Rumah Seri Kenangan ba Bt 12 dipelaba tembu bulan Jun

0

KUCHING: Renggat kedua pengawa ngaga Rumah Seri Kenangan (RSK) tauka rumah pengandai tuai ba Jalai Batu 12 ke ulih nguan 150 iku orang tuai diatu dipelaba tembu bulan Jun taun tu.

Rumah Seri Kenangan nya ke digaga Opis Kereja (JKR), nukar kuntriktor ke udah dipadu dikena meri pengelantang ngagai orang tuai ke diau dia, nyengkaum ngemanah sukut rumah ke engkeman ungkup orang tuai ti nadai anak ngibun.

Menteri Pengintu Pengelantang Pendiau, Orang Indu enggau Pengelantang Komuniti, Datuk Fatimah Abdullah madah sida ngarapka RSK ke patut tembu taun nyin tadi, ulih tembu lengkas.

Naka diatu urung 77 iku orang tuai ke bisi ba RSK diau benung ngenduh ba Palan Pengerai Samarahan (PPS) ari taun 2012, lalu ngarapka ulih dipindah baru ngagai RSK asal di Batu 12, semak ditu.

Ba PPS ke diatu mayuh perengka guna ke bisi dia enda engkeman diguna sida.

Ba Sarawak bisi dua buah palan RSK dibuka, iya nya di Kuching (77 iku orang nguan) enggau di RSK Sibu (46) lalu RSK di Sibu mega diperambu deka dichat enggau manah.

“Kami ngarapka orang tuai kitai tu ulih diau ba endur ke lantang sereta dijaga enggau manah,” ku iya.

Ba RSK pengudah iya tembu deka disikap enggau dua iku indu misi nyaga pengerai sida.

“Lalu baka nya mega ari sukut runding sereta pengarap, bisi aktiviti pengarap ungkup sida nyengkaum dibai besembiang nitihka pengarap ke dipegai sida sekalika Islam, Kristian, Buda tauka Hindu.

“Aktiviti bukai nyengkaum ngelantangka ati ninga muzik, bekebun, palan macha enggau kafe antara pengawa ke ulih ngelantang sida iya, ngambika sida pan enda seilu-ilu ba RSK, laban kitai pan deka ngasuh sida ngasaika diri diibun manah,” ku iya.

Fatimah madah munyi nya lebuh dirandau pengudah bejadika pengawa nyuaka 30 buah Mija Kardiak ngagai RSK semak ditu kemari.

Ba pengawa nya mega, Chairman Voon’s Xian De Tang Temple, Voon Jan Ham ngarika gerempung nya, bisi meri 30 buah mija kardiak sereta 10 lampit berau ngagai RSK sereta orang tuai ke diau dia.

“Gaya pendiau bansa tu sereta palan ke setipak baka tu digaga ke orang tuai ku aku, Shangrila ke orang tuai,” ku Fatimah ke ngelaluka penemu kompeni peribit tauka orang ke ngatika diri sama tau muka palan ngintu orang tuai .

Sama bisi ngulu pengawa nya kemari, Direktor Opis Pengelantang Pendiau Sarawak (JKMS) Abang Shamshudin Abang Seruji, Sekretari Politik ba Opis Kepala Menteri Sih Hua Tong, Kepala RSK Kuching Dariel Thiong enggau Chairman Voon Xian De Tang Temple, Voon Jan Ham.

Ba pengawa nya mega mija kardiak antara peminta ke pengabis besai ba RSK.

“Mija Kardiak sigi beguna endar laban lebuh diperesa tadi pengelantang pendiau orang tuai dia, nyauka 50 peratusorang tuai dia orang ke enda bepengerai.

“Pemisi mija kardiak ngemuntangka sida makai ba atas katil diri empu tauka lebuh sida duduk ba kerusi ruda, mija kardiak nya mega tau diengkah ba atas kerusi ruda,” ku iya.