Konsep ‘rumah inti’ deka digaga mayuh di pesisir

0
ABANG JOHARI

ABANG JOHARI

Rumah baka tu udah digaga di Bengoh ngundan tiga bilik tinduk enggau dua bilik mandi sereta rega ke mudah

KUCHING: Opis Menteri Berumah enggau Urbanisasyen keran ngadu konsep ‘rumah inti’ ke mujur digaga di Palan Pengentap Pendiau Bengoh ba mayuh bengkah kandang endur menua pesisir di Sarawak.

Konsep ke sebaka udah digaga di Bengoh nya deka bisi tiga bilik tinduk enggau dua bilik mandi.

Sapit Kepala Menteri Datuk Amar Abang Johari Tun Openg madah dikena ngemujur pengawa nya, opis menteri udah ngadu randau enggau Opis Sekretari Pekara Wang Nengeri ngambi ulih nambah puku ngagai Mutiara Mortgage and Credit Sdn Bhd, kompeni ke dikuasa Opis Pemansang Pengawa Berumah (HDC).

Atur nya ku iya deka meri awak ngagai Mutiara Mortgage nyendia lon ngagai pemeli rumah kelebih agi ngagai sida ke kurang penatai pemisi.

“Rumah tu deka mudah agi rega ari rumah ke digaga di Bengoh. Kitai deka ngaga rumah tu ba palan pengentap pendiau ke baru di menua pesisir,” ku iya.

Iya mansutka jaku nya rambau makai lemai begulai enggau orang gawa Opis Menteri Berumah enggau Urbanisasyen di sebengkah hotel ditu, malam ensanus.

Ba pengerami nya, Abang Johari ngarap polisi pengawa berumah ke baru tu nerima sukung sereta kerejasama semua orang gawa dalam opis menteri.

“Reti nya kitai meseti ngadu kerejasama lalu ngemujur polisi baru tu,” ku iya.

Ngenang kaul bukai, Abang Johari madah polisi baru ke udah dituku opis menteri dalam timpuh berapa taun ke udah nyengkaum numbuhka tribunal pengawa berumah sereta ngemanah ordinan pengawa berumah udah nyaup ngangkatka industri berumah di nengeri tu.

Ku iya, atur numbuhka skim spectra, iya semina di Sarawak aja udah meri awak ngagai mayuh agi peranak nengeri meli rumah nitihka pengulih sida.

Bela datai Menteri Muda Urbanisasyen Datuk Abdul Karim Rahman Hamzah enggau Sekretari Mendam Dr Wan Liz Osman Wan Omar.