KUCHING: Menteri Besai Datuk Seri Najib Tun Razak udah netapka UMNO sigi enda ngerembaika parti nya ke Sarawak, ku Kepala Menteri Datuk Amar Abang Johari Tun Openg.
Nusuika randau iya enggau Najib di Kuala Lumpur malam ensanus, Abang Johari madah pekara nya entara sekeda pekara ke bisi dikerandau seduai.
Ku iya, Najib madah Parti Pesaka Bumiputera Bersatu (PBB) udah tegap di Sarawak lalu nadai kebuah UMNO deka datai.
“UMNO nadai ngembuan pengeran deka ngerembaika parti nya di Sarawak. Ditu udah bisi PBB sereta parti bukai dalam gempung BN.
“Tu mih jaku ke dipansutka iya (Najib) ngagai aku ke alai aku madah ke iya kitai deka nampung visyen Datuk Adenan.
“Kitai nemu, media rama suah ngaitka aku enggau UMNO. Tu kereja sida media rama ti nuduh aku tu UMNO,” ku iya.
Abang Johari mansutka jaku nya ba aum pengarang berita pengudah ngulu aum ketuai Barisan Nasional di Indu Opis PBB Jalai Bako ditu, kemari.
Ba aum pengarang berita nya Abang Johari ke mega Chairman BN Nengeri madah enggau nyemetak seagi iya nyadi kepala menteri, UMNO sigi enda ke Sarawak.
“Tang kitai ngadu kerejasama nengah semengat BN,” ku iya nandu.
Nyaut tanya bukai sentang UPP enggau TERAS, Abang Johari pechaya pekara nya ulih diputar sereta minta diberi timpuh ke chukup.
Bela datai Presiden PRS ke mega Sapit Kepala Menteri Tan Sri James Masing, Presiden SUPP Profesor Datuk Dr. Sim Kui Huan, Presiden SPDP Dato Seri Tiong King Sing enggau orang bukai.