JKKK meseti seruran beratika penanggul ditapi nembiak redak

0

Sida mega patut ransing ngemansangka kandang endur dipegai diri empu

SRI AMAN: Sapit Menteri Dalam Menua II Masir Kujat, ngelalau Komiti Pemansang enggau Pengelikun Genturung Pendiau (JKKK) ba nengeri tu bejalaika pengawa ba tikas genturung pendiau sereta rumah panjai dikena matau penanggul ke ditapi nembiak redak.

Ku iya, pengawa JKKK ukai semina ngembing nembiak redak sida tang sida ke raban JKKK nya mega patut regas ngemansangka genturung pendiau kediri empu.

“Aku enggai JKKK ba sitak dipegai aku semina diau diri lalu mangku pengawa semina atas nama aja tang enda ngaga ubah enggau pemansang ba genturung pendiau diri empu.

“Nyema genturung pendiau tauka rumah panjai kitai seruran mansang lalu nitihka ubah kemaya hari, tu mandangka JKKK ba genturung pendiau nya seruran regas,” ku iya.

Iya ke mega Kaban Parlimen (MP) Sri Aman bejaku munyi nya lebuh ti bejadika Pengerami Ketuai Begulai enggau Rayat ke diatur Komiti Pemansang enggau Pengelikun Genturung Pendiau (JKKK) Rumah Melunggang, Pakit, Sri Aman enggau Opis Pekara Khas (JASA) Sarawak Bagi Menua Sri Aman ditu bedau lama.

Nambah ke lalau iya, Masir madah, kelimpah ari mikir deka ngemansangka genturung pendiau, JKKK mega mangku pengawa ke berat sentang pekara meresi sereta ngias kandang endur sida, iya nya pengeranda dalam pengawa beripai patut bisi ba seiti genturung pendiau ngambika kandang endur seruran beresi.

Beserimbai enggau tu, Masir mega bisi ngemeranka sukung rayat ke enda putus enggau perintah endang diguna sereta dikemeratka laban tu ulih ngerichahka program pemansang ba nengeri tu lalu mega ungkup pemanah politik.

“Rayat meseti beterima kasih enggau pemisi pemansang ke udah pia mega benung dilangkar lalu tu deka dipejalaika perintah chara berenggat,” ku iya nandu.

Sama bisi datai ba pengerami nya, Pemesai JASA DUN Bukit Begunan Jesi Bintoh, Penghulu Briku Busang, Kunsilor Menjang Niah, Ketuai Opis Perintah sereta tuai raban bansa ke bukai.