KENA MANAH: Riot nyuaka chek ngagai Indi (kanan) ke nguluka Kelab Rekreasyen Kaunsil Pelilih Serian seraya dikemata (ari kiba) Runin enggau Dahim.
Enti ukai ketegal Tok Nan, Serian engka enda diangkat nyadi bagi menua nyentuk ke sehari tu, ku Richard Riot
SERIAN: Menteri Orang Gawa Datuk Seri Richard Riot Jaem madah peranak menua Serian deka seruran ngenang pemanah jasa ex-kepala menteri, Niang Datuk Patinggi Tan Sri Adenan Satem ba pemutus digaga dalam bulan April 2015 ti ngangkatka pelilih menua tu ngagai bagi menua ke-12 sereta ke pemadu baru di Sarawak.
Ngelansa kenang iya ngagai Niang Adenan, Riot ke mega Kaban Parlimen (MP) Serian madahka enti ukai ketegal Tok Nan, Serian engka enda diangkat nyadi bagi menua nyentuk ke sehari tu.
Peranak Serian deka seruran ngenang jasa iya ngagai status bagi menua kitai. Iya begunaka mayuh pemerani dikena ngangkatka pelilih menua ngagai bagi menua laban tu berundingka mayuh pugu pekara baka ngatur baru garis entara sitak kunsil nengeri enggau belanja dikena ngaga indu opis ke baru.
“Tang Tok Nan ngasuh nya nyadi nyata. Sehari tu Serian nyadi bagi menua sereta gaya pemansang mega bisi berubah,” ku iya lebuh nyuaka agih belanja khas ngagai mayuh bengkah gempung ari baruh sitak parlimen Serian ba Opis Socso di Serian kemari.
Ngelansa silik, ku Riot, peranak di Serian ulih ngarap deka mega ubah ke nyengala dalam rampa menua tu dalm timpuh lima taun ke deka datai lebuh bais nadai tiga bengkah projek besai deka berengkah dipejalai.
Ku iya, tiga bengkah projek besai dilangkar ungkup mengeri Serian iya nya kompleks opis perintah, palan mengeri ke baru enggau palan konvensyen. Ku iya nampung, perambu ngaga palan konvensyen Serian deka nyapai tikas bagi menua keterubah ba nengeri tu.
“Aku nemu bisi peragam ba luar din ke madah nadai sebarang bida sekalika Serian nyadi pelilih tauka bagi menua.
“Aku nerang enggau nyemetak agi, bida deka datai dalam kandang empat tauka lima taun berengkah ari diatu.
“Dudi hari, lebuh semua penyikap perengka guna enggau infrastruktur udah digaga, bala kita deka nemu pemesai pangka pemutus digaga Tok Nan nempa Bagi Menua Serian ba pengidup rayat iya,” ku Riot.
Sama bisi datai Sekretari Politik iya, Major (R) Datuk Peter Runin, Residen Serian Dahim Nadot enggau Sekretari Kaunsil Pelilih Serian Joseph Indi.
Ba lansa bukai, sepenyampau 17 buah gerempung, nyengkaum raban indu enggau gerija sereta komiti tumpuk pendiau nerima kesemua penyampau manggai RM150,000 ba agih belanja khas ari Riot.
Penerima pemadu besai iya nya Gerempung Apai Indai Enggau Pengajar (PIBG) Sekula Primari (SK) Payau nerima RM20,000 seraya bala penerima ke bukai sekalika bela nerima RM10,000 tauka RM5,000.
Dalam jaku lalau iya ngagai bala penerima, Riot madahka iya deka meda belanja tu dikena enggau menyana sereta penerima meseti nganjung ripot ngagai opis iya nyadika bukti.
“Aku enggaika bala kita naruh duit tu dalam bank lalu udah nya datai baru ngagai aku minta mayuh agi belanja dikena nambahka penyampau duit ke ditaruh kita.
“Duit kita nya dikena bejalaika aktiviti baka ngemanahka begunan gerija, bebelika jemari dikena ba balai raya enggau mantu bala nembiak sekula ti begunaka bantu,” ku iya.
Iya nangkan bala penerima ti puntan nganjung ripot sida deka betapi enggau penanggul nadai nerima sebarang bantu ari iya dudi hari.
“Nyadi menteri, aku ukai semina ngagihka belanja ti sebarang MP Barisan Nasional (BN) patut dipejalai, tang aku meda bisi belanja tambah laban agih belanja ngagai semua menteri penuh.
“Nya alai kita meda, pangku pengawa Menteri Orang Gawa chukup besai reti ngagai aku enggau semua pengundi di Serian, kelebih agi bansa Bidayuh, laban seagi Menteri Besai bisi pengandal ba aku, kitai bisi kebuah berasai lantang sereta beterima kasih,” ku Riot, ke udah madahka diri deka ngetanka Serian, penuduk diarika iya kenyau ari taun 1990, maya pengawa bepilih besai ke deka datai.
Pengudah pengawa nya kemari, Riot nyereta pengawa nungkun dian dikena ngenang Niang Adenan ba Taman Komuniti Serian. Pengawa tu diatur raban Serakup Pemuzik enggau Artis Bidayuh (BAMA) diuluka presiden iya, Dr Alim Impera.