Peranak Sarawak patut ngemeranka ulah tu ngambi terus nyadika chunto penyerakup, pengelikun
Dikarang Jacqueline R. David //
KUCHING: Tiap iku peranak Sarawak ke datai ari mayuh pupu bansa enggau pengarap endang patut bebasaka pangan diri lalu tu seiti pekara ke berat ngambika komuniti kitai seruran nyadika chunto ketegal penyerakup enggau pengelikun.
Menteri Pengintu Pengelantang Pendiau, Orang Indu enggau Pengelantang Komuniti, Datuk Fatimah Abdullah madah enti kitai enda beratika semua pemerat nya, tau ngerusak penyerakup komuniti nyengkaum ulah ti mandangka ati ke enda lantang ngagai pangan diri.
Fatimah madah munyinya lebuh nimbal pasal seiku nembiak sekula, 17 taun, antara ke ditangkap raban polis laban dipadah ngemansutka jaku ke bejai ex-Kepala Menter, Niang Datuk Patinggi Tan Sri Adenan Satem ba Facebook.
“Pekara tu enda patut nyadi…Opis Polis Diraja Malaysia (PDRM) udah madahka sida iya enda ngetan nembiak nya, tang diatu bepanggai ba Opis Pelajar Sarawak (JPNS). Nyangka nembiak nya deka diberi kaunseling ari bala pengajar ke alai iya besekula,”ku Fatimah.
Iya madah munyi nya lebuh dirandau pengudah bejadika pengawa nyuaka 30 mija Kardiak ngagai Rumah Seri Kenangan (C/O Palan Pengerai Samarahan) ditu, kemari.
Nembiak ke ditangkap raban polis nya ku Fatimah, seiku nembiak ke dikategori dalam lis LINUS, iya nya program ke nembiak ke bisi penanggul dalam pelajar.
“Taja pan umur nembiak nya 17 taun, iya bedau entu ulih macha, ngira, tang utai ke ngalitka ati, iya ulih nulis jaku nganu pemesai menua ba Facebook iya!,” ku iya.
Fatimah ti mega betanggungjawab pasal pelajar nembiak di menua tu nandu, laban iya agi baruh umur, sekula enda tau enda meri nembiak tu kaunseling, madah ngagai nembiak tu, utai ke digaga iya nya ukai ulah ke manah.
“Kitai enda tau enda bebasaka orang bukai, enda ngira orang nya bepangkat tauka enda, lebih agi bala ketuai menua kitai.
“Enti diperatika gaya jaku baka sida ke udah besai tuai tauka nembiak. Sida enda tau ngembuan ati ke ngempu tanggungpengawa berunding dulu sebedau mansutka jaku ba FB laban pekara iya tau mai penanggul ngagai sida empu.
“Enti atur kuasa undang-undang udah bejalai tauka diambi ba sida iya, baru sida iya nesal, tang maya nesal udah laun.
“Nya alai, anang enda berunding ba semua pengawa ke digaga diri, perundingka pangka iya ngagai diri empu sereta orang ke dituju jaku, sida sebilik sereta komuniti bukai ke enda lantang ati. Lebuh orang enda lantang ati, sida iya tentu ngeripot ulah kitai,” ku iya.
Bedau lama tu tadi, nembiak ke ditangkap polis nya, dipelabaka orang ke bempu akaun FB ngena nama ‘zera zera’ ditangkap ba Mukah urung pukul 10:45 pagi ensana.
Nitihka ripot ari PDRM, mayuh ripot diterima polis bekait enggau penanggul nya, ngujungka penyampau orang ke ditangkap bisi dalam lima iku, lalu deka dipansik nitihka Seksyen 500 Kanun Keseksaan enggau Akta 233 Akta Komunikasi dan Multimedia.
Nembiak ke diripot nya mega bisi udah madahka diri nesal ati ketegal ulah iya nya, lalu ngarapka nya ulih bejera iya.
Naka ensana, urung 40 ripot bisi diterima polis di 12 sitak Pelilih Menua di serata menua sereta tujuh keretas pansik udah dibuka.