KUCHING: Ex-jaguh pechut 100 meter menua, Watson Nyambek ngaku ex-Kepala Menteri, Niang Datuk Patinggi Tan Sri Adenan Satem endang seiku ketuai ke nyengala ungkup semua bansa.
Watson, digelar raban media enggau peminat ‘The Flying Dayak’, madahka niang Adenan endang nyata nadai bepilih bulu alai niang jampat datai mantu lebuh iya amat begunaka bantu.
Watson ngenang lebuh niang Adenan datai mutarka penanggul iya ari ke bankrap dalam taun nyin kemari.
Niang Adenan nemu pemesai jasa aku ngagai nengeri tu sereta ngasuh nengeri temegah ati ba timpuh ke chukup lama alai niang ngasuh nengeri tu ngiga rumah ti menyana di Miri ungkup aku, ku kenang Watson.
“Aku meri terima kasih ngagai niang ex-Kepala Menteri enggau perintah nengeri tu ketegal bantu sida ngagai aku enggau kami sebilik.
“Niang (Adenan) ngeluarka aku ari bankrap lalu niang minta nengeri tu ngiga ke aku rumah ke menyana agi. Aku mega deka meri terima kasih ngagai Gerempung Bansa Dayak Sarawak (SDNU) ke udah nyaup mutarka sekeda pekara,” ku Watson lebuhka dirandau kemari. Iya mega bemalinka SDNU ke udah nyaup mutarka isu ti nekul iya.
Lebuhka ditanya nama lalau ti kala disebut niang Adenan ngagai iya, Watson madah ex-Kepala Menteri madah ngagai iya ngambika bekelimat enggau belanja ungkup dudi hari kelimpah anang enda bebendar agi gawa dalam pangku pengawa nyadi jurulatih ungkup nengeri tu.
Watson mega madah iya enggau bini iya, Fellizia udah meri basa kepenudi ngagai niang Adenan kena Hari Empat tu tadi ba Masjid Nengeri ditu begulai enggau beribu iku bala bukai.
Asai ke bedau puas, iya enggau Fellizia mega udah nya meri basa ngagai niang Adenan ba pendam di Pendam Islam Semariang alai seduai betemu enggau bini niang Adenan, Datin Patinggi Datuk Amar Jamilah Anu.
Nitih ku Watson, Jamilah madah ngagai iya anang putus semangat sereta rinduka pengawa lumba taja niang Adenan nadai agi ditu meri peransang ngagai iya.
Iya madahka lumba 100 meter seruran ba bidang kuasa
NGINGATKA NIANG: Riot benung nyadaka pantun ke dituju ngagai Niang Adenan.Kepala Menteri kenyau ari jeman Tun Pehin Sri Abdul Taib Mahmud.
Watson ngarapka pengawa tu ulih ditampung Kepala Menteri ke baru, Abang Johari Tun Openg.
Watson ngena awak tu mega mantaika juluk alai iya deka nerima gaji tetap ninting bulan gawa enggau Sarawak Sports Corporation (SSC).
Ngarapka Perintah Nengeri ulih beratika pekara nya, ku Watson nunjuk alai prospek pengawa enggau SCC udah dikangau ex-Menteri Pemansang Rama, Tan Sri William Mawan Ikom, ke mega Presiden SDNU.
Naka diatu, Watson ngidupka diri enggau pengawa ngelatih pelanda pechut nengeri tu nengah klinik pematih. Taja pia, batang pengawa dikereja iya semina bepalasarka kunterik aja lalu ukai nyengala batang pengawa ke tetap.
Watson madah nyema iya terus bekereja enggau SCC, iya besemaya deka bejalaika pengawa ke besai ngagai pemansang kesemua lumba di Sarawak lalu ukai semina ba pemansang lumba 100 meter aja.