka.
“Laban sida enda nemu pasal pemesai guna vaksin nya ba anak, dia aku ngasaika betapi enggau pemar deka meri penerang ngagai sida sereta minta sida datai nitihka timpuh ti udah ditetapka,” ku Halina ke mega nerima Gelar Pencapaian Graduan Cemerlang.
Konvokesyen ti berambaika rambai jaku ‘Kelestarian Ilmu dan Kemahiran Insaniah Teras Keunggulan Peribadi’ udah mujur dipenyadi Sapit Menteri Pengerai Malaysia Datuk Seri Dr. Hilmi Yahaya, ke lalu nyuaka skrol ngagai raban graduet.
Sama bisi datai ngagai pengerami nya Sekretari Bagi Menua, Bagi Ngatur Latih KKM Ellam Endin Nom; Direktor Opis Pengerai Nengeri Sarawak Dr. Jamilah Hashim, Menteri Kunsil Kandang Menua Datuk Prof. Dr. Sim Kui Hian, apai indai enggau ke bukai.