Ukai perintah aja ti patut ngatur program tang mega begunaka piak peribit
Dikarang Rengenyan Labang //
KUCHING: Penyereta sereta saup piak peribit dalam ngatur sesebengkah program pemansang ba sesebuah kandang menua deka meri penguntung ngagai raban bansa, lebih agi di menua pesisir.
Menteri Muda Pengerai Mensia Mayuh Datuk Dr. Jerip Susil madahka, perintah begunaka saup piak peribit dalam ngatur pemansang enggau program ti mungkur raban bansa.
“Ukai semina perintah aja ti patut ngatur pengawa gempuru ba sesebengkah endur tang mega begunaka penyereta sereta saup ari piak peribit.
“Penyereta ari piak peribit enda ngira sekalika mai pemansang tauka program ti enda ngira nama tuju iya, nya deka meri pangka ti besai sereta manah ngagai raban bansa ba menua ke besemak.
“Nya alai aku ngasaika enda ngira nama chara dikena ngempuruka genap serak raban bansa, ngambika ulih begulai sereta beserakup, nya tentu deka ulih diterima manah ulih raban bansa kitai. Tu meh juluk kitai,” ku iya.
Jerip ke mega Kaban Kunsil Nengeri (ADUN) Mambong mansutka pekara nya lebuh ti bejadika Pengawa Ngelanjarka Pesta 1Singai 2016, ke diatur Putra Sentosa Development Sdn Bhd begulai enggau Erwin Events Management Company (EEMC), Gem Events Sdn Bhd sereta Blissfull Management ba 1Singai Commercial Centre, Tondong, Bau, ditu kemari.
“Aku ngasaika tuju kitai ngatur Pesta 1Singai tu deka meri pangka ngagai raban bansa ba endur tu, laban tu meri peluang ba pengawa dagang sereta ulih ngelanggur program pemansang.
“Nengah program tu mega deka meri peluang ngagai raban bansa ba endur tu nemu pemansang prasarana enggau infrastruktur dalam kandang endur (Singai) tu,” ku iya.
Nyerumba Pesta 1Singai 2016, ke diatur berengkah 2 ngagai 4 Disember, entara program ke diatur program meri darah, belagu, pekit tinju, pekit takraw enggau kebukai kelimpah ari bisi bansal bejualka barang pemakai enggau barang pengelandik jari.
Sama bisi datai ngagai pengerami nya ADUN Datuk Henry Harry Jinep, Menija Besai Raban Kompeni Putra Sentosa Suraya Julot enggau ke bukai.