Apai indai patut puh meransang anak nyentuk tejapaika pemujur

0

SRI AMAN: Apai indai patut puh merati sereta meri peransang ke bala anak, pia ku Menteri Muda Ekonomi Menua Pesisir (Ulu Sungai) sereta Kebun Bedandang Besai, Datuk Francis Harden Hollis.

Nitih ku iya, mayuh nembiak sekula teulihka pemujur dalam pelajar asil ari pemanah seridi bala apai indai, pengajar enggau piak sekula.

“Nyadi apai indai, kitai patut meri peransang ngagai bala anak nyentuk bala sida nyapai utai ti dikingin ati,” ku iya.

“Pekara ti beguna, lebuh sida udah mujur ila, kitai ke nyadi apai indai patut meri insentif ngagai sida dikena meri semangat sereta peransang ngambika sida mujur agi.”

Iya ke mega Kaban Kunsil Nengeri (ADUN) Simanggang mansutka jaku nya lebuh bejaku bejadi Begunan Ngu Cho Ming enggau Ngelanchar Kelas Elektronik, Sekula Primari Bansa (SJK) Chung Hua Simanggang bepalan ba Begunan Ngu Cho Ming ditu kemari.

Francis nerang, gaya pengidup ke lama iya nya melakangka pekara pelajar patut dilengka, tang bala apai indai patut ngaku pelajar tu pugu besai nempa modal mensia ke mujur, nyulut enggau tebilang rita.

“Nadai penemu mar endar kitai nyapai pemujur. Pelajar tu kunchi nyamin penyenang dudi hari,” ku iya nampung.

Berebak enggau nya, Harden mega meransang bala apai indai patut naruh belanja ungkup guna bala anak dudi hari, kelebih agi maya sida nampung pelajar ba tikas ke tinggi agi.

“Kitai nyadi apai indai patut ngemeranka inisiatif naruh belanja mimit dikena bala anak kita dudi hari berengkah ari diatu. Kitai enggaika enti sema anak kita mujur nampung pelajar ila, sida enda chukup belanja,” ku iya.

“Belanja mimit ke ditaruh nya tentu deka ngelempungka mimit tating belanja mayar yuran pelajar sida seraya nunggu duit jali dikemendar.”

Ku iya nampung, bisi sekeda apai indai enda nganjung bala anak sida nampung belajar ba Institusi Pelajar Tinggi (IPT) perintah tauka peribit enggau dalih enda chukup belanja.

“Enti ulah bekelimat enggau naruh belanja dikemeran kenyau ari suba, kitai pechaya nadai penanggul ngasuh juluk bala anak belajar ba IPT,” ku Harden.

“Belanja ungkup pelajar disempama bala puku diperanak timpuh panjai ti deka ngemai penguntung ngagai bala anak kitai maya besai ila.”

Berebak enggau program nya, Komiti Kaunsil Sekula, Kapitan Kuek Aik Seng, Kepala Pengajar sereta bala staf sekula ke bukai.

Harden mega bisi ngemendarka agih belanja penyampau RM20,000 ungkup Komiti Kaunsil Sekula SJK Chung Hua Simanggang lalu RM10,000 dikena bejalaika aktiviti serakup seraya Kelab Staf SJK Chung Hua Simanggang mega diagih enggau belanja penyampau RM10,000 dikena bejalaika aktiviti ninting taun kelab rambau atur program nya kemari.