Konsep baru ngangkatka rumah panjai

Perintah ngena penemu tuai raban bansa ngarika bala mayuh ngangkatka rumah bansa asal menua tu

KUCHING: Penemu sereta runding tuai pupu raban bansa kelebih agi tuai rumah enggau pengulu ba pekara konsep baru rumah panjai diguna perintah kena ngulihka penemu pengari mensia mayuh ke deka diangkat kena ngemodenka rumah panjai ke nadai muai gaya asal rumah bansa nya.Ku Kepala Menteri Pehin Sri Abdul Taib Mahmud madah meri surat tanah ngagai sida ke diau ba rumah panjai deka nyagi tiap diri sebilik bisi surat tanah lalu tu deka ngemanahka agi penuduk ekonomi sida iya.

“Enti diri sebilik ba rumah panjai nya udah bisi surat tanah, sida iya ngembuan reta tanah ke tau nyidi sida iya orang ke bempu bilik tauka rumah panjai nya.

“Enti bisi surat reta ke udah dikemendarka sida iya muntang agi mutarka lun ba institusi wang kena ngulihka lun kediri tauka nginjau lun rumah kelimpah ari kaba insurans,” ku iya madah lebuh teks jaku iya dibacha ulih Menteri Rumah enggau Pemansang Nengeri Datuk Amar Abang Johari Tun Openg ba atur pengawa muka Seminar Konsep Baru Pemansang rumah Panjai (ke Zon selatan, Kuching, Samarahan, sri AMan enggau Betong) ba ditu, kemari.

Ba timpuh panjai ku Taib, siti-siti reta ke diempu sida iya tau diturunka ngagai anak tauka bala uchu sida iya.

Konsep gaya baru deka ngintu enggau naka ulih gaya ukir tradisi lama kelimpah ari gaya ukir muden ke deka ngemuntangka agi perengka guna teknologi baru ulih digaga ba rumah panjai nya.

“Kena ngeluarka mudal mensia ke bekualiti iya belabuh enggau gaya rumah ke nyamai alai diau, bepengelikun sereta endur pendiau ke bepengerai enggau pemujur. Sebengkah pekara tu patut dikemeratka ba konsep baru tu ila,” ku iya.

Ku Taib, kitai suah ninga rumah panjai angus kena empa api sereta pengerugi beratus ribu ringgit.

“Perintah semina ulih mantu sekeda ari pengerigi nya kena ngurangka penusah rayat. Berindik enggau tu perintah enggau naka ulih mantu rayat ngelepungka agi penusah sida iya lebuh betunga enggau tasah baka tu,” ku iya.

Iya nambah baru, perintah nyerah ngagai rayat empu enti sida iya deka nerima tauka enda konsep baru tu, laban beratika mayuh isu adat rumah panjai ke enda sebaka ke patut dipejuraika.

“Jaku timbal, randau sereta penemu ari semua tuai pupu bansa bumiputera Sarawak sigi diguna kami,” ku iya.

Kelimpah ari nya mega ku Taib, rumah panjai siti pematak ke besai ke orang ari menua luar nemuai ngagai Menua Sarawak laban rumah panjai bempu seni ke nyelaie sereta adat enggau penemu sebansa sida ke diau ba rumah panjai narit temuai ari serata dunya.

“Perintah enggau naka ulih ngintu seni ke lain ari adat orang bukai tu tauka adat ke lama dikembuan sida nyadi pemerat penguntung ngagai Industri Pengawa Dagang Temuai Sarawak,” ku iya.

Ku Taib, tu ulih diperati kitai ba palan penyerakup ba Gagasan 1Malaysia iya nya ‘Keadilan Sosial’ alai semua rayat Malaysia deka diintu lalu nadai siku deka diseliahka. Pengelurus tu enda tau enda ngambi kira tikas pemansang pupu bansa ba tikas ke enda sebaka.

“Nya alai atur perintah sereta ungkup Undang-undang ke ngintu rayat ke sigi begunaka bantu deka tetap diatur,” ku iya.

Sama bisi datai ba atur pengawa nya kemari, Menteri Rumah enggau Pemansang Nengeri Datuk Amar Abang Johari Tun Openg, Menteri Pengawa Rama enggau Urbanisasi Dato Sri William Mawan Ikom, Menteri muda Pemansang Menua Pesisir Datuk Gramong Juna, Menteri Muda Pemansang Tanah Datuk Francis Harden Hollis, Menteri Muda Pengawa Dagang Temuai enggau Menteri Muda Betanam Betupi (Pansik enggau Atur) Mong Dagang, enggau Sapit Sekiteri Perintah Menua ti mega nyadi Chermin Komiti Atur Seminar Datu Abdul Ghafur Shariff.

Iya madah, Gelumbang kedua Pemansang Menua Sarawak ngemeratka pemansang sosioekonomi rayat ke kering sereta dipejalai enggau penuh dalam kandang 10 ngagai 20 taun ti deka datai tu ila kena ngangkatka ekonomi rayat ngembuan penatai pemisi ke besai.

Kelimpah ari nya ku iya, ke baru dibantai enda entu lama tu tadi, Model Ekonomi Baru (MEB) penguntung rayat dikemeratka iya nya baka kualiti pengelantang mensia mayuh ke manah, endur pendiau  sereta pengawa ke likun, perengka guna kena ngulihka pemadah, pemansang ulih diasai ulih semua rayat enda ngira pendiau sida iya, sereta rayat ke meskin seranta sama deka diangkatka.

“Atur MEB berati ngangkatka tikas pemisi penatai semua gerempung ke enda benasit ngayanka 40 peratus rayat menua agi ba tikas meskin ke bempu penatai pemisi kurang ari RM1,500 sebulan,” ku iya.

“Kitai nemu bisi sekeda orang ke bemain enggau isu tanah ke pemerat sida iya empu. Berindik ari nya, iya deka ngerusak penyerakup rayat enggau semina jaku sida ke nadai reti sereta ukai jaku ke amat. Rayat nemu agi gaya pemansang ke udah dibai Perintah, lalu aku ngarap seminar tu deka meri asil ke manah kena penguntung pupu bansa Dayak ke diau ba menua pesisir tauka ba menua ulu,” ku iya.

NINGAKA PENEMU TUAI PUPU BANSA: Johari bejadi seminar konsep pemansang rumah panjai.