AMP benung ngiga bakat baru dalam bidang lakun

0

SIBU: APAI Music Production (AMP) ke ditumbuh di Sibu benung ngiga bakat baru dalam bidang lakun kena ngemujurka telemovie Iban ke deka datai.

Penerbit ke lalu nyadi pengarah telemovie nya Steven Bana madah, telemovie Iban tu deka nyeritaka pasal nanggam pengerindu lalu disadang dikeluarka ujung taun tu.

“Nya alai, AMP diatu komited ngiga pelakun baru kena ngemujurka telemovie tu. Kami ngiga pelakun indu (heroin), megai watak indai enggau apai sereta pelakun pemantu ngagai hero (lelaki) dalam telemovie tu. Taja pia, pelakun lelaki (hero) dalam telemovie tu udah bisi tang kami enggai madahka nama iya,” ku iya madah ngagai pemberita di Sibu, kemari.

Ku iya, pengawa nguji pengelandik diri bekaul enggau bakat lakun tu dibuka ngagai barang sapa ke minat di serata menua tu.

Tandu iya, sida ke deka masuk pengawa nguji pengelandik tu mesti landik bejaku sereta nemu macha dalam jaku Iban.

“Watak heroin/pemantu hero mesti seiku indu enggau lelaki beumur 18 nyentuk ke 25 taun lalu watak indai enggau apai  lelaki enggau indu beumur ari 35 nyentuk ke 50 taun.

“Pengawa nguji pengelandik tu deka diatur kena 28 nyentuk ke 29 September (Hari Enam enggau Hari Minggu) belabuh ari pukul 9.30 pagi nyentuk ke pukul 4.30 lemai ungkup kededua hari nya. Skrip dikena ba pengawa nguji pengelandik tu deka disediaka kami.

“Atur pengawa nguji pengelandik tu deka diatur ba AMP di No.24, Lorong Wong Ting Hock 1, Pasar Sungai Merah di Sibu. Pesereta ba atur nguji pengelandik deka dipinta mayar RM10 kena mayar yuran enggau ungkus pengangkut, makai enggau ngirup tang bayar endur bemalam ditanggung pesereta nya empu,” ku tandu iya.

Ku iya, maya atur nguji pengelandik tu iya deka dibantu  pemantu penerbit/penulis skrip iya nya Jocky Jim Ungka.

“Semua palan ngambi gambar deka diatur ba serata Sarawak lalu format telemovie nya digaga dalam DVD. Sida ke layak ba pengawa nguji pengelandik nya deka sain kontrak nyadi pelakun dalam telemovie tu,” ku iya.

Steven ngarapka sida ke bisi pengelandik dalam lakun tau ngenataika diri ba pengawa nguji pengelandik tu.

“Tu seiti peluang ke manah ngagai kita. Tu laban telemovie-telemovie Iban diatu mayuh kompeni ngerikut berani nguji ngeluarka nya taja pan iya enda baka pemujur telemovie Melayu.

“AMP ngarapka nengah chara tu kitai ulih ngemajuka telemovie Iban jemah ila baka lagu Iban diatu ke dipeda udah jauh nyingkang. Kitai arapka telemovie kitai maju baka lagu kitai. Nya juluk aku,” ku tandu iya.

Telemovie ke deka datai keterubah dikeluarka AMP ba baruh kemata Syarikat Irama Sibu Sdn Bhd lalu seiti da agi pampang kompeni tu iya nya Swaylin Music Production (SMP) ke aktif dalam pengawa ngeluarka album-album penanyi Iban.

Sebarang tanya tau betelefon ngagai Steven Bana ba lumur 019-8398681 tauka Jocky Jim (013-8260213).