Tusun kabinet nengeri patut diubah baru: Peter

0

Sekeda portfolio patut dibagi ngagai ketuai bukai

KUCHING: Sarawak for Sarawakians (S4S) bepenemu dia ubah ba tusun kabinet nengeri patut diadu pengudah Datuk Amar Abang Johari Tun Openg nyadi Kepala Menteri kena 13 Jan tu tadi.

Ketuai S4S Peter John Jaban madah Abang Johari enda patut nguasa kelalu mayuh opis menteri lalu sekeda portfolio patut diserah ngagai ketuai bukai enti iya amat pechayaka tusun kabinet nya.

“Nadai seiku menteri patut ngembuan kelalu mayuh portfolio. Atur tu tau ngujungka pengawa salah guna kuasa nyadi.

“Atur bebagi kuasa enda nyadi enti semua pengawa ditumpuka ngagai seiku ketuai. ketegal nya ubah ba tusun kabinet meseti diadu,” ku Peter nengah seiti penerang berita kemari.

Peter nambah enti Abang Johari amat pechayaka raban kabinet ke diatu ulih ngereja pengawa,iya patut nadai penanggul ngadu ubah nya.

Kelimpah ari nya ku Peter, sapa pechaya seiku ketuai ngembuan mayuh awak enggau pengering ngemujur semua tanggungpengawa enti kelalu mayuh portfolio ditangkup.

“Iya (Abang Johari) patut ngelengka sekeda, nguasa dua opis menteri pan udah chukup mayuh tanggungpengawa, nama agi enti lima.

“Tu mih ke dikumbai kitai diktatorship,” ku Peter.

Kabinet Sarawak nadai ubah pengudah pengawa ngangkat sumpah raban menteri kena Hari Empat tu tadi.

Abang Johari diatu megai portfolio Menteri Pekara Wang enggau Pengatur Ekonomi, Pengatur Penegeraja Asal enggau Rampa Menua, Pengawa Berumah enggau Kandang Menua, Dagang Temuai, Seni enggau Main Asal.

Sebedau ngangkat sumpah nyadi Kepala Menteri Abang Johari nguasa dua bengkah opis menteri.

Nyengkaum nguasa opis kepala menteri, Abang Johari diatu nguasa lima bengkah opis menteri.