MIRI: Parti Tindakan Demokratik (DAP) madah, Parti Sa’ati Rakyat Sarawak (SUPP) ukai enggau ati ti lurus minta ampun ngagai rayat nengeri tu.
Sekretari Parti Tindakan Demokratik (DAP) Sarawak, Alan Ling Sie Kiong madah, minta ampu atas pengilap ke besai enda ulih ngubah utai ti udah nyadi ngagai Sarawak diatu.
Nadai ngereja pengawa dikena nampal pengilap nya sereta minta ampun aja semina agenda politik SUPP dikena ngulihka perati rayat.
“Minta ampun ukai penawar. Tu respon aku ngagai pengawa minta ampun nya. Hipokrit politik!, ‘ ku iya lebuh ngenang pasal pengawa parti nya ti minta ampun.
Ensanus, SUPP minta ampun ngagai semua rayat Sarawak ketegal ketuai parti nya enda mantah perambu ngubah Perkara 1 (12) Konstitusyen Perintah Besai ti udah ngingkaska status Sarawak nyadi sebuah menua ngagai nengeri dalam Malaysia.
Sekretari Besai SUPP Datuk Sebastian Ting, ba penerang berita nya madah, maya ubah nya dipejuraika di Dewan Rakyat kena 12 enggau 13 Julai 1976, iya ngaku nadai siku pan ari tujuh iku ketuai SUPP di Dewan Rakyat maya nya mantah perambu ngubah Perkara 1(12) Konstitusyen Perintah Besai nya.
Ku Alan, enti SUPPamat enggau ati ti lurus minta ampun ngagai rayat Sarawak, SUPP patut dulu ngaku sereta minta ampu laban udah nyaruka rayat Sarawak nengah propaganda politik ti berat sepiak.
Kelimpah ari nya, kimpin SUPP madahka DAP nya parti Semenanjung Malaysia dianggap nyadi retorik dikena ngulihka sukung rayat.
Nya mega dianggap nyadi propaganda parti Barisan Nasional (BN) menua tu dikena nampal penyalah sida ti nyadi perintah kenyau ari Malaysia ditumbuh sekalika ba renggat nengeri enggau perintah bedai.
“DAP parti menua tu ti negika hak semua rayat Malaysia enda ngira bansa, jalai pengarap enggau kandang endur, ‘ ku iya,
Ku iya nambah, semuaketuai dalam DAP Sarawak endang rayat Sarawak lalu sida mega komited ngenanka hak rayat di nengeri tu.