Satok Uptown deka mindah ngagai Jalan Main Bazar

0

KUCHING: Satok Tourism Youth Uptown Market tauka suah agi disebut Satok Uptown ke dibuka ninting ujung minggu ba Dewan Suarah Nengeri ditu deka dipindahka ngagai Jalan Main Bazar.

Sapit Kepala Menteri Datuk Amar Abang Johari Tun Openg madah pemindah pasar malam tu ngagai palan baru kena nyendiaka kandang endur ke manah agi sereta engkeman ungkup sida ti bejual.

“Dagang Satok Uptown ba Dewan Suarah Nenegeri mega manah tang kitai enda ulih ngemendarka sida terus bejual dia.

“Alai aku udah meda seiti tempat ke mendam ungkup sida bejual iya nya ba Jalan Main Bazar lalu kitai deka nutup sekeda jalai ke dijadika taba ungkup sida ti bedagang tu bejual tetiap ujung minggu,” ku iya.

Iya madah munyi tu lebuh pengerami Makai Lemai bejadika Aum Perhimpunan Perwakilan Tahunan (MPPT) Ke-21 Dewan Orang Dagang Bumiputera Sarawak (DUBS) ba sebuah hotel bedau lam.

Sama bisi datai Menteri Muda Nembiak enggau Main Datuk Abdul karim Rahman Hamzah enggau Presiden DUBS Datu Abang Helmi Ikhwan.

Abang Johari ke mega Menteri Dagang Temuai, Seni enggau Main Asal nambah ari pemisi palan ti mendam ungkup Satok Uptown, tu deka muka awak bedagang ngagai komuniti ngelingi mengeri tu.

Pia mega, ku iya tu ulih nyadika palan ungkup sida busker merindang.

“Reti iya kitai deka bisi sebuah pasar malam ninting ujung minggu ti bisi mayuh macham aktiviti,” ku iya.

Satok Uptown iya nya keterubah di nengeri tu ke nyadi palan ungkup raban nembiak bejalaika dagang ti ngena chara ‘Uptown’.

Sekumbang ke udah dibuka taun nyin kemari, palan nya diatu udah nyadi palan ke matak mensia mayuh datai tetiap ujung minggu.

Mayuh macham perengka dijual baka gari, minyak wangi, perengka rumah, perengka ungkup kereta sereta mayuh agi ke bisi enggau rega ti manah.