// Dikarang Chris Bishop //
KUCHING: Datuk Bandar Majlis Bandaraya Kuching Selatan Datuk James Chan nyangkal tuduh ADUN–DAP Padungan Wong King Wei diak kandang ngelingi Kuching Municipal Council (KMC) Flat di Padungan, Kuching deka dikemansang.
Berindik enggau nya iya ngelalau semua ke diau ba 22 blok KMC flat anang irau ketegal nadai sebarang projek pemansang diperambu ba endur nya ke digaga ba taun 1957 suba.
“Anang sengapa nempa berita ke enda amat ti tau ngasuh rayat enda lantang. MBKS seruran deka ngintu pemaik enggau pengelantang rayat ke diau di KMC flat.
“Aku enggau terang madah diak nadai projek bisi diperambu naka ke diatu ba kandang endur nya,” ku iya.
James mansutka jaku tu ba aum pengarang berita pengudah ngulu aum raban kaunselar MBKS ke diatur di Ringkat 4, Begunan MBKS ditu, kemari.
Wong bedau lama tu tadi nuduh kandang endur KMC flat ke tembu timpuh ‘pajak tanah’ ba pun taun 2017 deka diambi perintah ngambi meri jalai ngagai projek pemansang.
Iya (Wong) mega madah KMC Flat ke kala dilawa Duke of Edinburgh Prince Philip ba taun 1958 nyadi seiti palan pesaka ke patut diintu enggau manah.
Nimbal penerang nya, James madah KMC flat ba maya ke diatu enggai nyadi dikumbai palan pesaka ketegal mengkang bisi rayat diau nguwan begunan nya.
Ku iya, semua 22 blok diungkupka ngagai orang mengeri ke ngembuan pemisi mayar penyampau bayar ke udah ditetap lalu nyadi palan sementara sebedau sida ulih ngiga tauka meli rumah ke manah agi.
“Kenyau didiri ba taun 1957, KMC flat udah nyaup peranak mengeri ke nadai ngembuan rumah ke menyana.
“Ditu mih palan endur sida ngangkatka ruang bilik nyentuk ngagai teulihka rumah ke manah agi endur diau.
“Begunan tu ukai ungkup orang kaya lalum pia mega ukai ungkup orang seranta, tang nyadi palan sementara endur sida ngidupka diri,” ku iya.
Ngenang kaul ke sama, James madah MBKS benung dalam proses ngenataika pinta ngagai Perintah’ Nengeri ngambi ulih nampung timpuh ‘pajak tanah’ ke temnbu ba pun taun 2017.