POLISI PERINTAH: Mawan nyuaka geran ngagai sekeda penerima ari Parlimen Saratok.
Tuju geran tu diberi ungkup pemaik semua lalu ukai nguntungka seiku aja
SARATOK: Kaban Parlimen (MP) Saratok, Tan Sri William Mawan Ikom ngelalau bala komuniti ngena semua bantu ti diberi perintah enggau manah ngambi pulaika pemaik ngagai semua piak.
Ku iya, genap bantu enggau servis disedia endang patut meri pangka ke manah ngagai semua piak, laban pun genap pekara tu dipejalai endang ungkup pemaik semua lalu ukai nya ungkup seiku aja.
“Langkar pemansang perintah enggau ngagihka geran enggau tuju ngambika bala komuniti bejalaika sekeda pekara sereta mutarka sekeda penanggul ke ditapi sida.
“Kitai dekaka genap belanja ti diagih dikena ungkup pemansang ba kandang menua sida lalu ukai nya penguntung kediri empu aja.
“Pengawa tu nyata ngayanka perintah seruran meri pemerat ngagai pejalai projek pemansang ti tau ngemai penguntung sereta pemaik ngagai semua peranak ke diau ba mengeri enggau menua pesisir di nengeri tu,” ku iya.
Mawan mansutka jaku tu rambau Program Nyuaka Agih Geran Kaban Parlimen P205 Saratok ti udah diatur ba Rumah Rehat Saratok, kemari.
Rambau atur program nya, bisi 28 iku penerima datai ari Komiti Pemansang Enggau Pengelikun Genturung Pediau (JKKK) ari rumah panjai enggau tumpuk pendiau, serakup sereta mega gempung ukai dikuasa perintah (NGO) ke bisi datai.
Kenu ku Mawan, komuniti di menua pesisir endang benasit endar laban perintah seruran ngemeratka pekara penyikap perengka guna enggau infrastruktur ti dipinta peranak ba tumpuk pendiau enggau rumah panjai.
Pia mega ku iya, pekara ti beguna endar ngagai perintah Barisan Nasional (BN) iya nya nentuka nasit bala rayat diintu sereta ulih ngasaika pengelantang ba pemansang ti sebela.
Kelimpah ari nya, Mawan mega ngelalau peranak menua pesisir seruran liat ati nyema sida deka ngasaika penguntung ari pejalai sekeda projek pemansang pengudah tu.
“Pengeliat ati tu ulah patut bisi dikembuan genap iku peranak ke diau mendam di kandang menua pesisir berindik ari perintah enda nejuka pekara pengelantang sida dudi hari,” tandu iya.
Sama bisi datai, Pemesai Pelilih Kabong, Kamalludin Alkap sereta sekeda bala ketuai komuniti ke bukai.