MADAHKA PENUSAH: Aum media bekaul enggau pemidang Adenan bechairmanka Abang Johari, Uggah enggau Sekretari Perintah Nengeri, Tan Sri Datuk Amar Mohd Morshidi Abdul Ghani ba Wisma Bapa Malaysia.
Perintah nengeri udah netapka sehari tu kemisi lalu serata nengeri deka ngulit pengelama tujuh hari
Dikarang Jacqueline R. David //
KUCHING: Perintah Nengeri Sarawak madahka hari ngulit ke menua Sarawak ditetapka dalam kandang tujuh hari belabuh ari kemari lalu semua menira nengeri tu digitang setengah tiang aja berindik ari pemidang Kepala Menteri Sarawak, Datuk Patinggi Tan Sri Adenan Satem ke udah nadai pukul 1:24 tengahari kemari ba Palan Tungkul Ati Sepital Besai Sarawak, Samarahan, udah bekai iya dipasukka ngagai sepital nya empat hari ke udah.
Enggau nya, sehari tu ditetapka nyadi hari kemisi khas ngagai semua rayat Sarawak, nyengkaum opis perintah, korperat enggau sekula, dikena meri awak ngagai rayat meri basa ke penudi endar ngagai iya.
Berindik ari nya mega, semua program perintah nengeri ke udah diperambuka dalam kandang tujuh hari nya deka ditangguh dulu.
Sapit Kepala Menteri Datuk Amar Abang Johari Tun Openg ba aum media kemari madahka niang Adenan, 72, ke ada dalam taun 1944 udah nembuka pelajar iya di Sarawak enggau Australia, ninggalka bini iya, Datin Patinggi Datuk Amar Jamilah Anu enggau lima iku anak enggau lima iku uchu.
“Sarawak lenyau seiku ketuai ke dipebasa ti mayuh udah ngereja pemaik ke Sarawak enggau Malaysia.
“Tu pengelenyau ke besai ngagai Sarawak enggau menua Malaysia.Iya ngembuan mayuh peneleba pengudah gawa ba ke kededua Perintah Nengeri enggau Besai,” ku Abang Johari madah ba aum media pengudah nerima berita pasal pemidang Kepala Menteri Sarawak, ba Bilik Baum di Wisma Bapa Malaysia ditu, kemari.
Ku Abang Johari baru, Adenan udah mai Sarawak nyadi menua ke tegap agi dalam politik nyengkaum nyaga menua tu kelebih agi sekumbang iya nyadi Kepala Menteri. Iya bebendar deka meda sereta ngiring Sarawak nyadi sebuah menua ke mujur, nyengkaum bekerejasama enggau Perintah Besai ari baruh pegai Menteri Besai Datuk Seri Mohd Najib Tun Razak ngulihka autonomi Sarawak dipulaika baru.
“Rayat Sarawak tentu udah lenyau seiku orang ke mayuh udah mai pemujur ngagai nengeri tu,” ku iya.
Abang Johari ti mega Menteri Pengawa Berumah sereta Menteri Pengawa Dagang Temuai, Seni enggau Adat Pesaka nusui sereta ngerintaika sejarah Adenan dalam politik, ari keterubah iya menang ba Pengawa Bepilih Nengeri bepun ari Muara Tuang, lalu nangkan nya menang baru ba kerusi Parlimen di Batang Sadong sereta gawa nyadi menteri penuh di Sarawak enggau Perintah Besai.
Berindik ari nya, pengudah gawa nyadi Menteri ba Perintah Besai di Semenanjung Malaysia, Adenan pulai ke Sarawak lalu dichiri mangku pengawa nyadi Kepala Menteri nyilih Tun Pehin Sri Abdul Taib Mahmud (diatu Taib nyadi Tuai Megai Menua).
Pagi tu bangkai niang Adenan deka dibai angkat ari rumah iya empu dalam pukul 10 pagi ngagai Masjid Jamek Nengeri Sarawak.
Mensia mayuh, pemesai tau meri basa ke penudi ngagai niang belabuh ari pukul 10:30 pagi nyentuk sebedau masuk jam sembiang Zohor. ( tengahari urung pukul 1 ngalih hari). Mensia mayuh mega dilalau bebasaka atur pengawa nya, ngena baju chelum lebuh ngadgai Masjid Jamek.
“Aku pechaya dalam timpuh nya, kitai tentu berunding sereta ingatka pemanah pengawa niang ti mayuh udah mantu kitai sereta ngangkatka nengeri tu ngagai tikas ke tinggi agi.
“Iya mega mayuh udah mantu NGO, lalu ketegal nya penyiru iya udah ngasuh kitai berasai sinu endar enggau pemidang niang tu,” ku Abang Johari.
Niang Adenan deka diberi basa ‘State Funeral’ lalu nangkan nya deka dikuburka ba Tanah Pendam Islam di Semariang, pengudah sembiang Zohor di masjid Jamek Kuching.
Ku Abang Johari, Adenan tu orang ke seruran lantang ati. Lebuh iya enggau Sapit Kepala Menteri Datuk Amar Douglas Uggah ngabas iya (Adenan) di sepital nya ensana, Adenan enggau ulah iya ke deka betundi, bebuti nanya Abang Johari enggau Uggah, nama berita ‘Kedai Kopi’ (cherita politik) ke didinga sida iya?
“Aku udah begulai enggau Adenan kenyau ari kelia menya, begulai diau ba genturung pendiau ke sama. Adenan seiku orang ke landik, rindu begulai enggau bemacham pupu bansa….Tu pengelenyau ke berasai endar ba kitai.
“Iya orang ke nelap, ngembuan mayuh penemu…Aku udah gawa enggau iya kenyau ari kami duai masuk politik, sama nyadi menteri muda,” ku iya.
Douglas ti mega kala nyadi Menteri Industri Kebun Bedandang Besai ba renggat Perintah Besai sereta seiku pemesai ke endang dibai Adenan pulai kitu bediri ba sitak Bukit Saban maya PRN ke-11 tu tadi, ngasaika pemidang Adenan pengelenyau ke chukup besai.
“Iya seiku ketuai, anak Sarawak ke chukup pengelandik, lalu nambah enggau nya Adenan orang ke berani negika nengeri Sarawak. Pemidang iya ngenyitka semua orang. Munyi ku Abang Johari kemari, lebuh kami ngabas iya, sigi betundi enggau kami nanyaka ‘gossip’ ba kedai kopi,” ku Uggah.
Kelimpah ari nya mega, sekumbang Adenan mangku pengawa nyadi Kepala Menteri, tu mega keterubah endar, tiga iku Sapit Kepala Menteri diberi dichiri mangku pengawa nya, iya nya Datuk Amar Douglas Uggah empu ti mega Menteri Pengawa Betanam Betupi Moden enggau Ekonomi Menua Pesisir, Datuk Amar Abang Johari ti mangku dua iti portfolio iya nya Menteri Pengawa Berumah enggau Menteri Pengawa Dagang Temuai, Seni enggau Adat Pesaka enggau Tan Sri Datuk Amar James Masing ti mega nyadi Menteri Pemansang Infrastruktur enggau Perengka Pengangkut.