Orang ti ngembuan pemandai sereta peneleba patut magi penemu ngagai sida rebak baru kena nampung pemansang
KUCHING : Kepala Menteri Pehin Sri Abdul Taib Mahmud ngansak sida ti ngembuan pemandai sereta peneleba dalam semua pengawa patut magi penemu sida ngagai orang rebak baru kena nampung pemansang menua tu dudi ila.Ku iya, mayuh bala orang tuai ba menua tu ngembuan pemandai sereta peneleba dalam bejalaika atur pengawa lalu penemu sida patut dibagi ngagai orang rebak baru.
Iya madahka, chara ti baka tu ulih nambahka penemu sereta nambahka agi pemandai sereta peneleba ti dikembuan sida rebak baru diatu nampung pengawa ngemansangka raban bansa enggau menua tu jemah ila.
Ba pengawa ti baka tu orang ti bepemandai tu patut enda ibuh nganti diasuh, tang sida patut ngasaika tu endang tanggung pengawa sida lalu beduaka penemu ngagai bala rebak baru nengah atur diri empu, ku iya.
“Orang ti ngembuan pemandai sereta peneleba patut magika penemu sida ngagai sida rebak baru kena nampung pemansang menua tu jemah ila.
“Nya alai kita enda patut berati deka belelak aja enti nyema deka meda bisi orang bukai nampung pengawa ngemansangka raban bansa sereta menua tu dudi ila,” ku Taib.
Iya madahka menua tu mayuh orang ti pandai ti ukai semina mungkur bidang perubat, enjineer, akauntan, orang landik ekonomi, undang-undang, pengajar aja tang mega mayuh bidang bukai ti tau dibagika ngagai orang rebak baru bekaul pekara tu.
Ku iya, enda pedis bala orang tu ngawakka diri ngiri penemu sereta ngiring ngembing sida rebak baru tu laban pengawa tu endang tau mai penguntung.
“Nengah chara tu dia sida tu mega ulih negapka penyerakup sereta kaul dalam raban bansa ti mega tau mantu ngemujurka pengawa pemansang,” ku iya.
Taib mansutka jaku tu lebuh ti bejadika pengerami Nyambut Jubli Emas SMK Tunku Abadul Rahman (STAR) ba sekula tu kemari.
Sekula tu ti manggai umur diri 50 taun endang ditemu udah mujur ngadaka mayuh orang ti pandai sereta bepangkat besai diatu.
Bisi datai ba pengerami tu iya nya Penaung Gerempung Bekau Pelajar SMK Tunku Abdul Rahman (Old Star), Datuk Daud Abdul Rahman, Menteri ba Opis Kepala Menteri, Fatimah Abdullah, Seketari Perintah Menua, Datuk Amar Mohd Morshidi Abdul Ghani, Presiden Gerempung Old Star, Hajah Salmah Ibrahim enggau Kepala Pengajar STAR, Rakayah Madon.
Taib berebak enggau tu mega ngelalau sida rebak baru ngambika enda sanggu ati nerima penemu ari orang lama tu deka sida ngemansangka diri jemah ila.
Ku iya, nengah chara beambi ulih baka tu dia proses ngiri penemu ngagai sida rebak baru kena nyaup negemangsangka raban bansa dudi ari deka mudah agi dipejalai.
“Nya alai ba pekara tu pemesai budi basa beguna amat,” ku Taib lalu nyimpul jaku iya pasal pekara tu.
Ba pengerami tu dia iya ngungkupka belanja RM250,000 ngagai sekula nya kena ngatur projek pemansang.