Palan endur nyaga sereta naruh artifak lalu ngelaika Santubong nyadi pintu penama antarabansa ke Borneo
// Dikarang Rengenyan Labang //
MACHA PENERANG: Abang Johari (kanan) macha sejarah Batu Gambar seraya mendingka penerang ari Charles.
KUCHING: Sarawak dipelabaka deka ngembuan Taman Arkeologi di Santubong dalam taun 2019.
Sapit Kepala Menteri, Datuk Amar Abang Johari Tun Openg madah, Taman Arkeologi Santubong deka nyadi sebuah palan endur nyaga enggau nyimpan mayuh sejarah tauka artifak ti beumur urung 1,500 taun ke udah.
Iya arap bendar sejarah tauka artifak nya deka ulih dikena matak temuai datai ngagai Santubong, kelimpah ari dikena ngetanka sejarah nya empu.
“Menua kitai di santubong tu mayuh bendar sejarah tauka artifak ti manggai urung 1,500 taun. Lalu kitai deka nyimpan sereta ngetanka pasal sejarah tu, ti ukai semina dikena narit panatai temuai tang mega endur bejalaika pansik.
“Berindik ari nya kitai merambu deka numbuhka Taman Arkeologi. Kitai meda bisi lima igi batu nya ,lalu nya amat beguna ba sejarah Santubong. Taman tu ila deka ngelai Santubong nyadi pintu penama antarabansa ke Borneo.
“Silik agi, kitai deka berengkah taun baru lalu kitai ngarapka taman tu ulih tembu magang lebuh manggai ba taun 2019, ke lalu nyadi pematak temuai sereta nyadi sejarah ti beguna,” ku iya.
Abang Johari mansutka pekara nya dalam aum pengarang berita, pengudah ngabas Tapak Warisan Sg Jaong di Santubong, ditu kemari.
Bejaku baru iya madahka perengka infrastruktur ba taman nya deka dikemanahka agi ngambika pengelantang enggau pengelikun mensia mayuh tauka bala temuai ke datai mega sejarah tauka artifak ke bisi ba Taman Arkeologi Santubong.
Nitihku iya, piak iya deka bekerejasama enggau ejensi tauka opis ke bekaul ba pengawa nyendiaka jalai ke meruan ngagai taman nya.
“Kitai deka ngemanahka agi kereban guna ba kandang endur nya, kitai deka ngaga infrastruktur ti ngemerat sereta ulih tengah mensia mayuh.
“Kitai deka nempa kerejasama enggau Opis Tanah enggau Survei, baka ni deka ngaga jalai ari Jalai Sultan Tengah ngagai endur ke dilawa kitai (Tapak Warisan Sg Jaong), lalu berebak enggau nya kitai mega deka ngemanahka kandang endur Sg Jaong ngambika besambung enggau Taman Geologi,” ku iya.
Abang Johari ti mega nyadi Menteri Pengawa Berumah enggau Kandang Mengeri seraya madahka taman arkeologi nya ila diperambu deka disambungka enggau Wallace Centre.
Nambahka nya, Kurator Opis Muzium Sarawak, Dr. Charles mega bepenemu taman nya ila deka meri penguntung ngagai rebak baru enggau dudi ngambika nemu pasal sejarah tauka artifak ke bisi di Santubong.
“Lebuh taman tu tembu ila, dia semua penerang pasal sejarah tauka artifak deka disimpan ba palan nya lalu ulih nyadika lalau ngagai rebak baru enggau dudi, kelimpah ari ke ulih nyadi matak temuai datai,” ku iya.
Berabak enggau tu Abang Johari mega bisi ngabas Batu Buaya di Kpg Santubong.
Sama bisi datai nyempulang Abang Johari enggau Charles kemari, arkitek ari DDR Architects, Dayang Duraih Abang Mansor enggau k ebukai.