Beduduk ari pengawa tu sida nyadi opis menteri keterubah udah nyain sempekat nya enggau SPRM
KUCHING: Opis Menteri Kereja Raya nyadi opis menteri keterubah nyain sempekat ‘Integrity Pact’ enggau Komiti Nagang Pengawa Makai Suap Malaysia (SPRM).
Nerang pekara nya, menteri iya, Datuk Seri Fadillah Yusof madah, sempekat tu ngaum semua renggat ba opis menteri, nyengkaum ejensi, pemesai kanan enggau iya empu.
“Kitai endang muji pengawa dipejalaika SPRM tang enti sema semina ngandalka SPRM aja enda chukup. Iya patut berengkah ari genap iku diri kitai empu, reti iya semua orang patut nemu pangku pengawa diri.
“Tambah agi piak politik, anang malut ngena politik lebuh pengawa kitai ngemunas penyalah makai suap tu, kitai deka neritka atur, semua piak pan bela dikaul,” ku iya.
Iya mansutka jaku tu lebuh dirandau pengarang berita pengudah bejadika opis baru TM Tours & Travel Sdn Bhd Pampang Kuching, ba Jalai Kulas, ditu kemari.
Iya meri penerang nimbal isu ngetan sekeda pemesai perintah bekaul penyalah makai suap nyengkaum ba Opis Ai Sabah, Opis Menteri Nembiak enggau Lumba sereta Opis Menteri Menua Pesisir enggau Kandang Menua.
Ku iya nerang, ba KKR, semua pemesai udah nyain sempekat nya nyengkaum mantaika penyampau pengeraja dikembuan diri.
“Tu sebagi ari atur lalu baka kami ba renggat menteri sereta kaban parlimen Barisan Nasional (BN), ninting taun deka mantaika penyampau pengeraja diri ngagai Menteri Besai (Datuk Seri Najib Tun Razak) alai SPRM bisi akses ngagai sebarang reta ke dikembuan kitai.
“Sempekat tu mega nyadi ‘Aku Janji’ alai kitai enda ngaul diri ba sebarang pengawa ke salah ngena kuasa tauka makai suap,” ku iya nerang.
Pengawa ngetan individu salah makai suap mega ku iya, ngayanka pengeransing perintah ari baruh pegai Najib kenyau ari suba ba pengawa nagang sereta bejalaika atur ngagai pesalah makai suap.
Ba lansa bukai, Fadillah nangkan semua orang Islam di nengeri tu ke bisi juluk ngereja umrah ngambika bejejimat lalu anang alah umbuk pakej umrah ari baruh RM5,000 dikena nyeliahka diri ari kena tipu.
Ku iya, pakej umrah semina tau diberi ari ejensi dagang temuai ti berejista enggau Tabung Haji sereta Opis Menteri Dagang Temuai perintah besai enggau nengeri.
“Mensia mayuh patut bejejaga enggau umrah ti nawar pakej ari baruh RM5,000. Sinu endar agi mayuh sida kena tipu ejensi dagang temuai ti nadai tanggungpengawa tu.
“Aku ngarap pengudah tu peranak Malaysia ke bisi ati ngeraja umrah, kelebih agi ari Sarawak ngambika bejejaga,” ku iya.
Sama bisi datai Kaban Kunsil Nengeri (ADUN) Tupong Fazzrudin Abdul Rahman, Senator Dr Zaiedi Suhaili, Direktor Urusan TM Tours and Travel Mohd Ridzwan Abdullah enggau Menijar Besai TM Tours and Travel Sarawak Azmi Shaari.