MARUDI: Pemujur ba bidang akademik enggau lumba beguna endar sereta ulih nyamin pengidup kitai dudi hari, ku Menteri Muda Kaunsil Kandang Menua, Datu Dr. Penguang Manggil.
“Ambi ke chunto, barang sapa ke mujur ba akademik enggau lumba iya nya sida ti meri kerejasama sereta pemerat ngagai pengajar di sekula enggau apai indai maya di rumah.
“Kitai patut naka ulih meransang diri taja kitai diau di menua ulu lalu beguna endar nganjung bala anak kitai ngagai sekula.
Iya madah munyi nya rambau bejaku bejadika Pengerami Anugerah Penyulut Nembiak 2016 ba Sekula Sekondari (SMK) Bakong di Beluru semak ditu pagi Hari Enam tu tadi.
Ku Penguang, iya meri besai terima kasih ngagai sekula alai iya kala nyadi nembiak dia sebedau nampung pelajar ba Kolej Tunku Haji Bujang ba Tanjong Lubang di Miri.
Penguang ke nyadi Kaban Kunsil Nengeri (ADUN) Marudi, madah betapi enggau ubah ba budaya mega pekara ti manah.
Bala nembiak dilalau anang ngaul diri enggau pengawa ke enda menuku baka dadah, ai bisi enggau penanggul rama ke bukai, runding ti menyana, ku iya.
Pia mega ku iya, belajar mayuh agi dalam pelajar Jaku Inggeris ke nyadi jaku antarabansa sereta suah agi dikena dalam dunya kemaya hari.
Penguang ngelalau sida ti deka nampung pelajar sekalika ba kolej tauka universiti, sereta milih kus pemadu manah tauka engkeman, ngambika ulih nangkup makit pengawa puang pengudah sida nembuka pelajar iya, ku iya.
“Ngagai sida ti teulihka pemutus ke nyulut, meri pengaga ati sereta chukup manah.
“Sekali agi aku nandu, nyema bisi nasib, anang semina nampung pelajar naka tikas Diploma, degree tang patut ditampung ngagai tikas master enggau PhD, laban pelajar tu nadai kala tembu.
“Anang nyalahka penyeranta ngasuh kita enda nyulut dalam akademik, tang besemaya ngagai diri empu kita ulih nyulut dalam pelajar. Bantaika ngagai dunya kita ulih mujur dalam akademik enggau lumba taja dalam ari sekula menua pesisir.
“Ambika chunto seiku nembiak ari SMK Bakong ditu udah mujur dalam lumba ‘Angkat berat’ datai ba tikas nengeri tauka SUKMA.
Beserimbai enggau pengawa nya, Datu Dr. Penguang bisi ngemendarka geran Projek Mit Pemansang Menua Pesisir (MRP) penyampau RM10,000 ngagai Serakup Apai Indai Enggau Pengajar (PIBG) SMK Bakong .
Bala bukai ke bisi bejaku Prinsipal sekula, Nona Binti Tu.
Sama bisi datai Pemesai Pelilih Beluru, Mataip Sayop, Pemesai Pelajar Subis, bala pengajar enggau bala ketuai raban bansa ke bukai.