MIRI: Projek pemansang ke dilangkar piak ti bekaul ungkup kandang menua pantai Tusan patut dikelengkas berindik ari penyampau temuai ke majak nambah ngambi ulih nyungkak penatai pemisi komuniti ke besemak enggau pantai nya.
Pantai Tusan makin tebilang kelebih agi enggau fenomena ‘Air Mata Biru’ ti nyadi alai mayuh orang datai ke pantai nya laban deka ngemataka fenomena nya.
Seiku temuai ari Kuala Lumpur, May Ng, 27 taun, lebuhka dirandau maya bejalai ba pantai nya madah iya bisi ninga jerita pasal Pantai Tusan sereta fenomena ‘Air Mata Biru’ ari bala bakih, lalu tu ke ngasuh iya ngelawa endur nya.
“Kandang beberapa hari ke udah, aku macha online alai fenomena ‘Air Mata Biru’ bisi datai baru lalu tu udah tiga malam nyadi,” ku iya seraya nambah alai bakih iya ke gawa di pasar nulung nganjung iya ngelawa Pantai Tusan.
Lebuhka ditanya pasal perengka guna ba pantai nya, May madah ba dia mayuh pekara ke patut digaga, ukai semina ngelakuka pantai Tusan ngagai bala temuai aja, tang mega patut nyedia penyikap perengka guna menyana enggau lantang ngagai temuai ngambika sida rindang maya diau sereta nemuai.
Bala temuai bejalai ngelawa pantai deka duduk ba sekeda bangku digaga ari papan, lalu tebal agi sida tu semina deka bejalai-jalai ba sepemanjai pantai.
“Aku deka ngena agu lalu semina bisi dua aja agu – seiti ungkup indu lalu seiti ungkup sida lelaki. Pengepam agu udah patah lalu ai datai ari tangki. Aku ngasaika pekara tu patut diganti enggau penyikap perengka guna ke menyana agi enggau jampat,” ku iya.
Seiku temuai, Mohd. Shahrul, 50 taun, madah alai iya suah bejalai ngelantang ati ngagai pantai tu begulai enggau diri sebilik ketegal pemanah rampa menua enggau ulih ngelepa runding.
Iya mega merambu alai menua nya begunaka perengka guna ungkup industri dagang temuai ditu enggau di Tusan.
“Ambi ke chunto, deka ngelawa pantai, kitai nurun nengah bukit lalu bisi maya jalai lichin. Manah agi bisi tangga digaga nurun bukit ngagai pantai lalu nadai sebarang lalau endur bepegai,” ku iya.
Iya ngarapka piak otoriti bekaul deka ngenyampatka pemansang di kandang menua nya pulaika pengelantang ngagai semua pengusung.