KAPIT: Kaban Kunsil Nengeri sitak Bukit Goram, Jefferson Jamit Unyat madah, dagang homestay bisi potensial maju di Kapit enti dipejalaika enggau teatur sereta manah.
Ku iya tetiap maya Kapit bisi ngintu pengerami besai, hotel ke bisi di Kapit enda chukup belama endur mensia mayuh bemalam kenyau ari suba nyentuk ke diatu.
Iya bejaku munyi tu lebuh bejadika Program Latih Bejalaika Homestay ke diatur ba Hotel Meligai ditu.
Iya muji program ke diatur Balai Dagang enggau Industri Dayak ke meri penguntung enggau asil ke manah ngagai orang kti nyereta program tu lalu iya ngarapka sida tu tadi ulih ngaga rumah panjai sida iya nyadi homestay.
“Tetiap maya bisi pengerami, kitai di Kapit ditu suah enda chukup bilik hotel nampung pemayuh bala mensia mayuh ke datai kitu. Aku beratika kitai ditu bisi potensial endur ngemajuka dagang homestay enti dipejalaika enggau manah.
“Enti deka numbuhka homestay, keterubah kitai enda tau enda bisi akses sereta meri servis ke manah. Homestay patut bisi bekal ai beresi, karan, disempulang ngena main enggau adat asal, pemakai rumah panjai sereta pengelandik bejaku enggau bala temuai ke datai,” ku iya.
Program homestay tu mega ulih nulung ngangkatka agi tikas ekonomi menua pesisir, pelajar enggau ngajar peranak menua pesisir nyadi orang ke bepenemu ti tau ngubah pengidup sida.
“Kapit ngembuan pemisi ti narit ati temuai datai kitu baka rampa menua ke agi beresi, ai sungai enggau angin ti beresi, kraftjari, rumah panjai, adat enggaumain asal. Pia mega enggau Lumba Bot Laju ti diatur ninting taun ke nyadi seiti pematak temuai datai ari menua bukai.
Aku ngarapka bala ti nyereta program tu nguna penemu ti diulih sida ari bala modulator enggau fasilator. Sida ngembuan peneleba ba pengawa tu. Homestay ulih penguntung ke besai,” ku iya.
Sama bisi datai, Sekretari Eksekutif DCCI, Terrence Temenggong Jayang, Menijar DCCI Unit Pemansang, Mabel Salin, Fasilator, Florince Christy enggau ke bukai.