KUCHING: Program Pelanda Jematan Batang Sadong deka dipasuk dalam kalendar dagang temuai Sarawak, ku Kaban Parlimen (MP) Batang Sadong Dato Sri Nancy Shukeri.
Iya ke mega Menteri ba Opis Menteri Besai madah pelanda nya deka diatur ninting taun lalu deka ngangkatka pemaik kaul pupu bansa sereta pemanah rampa menua nyadi pematak temuai datai.
“Pelanda tu chukup unik ke alai kitai bisi bansa melayu, iban, cina enggau bidayuh diau ngelingi Batang Sadong,” ku iya ba seiti aum pengarang berita di Kuching kemari.
Ngemujur pelanda keterubah ke diatur kena 11 Disember 2016 nya, Nancy madah dua buah rumah panjai di Batang Sadong iya nya Sungai Bulu enggau Senengin deka nyadi palan endur penyereta diau.
Ku iya, malam sebedau pelanda, main asal pupu bansa deka dipandang ngagai penyereta.
Iya nambah, penyereta ari Semenanjung Malaysia sereta sekeda ari menua luar baka ke ari Jepun deka datai ngulu pelanda.
Berindik enggau nya Nancy ngansak mensia mayuh ngerijister diri enggau pelanda ke alai hari penudi ngerijister ditetap sehari tu (5 Disember).
Mensia mayuh tau ngerijister di Opis Pelilih Mit (PDK) Sadong Jaya, PD Simunjan, PD Asajaya tauka betanya ngagai pengatur pelanda.
“Kitai nagit urung 2,000 iku orang deka datai nyereta pelanda tu.
“Naka ke diatu penyampau 1,652 udah ngerijista lalu mengkang dibuka nyentuk ngagai ila,” ku iya.
Pelanda Jematan Batang Sadong 2016 dibagi ngagai 2 kategori iya nya penyauh 5KM enggau 10KM.
Pelanda ‘fun-run’ nya semina nyendia perais ungkup kategori 10 KM aja. 10 iku penyereta ke dulu datai ba adan (lelaki enggau Orang Indu) deka nerima perais.
Chabut tikit benasit mega deka diatur rambau pelanda nya ila.
Pelanda ke disadang dipenyadi Nancy nya deka berengkah ari SK Sg Bulu jam 6.30 pagi lalu tembu mega di SK Sg Bulu.
Jematan Batang Sadong ba pemanjai 1.48 KM tembu digaga ba bulan November tu tadi nengah ungkur RM211 juta.