KUCHING: Serakup Veteran Soldadu Malaysia (PVATM) Pampang Batu Kawa nesau semua anak Ex-Soldadu pampang nya ti teulihka penyulut ba peresa perintah UPSR taun 2016, dipinta nganjung nama nerima Anugerah Kecemerlangan Pendidikan Lembaga Tabung Angkatan Tentera (LTAT) – Yayasan LTAT tauka Skim Skolarsip UPSR.
Nitihku Ketuai Pampang, PVATM Pampang Batu Kawa, Spencer Birai madahka skim skolarsip nya mega dibuka ngagai anak balu kaban PVATM.
“Ngagai anak Ex-soldadu ba Pampang Batu Kawa ke nyulut sereta patut nerima gelar tauka skim tu dipinta betanya tauka betelefon ngagai Indu Opis PVATM Nengeri Sarawak ba lumur 082-456634 (Mr. Entinggang).
“Hari bulan ke penudi endur ngenataika peminta tu kena 15 Januari 2017,” ku iya madah ngagai Utusan Borneo.
Nembiak ke patut nerima gelar tauka skim tu iya ke udah ngambi peresa UPSR taun 2016 sereta peranak menua Malaysia.
Subjek ke dikira nyema ba Sekolah Rendah Kebangsaan iya nya nyengkaum Bahasa Melayu (Pemahaman); Bahasa Melayu (Penulisan); Bahasa Inggeris(Pemahaman); Bahasa Inggeris (Penulisan); Matematik, Sains enggat subjek tambah iya nya Bahasa China enggau Tamil.
“Ke patut nerima skim tauka gelar tu iya nya ke udah bulih 6A; 5A, 1B tauka 5A,1C sereta enda tau enda teulihka A iya nya seiti ari Bahasa Melayu Penulisan tauka Bahasa Melayu Pemahaman,” ku iya.