Tu deka terus dipejalai perintah nengah mayuh aktiviti ke meri penemu
NARIT ATI: Len tekait ati meda senyata ke bisi dipandang raban Soldadu Darat Malaysia ke bela bisi dibuka rambau pengawa bejadika MYTV di Belawai, kemari.
BELAWAI: Agenda Program Ngatur Transformasyen Vokasional Belia (MYTV) deka terus dipejalai di nengeri tu dikena mantu raban nembiak ti diau di menua pesisir enggau ulu Sarawak bela ngasaika pangka pemansang menua.
Menteri Muda ba Opis Kepala Menteri (Pemansang Pengereja Pengawa enggau Latih) ke mega Menteri Muda Rampa Menua, Datu Len Talif Salleh madah, program tu deka terus dipejalai di serata Sarawak sereta ditambahka agi penemu ke beguna kelimpah ngaul mayuh ejensi.
“Batang tuju ngatur porgram MYTV tu dikena ngerembaika awak ngagai raban nembiak ke tinggal sereta nadai penatai pemisi tetap di kandang menua ulu Sarawak ngambika sida bela ulih ngaul diri dalam bidang industri, berapi enggau pemajik gamal.
“Nengah program tu raban nembiak di menua ulu Sarawak udah dilatih dalam mayuh bengkah latih pengelandik iya nya Tukang Kayu, Nusun Bata, Nyambung Paip, Nyambung Tali Karan, Welding, Berapi, Pemajik Gamal enggau Nguntin Buk.
“Bala sida tu datai ari raban nembiak ke dipilih ari raban ti nadai pengawa tetap, seranta sereta tinggal dalam pelajar sekula,” ku Len.
Iya mansutka jaku tu rambau pengawa Bejadi Program MYTV di Belawai, kemari.
Pengawa tu udah diatur bepalan ba Rumah Rehat Opis Pelilih Belawai lalu nyadi siri program Strategi Tasik Gadung Nasional (NBOS) Transformasi Menua Pesisir (RTP) kelima ti dipejalaika di Sarawak kenyau ari bulan Oktober 2015.
Nyentuk diatu bisi lima siri MYTV udah dipejalai enggau penyampau pesereta nembiak sepenyampau 539 iku.
Program ke diatu dipejalai ba Kampung Belawai, Sarikei ti ngaul 128 iku raban nembiak ari tumpuk pendiau Belawai, Jerijeh, Serdeng, Stalun, Stokan enggau Paloh.
Nitih ku Len, dalam program tu sida ti dipilih ari raban nembiak ke nadai pengawa tetap, seranta sereta tinggal pelajar sekula.
“Perintah Sarawak udah ngaku program tu nyadi sebagi ari program pemansang orang gawa di menua pesisir ti ngemai pangka tinggi seriris enggau pengawa dipejalaika perintah nyungkak penatai pemisi rayat seranta di menua pesisir.
“Tu nyengkaum nyikap raban nembiak enggau pengelantik teknikal enggau vokasional ti engkeman nentuka sida ulih nyereta diri ba sektor-sektor ekonomi ke mansang di Sarawak.
“Pia mega sida bisi penatai pemisi ke tetap ke lalu nyadi penatai pemisi ngagai ruang bilik sida, raban nembiak tu mega mantu mansutka ekonomi menua kelebih agi di kandang menua ulu Sarawak iya nya Belaga, Nyalau, Dalat, Baram, Belawai enggau Lawas,” ku iya nandu.
Dalam program dipejalai ba Belawai tu, bisi 128 iku nembiak ari 10 bengkah tumpuk pendiau di Belawai enggau Matu Daro udah diberi latih dalam mayuh macham bidang baka tukang kayu, penerapan bata, kereja paip, nyambung tali karan, kulinari, pemajik gamal enggau dan reka ngelagu buk nengah program MYTV.
Kenyau ari Oktober 2015, MYTV udah dipejalai ba Pengentap Pendiau Baru Bansa Penan, Tegulang, Murum dalam bulan Oktober 15 enggau pesereta sepenyampau 60 iku, Kuala Nyalau, Bintulu dalam bulan November 2015 (121 iku pesereta), Kampung Tanam, Dalat dalam bulan Febuari enggau Mac 2016 (103 iku pesereta) sereta di Baram Central Base Camp ti udah ngaul 127 iku raban nembiak bansa Kayan, Kenyah, Penan, Iban enggau Lun Bawang.
Nyentuk diatu, bisi 20 iku nembiak bansa Penan ke udah nembuka latih dalam program tu diatu benung ngambi latih teknikal ba Kolej Centex, Santubong.
Manakala 23 orang peserta dari Dalat dan Baram sedang mengikuti latihan di Akademi Binaan Malaysia.
Ba lansa ke sama, bisi 22 iku nembiak ari Murum enggau Nyalau deka nampung latih teknikal ba Kolej Centex enggau Opis Orang Indu Sarawak.
Berindik ari nya, seiku pesereta program udah bulih pengawa ba Opis Orang Indu Sarawak.
Genap program ke dipejalai, bala pesereta program ngaul diri dalam projek ngemanahka penyikap perengka guna raban bansa.
Dataika sehari tu, bisi lima projek udah dipejalai iya nya ngemanahka tikas sekula tadika di Murum, ngemanahka balai rayat di Kg. Kuala Nyalau, Bintulu enggau Kampung Tanam, Dalat.
Lalu di Baram, bala pesereta MYTV udah ngemanahka begunan pasar tamu.
Di Belawai, bala pesereta ngemanahka balai mayuh guna ungkup aklitiviti raban nembiak.
Pematih program tu datai ari raban Soldadu Darat Malaysia, Akademi Binaan Malaysia, Kolej Komuniti, Opis Orang Indu Sarawak enggau GIATMARA.
Kelimpah ari nya, Lembaga Pembangunan Industri Pembinaan mega udah ngeluarka Green Card ngagai bala pesereta Latih Pengawa Berumah.
Unit Strategik Kebangsaan Perbendaharaan Malaysia piak ti ngeluarka belanja bejalaika program tu dalam Konteks NBOS.
Soldadu Darat Malaysia nyadi peneraju latih pemun teknikal & vokasional enggau kerejasama Opis Pemansang Industri Pembinaan Malaysia (CIDB)/Akademi Binaan Malaysia (ABM), Kolej Komuniti, GIATMARA enggau Opis Orang Indu enggau Ruang Bilik Sarawak.
Lalu Unit Pelaksanaan Pemantauan Sarawak tauka Sarawak Implementation and Monitoring Unit (SIMU) sereta Unit Pemansang Orang Gawa (UPTK) ari Opis Kepala Menteri Sarawak nyadi penyelaras utama ba program tu.
Pia mega, Markas Pemerintahan Medan Timur Soldadu Darat nyadi Kaban Strategik ngagai Perintah Sarawak dalam merambu sereta matau program seraya Markas 1 Divisyen nyadi piak ti bejalaika program tu.
Berebak enggau nya, sektor-sektor korporat baka Perbadanan Kemajuan Industri Perkayuan Sarawak (PUSAKA), Samling, PETRONAS, Regional Corridor Development Authority (RECODA) enggau Sarawak Energy Berhad (SEB) bela meri sukung tegap ngagai program tu ari pekara Tanggungpengawa Rama Korporat (CSR).
Dalam program ba Belawai tu, PUSAKA enggau Petronas udah nyedia perengka berumah ungkup prejek ngemanahka begunan aktiviti raban nembiak, sereta nyediaka endur diau enggau pemakai ngagai bala pesereta enggau pematih sereta mensia mayuh dalam kandang dua minggu program tu dipejalai.
Kerejasama semua piak ke ngaul diri enggau sukung tegap ari Perintah Sarawak nengah Sekretari Perintah Nengeri Sarawak dalam bejalaika program MYTV udah meri pangka ngagai bala pesereta program enggau komuniti bukai dalam konteks meri pengelantang ba pengidup bala rayat kelebih agi di kandang menua pesisir.
Taun tu bisi sebengkah da agi program MYTV deka dipejalai ba Lawas, Sarawak dalam bulan November 2016. Lalu dalam taun 2017, bisi lima program da agi deka dipelajai di serata Sarawak.
Sama bisi datai Sapit Panglima Soldadu Darat, Leftenan Jeneral Dato’ Seri Panglima Haji Ahmad Hasbullah Haji Mohd Nawawi enggau Panglima 1 Divisyen Infantri, Mejar Jeneral Datuk Stephen Mundaw.