KUCHING: Pengawa nyiri Datuk Amar Abang Johari Tun Openg nyadi Kepala Menteri baru ngelaika penegap politik Sarawak, ku chaiman PKR chairman Baru Bian.
Ngenataika pengaga ati iya ngagai Abang Johari ketegal dichiri nyadi Kepala Menteri baru, Baru madahka Abang Jo ngembuan peneleba nyadi ketuai, lalu udah semilan penggal nyadi pengari rayat.
“Aku pechaya iya meretika batang pengirau ati rayat Sarawak baka pekara ti dikemerat niang Datuk Patinggi Tan Sri Adenan Satem, ti meri iya undi popular ari rayat Sarawak.
“Kitai arapka (Abang Johari) nampung pengawa ti udah ditinggal sereta semak ba ati niang kepala menteri Adenan Satem baka pekara autonomi, royalti petroleum, pelajar enggau pengawa berimba kampung nadai pemendar,” ku iya ba penerang berita ensanus.
Baru, ke mega Kaban Kunsil Nengeri Ba Kelalan madah, PKR nengeri optimis Abang Johari ulih ngetanka hak ti nadai tatak ba jalai pengarap ti udah dikereja Adenan sereta mutarka penanggul tanah Bansa Asal (NCR) ti nating bansa asal nengeri tu.
“Kami minta ari iya, pekekara ti keterubah patut digaga iya ba opis iya nya nentuka konsep Akta Tanah diubah lalu ngempung Pemakai Menoa enggau Pulau Galau nyadi tanah NCR. Pekara tu besai amat reti dikena iya ngepunka pengawa nyadi Kepala Menteri Sarawak, sereta nyadi kelai ngagai rayat iya bisi pengerindu ba ati sida.”
Ba penemu Baru, iya beratika Abang Johari mudah disemak lalu nguji besaup enggau iya mai pemaik ngagai Sarawak.
Baru mega ngelaluka berita ti madahka pengawa nyiri Kepala Menteri ke baru ensanus.
“Kami nerima pengawa nyiri nya ti dikejampat dikena nentu pengelanchar tusun pengawa di nengeri tu sereta mega nyeliahka spekulasyen.”
Berebak enggau nya, Kaban Kunsil Nengeri Batu Lintang ke mega Mandal PKR nengeri, chairman See Chee How madahka Abang Johari enda tau enda nampung visyen enggau misyen niang Datuk Patinggi Tan Sri Adenan Satem.
“Mega patut dikereja nambhak pelin nya dikena ngangkatka Sarawak nyadi menua ke manah lalu nembuka pengawa nya dalam timpuh ke pandak,” ku iya madah ngagai pengarang berita lebuh dikerandau ba Padang Bilun Entarabansa Kuching (KIA) ditu ensanus.
Ba pinta sentang kuasa autonomi ungkup Sarawak, See madahka nya ukai semina juluk ati Adenan aja tang mega rayat Sarawak.
“Kepala Menteri baru patut nampung lalu nitihka pengawa ti udah dipun niang Adenan. Nya pengawa ti pemadu beguna ba iya ke naydi Kepala Menteri,” ku iya nambah.
Nadai pemar besai ditapi Abang Johari, taja pai See beratika tu mih maya pemadu manah lalu peluang belabuh ari diatu nyentuk pengawa bepilih besai ke deka datai alai iya nyapai mayuh agi pemujur.
“Taja pan pengawa tu dipeda baka ke besai ditangkup iya, tang iya bebendar…iya ulih nembuka semua pengawa lalu ngelakuka diri ngambika semua rayat Sarawak nyukung iya. Aku pechaya iya teulihka pemujur nya ,” ku See.