Mayuh pemar deka ditapi nyadi pengari rayat

0

Nya alai ukai semina nengah pengari rayat aja jalai dikena gawa sereta mantu rayat: Masing

TERUS BESERAKUP: Masing enggau bala kaban PRS ke bukai melah kek kelai ngintu PRS genap 12 taun.

TERUS BESERAKUP: Masing enggau bala kaban PRS ke bukai melah kek kelai ngintu PRS genap 12 taun.

BINTULU: Sapit Kepala Menteri ke mega Presiden Parti Rakyat Sarawak (PRS) Tan Sri Datuk Amar Dr James Jemut Masing madah ukai semina nengah pengari rayat aja jalai dikena gawa ke rayat sereta meri bantu tang mega nengah pengawa berat ke bukai.

“Pengelama 33 taun aku nyadi pengari rayat mayuh pengingat manis pait udah ditapi aku. AKu udah madah penyuah nuan dipilih nyadi pengari rayat mayuh pekara ti deka ditapi.

“Jam ukai nyadi jam kita. Rumah kita ukai ba rumah kita empu, duit kita ukai duit kita empu, pemanah pengawa kita deka enda dikenang, bejalaika pangku pengawa enggau menyana, sekali kita ilap deka ngasuh pengidup kita labuh,” ku iya rambau pengerami makai lemai beserimbai enggau Aum Deligit Tiga Taun Sekali (TDC) PRS enggau ngintu Pengerami Genap 12 Taun PRS ba  Restauran Dinner World kena malam Hari Minggu tu tadi.

Masing madah, sebarang pekara ti manah digaga sida (pengari rayat) deka seruran dipejah lalu lebuh sida ngaga pengilap enggau enda sengaja, tang dikeibuh, sida deka dipejah nyadi orang ti enda beguna.

“Kebendar bala kitai (pengari rayat) enda tau ilap, laban nya ngujungka kitai enda dikenang taja mayuh ngaga pekara ke betul,” ku iya.

Taja pia, nyema sida nakal enggau semua kritik enggau jaku pejah pengudah sida naka ulih ngereja pengawa, nya sida agi ulih bekunsi nama pengulih sida, ulih ‘berkorban’ rumah enggau privasi dalam pengidup sida, sereta ulih nerima diri kalah baka semangat sida nerima pemenang, lalu penatai sida tu dilalu ngagai kelab/tim pengari rayat.

“Pekara ti digiga pengudah nya sereta suah dipejah bala raban bansa ti nempa iya,” ku iya.

Masing mega madah bisi seiti pekara politik ti enda ulih ditagang sereta pekara tu majak ngerembai.

Ku iya, ninting tuan, parti majak tuai lalu baka nya mega bala pemesai iya lalu PRS majak ngerembai, baka nya mega bala kaban enggau ketuai iya. Makin tuai parti nyadi makin pintar.

“Makin tuai kitai, kitai nyadi makin pintar, kering penemu pulaika pemaik ngagai kitai sereta kurang agi belembut enggau buah penemu ke bebida.

“Nya alai sebedau kita kelalu tuai sereta ngasuh semua orang ari serakup irau, nyangka tu awak ke manah endur meri selamat jalai, sereta ngelempai ngagai sida ke biak megai pengawa,” ku iya nambah.

Pia mega Masing meri puji ngagai bala pemesai kaban ke udah meri jalai ngagai bala ketuai ke biak niki pangkat ke bendar iya tu ngasuh pengawa iya ke nyadi presiden muntang agi.

“Ngagai sida ti agi nganti gintir diri, arapka ulih besabar. Anang jampat ngaga pemutus sereta ngasuh kitai enda beserakup.

“Bala ketuai dalam parti nemu nama pekara ke patut digaga lalu aku nyamin bala kita alai kita deka terus berati sereta nampung pengawa nyerenih penau bala kita ti deka nyadi pengari ke dipilih.

“Nya alai anang berasai asa nyema kita enda dipilih. Bisi ungkup ke manah agi ngagai kita,” ku Masing.

Ku iya, munyi ku sempama, nyema pintu tu ditutup, pintu ke bukai deka dibuka. Pekara ti patut digaga iya nya terus muka pilih diri.

Berebak enggau nya, iya mega meri pengaga ati ngagai semua sida ke udah meang dalam pengawa bepilih TDC PRS ke-4 lalu meransang sida bekerejasama nentuka PRS terus nyadi parti asal Sarawak.

Ngagai dua iku penerima tanda basa ‘Jasa Nuan Dikenang’, iya meri pengaga ati ngagai seduai nya, laban udah bejalaika pengawa ti chukup manah ngagai PRS.

“Seduai udah gawa bebendar, dedikasi sereta taluk ngagai parti lalu tu nempa PRS ke bisi diatu,” ku Masing pengudah nya nyuaka tanda basa ngagai Datuk Joseph Mauh Ikeh enggau Penghulu Nuai Gema.

Sepenyampau 1,070 deligit enggau pemerati ari 38 bengkah bagi menua, 28 bengkah pampang indu enggau 20 bengkah raban nembiak nyereta TDC PRS Ke-4 di Bintulu enggau rambai jaku ‘Begempung Nyadi Kering, Bepechah Nyadi Lemi.

Taun tu TDC mega ngintu pengerami Genap 12 PRS ke nyadi parti kedua pemadu besai di Sarawak pengudah Parti Pesaka Bumiputera Bersatu (PBB) enggau 11 penuduk kunsil nengeri enggau enam iku kaban parlimen.

PRS bisi 86 pampang enggau sepenyampau 31,230 iku kaban di serata Sarawak.