PBB mayuh chalun bepenau ungkup DUN Tanjung Datu

0

KUCHING: Kaban Kunsil Nengeri (ADUN) Pantai Damai ke mega ketuai dalam Parti Pesaka Bumiputera Bersatu(PBB) Dr Abdul Rahman Junaidi pechaya parti bisi mayuh chalun bepenau di sitak DUN Tanjung Datu.

Iya ke mega ketuai dalam PBB enggau Menteri Muda Perengka Guna Mensia Mayuh madah kelimpah ari raban ketuai ke senior dalam parti, raban nembiak pan ngembuan penau ke sebaka.

“Kitai ngembuan mayuh ketuai ari raban nembiak ti udah sedia nangkup tanggungpengawa nya enti diberi.

“Semua sida tu sigi angkunka parti lalu sedia nerima perintah ari ketuai dalam parti,”ku iya lebuh dirandau apin lama ke udah.

Pengudah pemidang pemangku DUN Tanjung Datu, Datuk Patinggi Tan Sri Adenan Satem (ex-kepala menteri) kena 11 Januari tu tadi, pengawa bepilih mit disadang diatur enda lama agi dikena ngisi penuduk pengari ti udah ditinggal ex-kepala menteri nya.

Tajapia, Abdul Rahman madah chalun pengari PBB di sitak nya deka ditentu ba aum parti ti disadang deka diatur enda lama agi.

Ku iya, aum engka diatur pengudah timpuh ngulit 7 hari Tan Sri Adenan.

Ensanus, Kaban Parlimen (MP) Santubong Datuk Seri Wan Junaidi Tuanku Jaafar ke nguasa DUN Tanjung Datu enggau DUN Pantai Damai madah parti diatu semina nganti nutis ari Komiti Pengawa Bepilih (SPR).

SPR ku Wan Junaidi deka nentuka maya pengawa bepilih diatur pengudah nerima nutis ari speaker DUN Datuk Amar Mohd Asfia Awang Nassar.