Ketegal nya pengawa ngelaku ngagai renggat antarabansa betapi enggau penanggul, ku Len Talif
KUCHING: Inisiatif ti ngaul komuniti ke diau ba kandang ‘Heart of Borneo’ (HoB) di nengeri tu kelebih agi ba pekara industri ngeluar asil kampung ukai kayu (NTFP) enda dirikod enggau manah ungkup pengawa dokumentasyen.
Menteri Muda Rampa Menua Datu Len Talif Salleh madah, mayuh inisiatif ngaul komuniti di dalam HoB udah diatur mayuh bengkah ejensi perintah, sekeda ari nya Opis Kampung Sarawak (JHS), Sarawak Forestry Corporation (SFC) enggau Sarawak Energy Berhad (SEB) sereta Gerempung Ukai Dikuasa Perintah (NGO) enda dirikod.
Ketegal penanggul tu ku iya, inisiatif nya nyengkaum ngeluar asil kampung ukai kayu ari komuniti menua nya enda ulih dibantai ngagai mensia mayuh kelebih agi ba renggat antarabansa.
“Kitai ukai semina lemi ba pengawa ngelakuka produk kampung ukai kayu, tang lemi endar dalam ngerikod.
“Nya alai aku ngansak ejensi bekaul nyengkaum NGO mai pekara tu ngambika ditemu komuniti antarabansa. Chara pemadu manah meseti dikelala sereta dipejalai ngambika dokumen tauka risalah ulih dikeluarka,” ku iya.
Iya mansutka jaku tu ngagai pengarang berita pengudah bejadi Program Bejadi Seminar ‘Heart of Borneo’ (HoB) Sarawak ditu kemari.
Len Talif mega Menteri Muda ba Opis Kepala Menteri (Pemansang Pengereja Pengawa enggau Latih) bejaku, nyauka manggai 12,800 komuniti di menua tu ari bansa Iban, Kenyah, Penan, Punan Vuhang, Kelabit, Lun Bawang enggau Sa’ban diau mendam dalam HoB Sarawak urung 2.1 juta hektar pemesai.
Pengidup komuniti tu ku iya, endang bepanggai ba pengeraja pemansut biodiversiti dalam kandang menua tu.
“Ambika chunto, inisiatif JHS ngangkatka pemanah tikas pengidup bansa Penan di Long Kubaan Bario, enda diberita taja tu sekeda ari inisiatif dalam HoB ti beguna endar.
“JHS nembuka jematan semanjai 32 meter meraka Sungai Kubaan, sebedau tu, peranak kelebih agi nembiak sekula bejalai nengah sungai ngelawa sekula di Bario,” ku iya.
Ku Len nampung baru, peranak di menua nya mega diajar chara nanam sayur enggau nupi jelu ungkup sida empu nyengkaum nyambung bekal ai paip ngagai genap ruang bilik.
“Semua tu beguna endar tang enda dirikod ngambi diberita ngagai mensia mayuh nyengkaum ba renggat antarabansa,” ku iya.
Ngelansa HoB, ku iya, tu inisiatif ngaul semua piak bisi pematut ngintu biodiversiti enggau rampa menua seraya nyaga pemerat komuniti di menua nya.
“JHS semina ejensi besai bejalaika inisiatif ari baruh HoB tang iya begunaka kerejasama semua piak nyengkaum NGO dikena nentuka tuju nya dijapai.
“Kitai mega begunaka pengelandik enggau NGO tauka sekeda ejensi ke tau meri input laban genap komuniti tu bebida ari sukut gaya idup, main asal enggau ke bukai,” ku Len.
Berebak enggau nya, Len Talif madah Sarawak dalam pengawa ngaga Taman Botanikal di Kuching tang agi ba renggat perambu.
Nitih ku iya, Sarawak ngembuan mayuh tanam botanikal asal serata nengeri lalu sekeda ari nya Taman Negara Batang Ai enggau Taman Negara Mulu.
“Penemu tu iya nya kitai ngenggaika bala temuai tauka sainstis semina diberat ba Kuching aja, tambah mega Sarawak ngembuan mayuh taman botanikal asal ti mayuh enggau biodiversiti sereta ngembuan biuh kediri empu.
“Tu endang perambu ke manah (deka numbuhka taman botanikal ba Kuching), berebak enggau nya kitai mai bala temuai tauka sainstis bejalai ngagai palan asal, biodiversiti iya ti bedau diserungkai,” ku iya nerang.