KENANG KITAI: Ugak (tujuh ari kiba) begambar begulai enggau ketuai komuniti ke bukai sepenembu bejadi pengawa nasih jalai.
KAPIT: Kaban Parlimen P216, Datuk Wilson Ugak Kumbong muji semua peranak ba kandang menua Baleh laban udah nyukung pengawa ngaga pemansang kelebih agi ba pengawa ngaga jalai alun nuju Tekat Baleh tu ila.
Iya mansutka jaku tu lebuh bejadi pengawa nasih Jalai Fasa 2-4 ke nuju ngagai Tekat Baleh ba Nanga Sepulau , Baleh apin lama tu tadi.
Ku iya, nyadi seiku pengari rayat nadai pekara bukai ti patut dikemeratka dulu dipinta enti ukai jalai alun awakka peranak menua pesisir sama ngasaika pengelantang enggau pemaik ari asil pemansang tu.
“Ketegal kita ke ketuai nyukung pemansang ba menua tu, reti nya kita udah mai penyenang ngagai sida ke nembiak jemah ila. Sida ulih ngundang kita begunaka kerita dalam timpuh pejalai ti pandak. Bala anak ari Kuching, Bintulu, Miri, Sibu enda besekut, enda berebut enggau orang nangika diri enda ampit tiket ekspres maya mulaika diri ke menua ngundang kita lebuh ngintu pengerami besai baka Hari Gawai enggau Taun Baru,”
“Enti bisi kerejasama ke manah, jalai tu endang jampat tembu , jampat agi nengah iya ila. Nya alai anang papaska perintah nguna tanah kita dikena perintah ngaga jalai alun.
“Kelimpah ari nya, enti Jalai Kapit/Song enggau jalai ari Nanga Mujong terus ngagai Tekat Putai tembu kitai ulih meda ubah pemansang. Bala pedagang deka datai beranakka puku di menua kitai ditu lalu pia mega enggau utai ti dijual kitai, agi baru magang,” ku iya.
Jalai Pakej B Fasa 2,3 enggau 4 ari Nanga Gaat ngagai Nanga Merirai, Baleh ke semanjai 14.44 kilometer begunaka ungkup belanja 246 milion nyengkaum GST udah dibayar.
Ugak ngelalau bala kunteriktor ke bulih tinda ngaga jalai alun tu patut ngelebihka peranak menua pesisir gawa ba kompeni sida.
“Bala kunteriktor patut ngelebihka peranak menua ditu empu ari ti ngambi orang ari menua bukai gawa ba kompeni kita. Pia mega, kita ke gawa, titihka mih atur ti udah ditetap kompeni. Bedisiplin mih. Enti kompeni enda ngasuh kita pulai, kita anang pulai, anang ngelaban,”
“Taja kitai ba menua pesisir udah jauh ditinggalka pemansang dunya, kitai anang enda ngubah pikir enggau runding nuju pemansang. Tu mih jalai ke dimimpika kitai ngelama tu,”ku iya
Jalai ari Nanga Mujong nyentuk ke Tekat Baleh tu ila disadang tembu dalam kandang 3 taun ke deka datai. Tekat Baleh ti begunaka ungkus sepenyampau urung RM10 juta dikearap ulih maik asil ke manah sereta nyungkak penatai pemisi peranak menua tu dudi hari ila.
Kelimpah ari nya, beduduk enggau Pengawa Bepilih Besai ti deka diatur tu ila, Ugak ngelalau rayat ba sitak iya sama ngundi ngambika mayuh agi pemansang di menua tu ulih digaga enti BN.
“ Aku ngarapka kita ulih meri sukung ke sama, undi ke sebaka ba pengawa bepilih besai ke udah maya aku bediri suba. Bajet 2017, dipelaba bajet ke penudi sebedau pengawa bepilih besai dipejalai. Aku minta undi penuh ari kita di Hulu Rajang tu,”ku iya
Sama bisi datai, Sekretari Politik Kepala Menteri, Nicholas Kudi Jantai, Menijar Opis Pelilih Tengah Tengah JKR, John Aten, Menijar Pekerjaan Piasau Kunteriktor Sdn Bhd, Stephen Kong, Pemesai Opis Pelilih Bukit Mabong, Douglas Pungga,Kunsil Calvin Ligong, Pemancha David Dian, Pengulu Salang Batang, Penghulu Jampi Rawing, Penghulu Steward Sawing enggau ke bukai.