Robert Lau orang tau dikarap ngereja pengawa: Awang Tengah

KUCHING: Niang Datuk Robert Lau siku ari tuai ke tau dikarap ngaga kereja enggau penuh tanggung pengawa sereta ngemeratka rayat ari diri empu, pia ku Menteri Pengatur Pemansang Pemansut Pengereja Asal Kedua, Datuk Amar Awang Tengah Ali Hasan.

ROBERT LAU

Awang Tengah madahka, pemarai Lau endang pengerugi besai ngagai orang mayuh sereta menua tu laban iya mayuh mai ubah enggau pemansang kelimpah ke nyadi bakih.

“Lebuh ke gawa iya (Lau) amat serius lalu bebendar kena nentuka tanggung pengawa enggau kereja iya dipejalaika pengabis manah.

“Lau ke nyadi Chermin Majlis Perbandaran Sibu dataika nyadi pengari rayat amat bisi pengelandik nyadi tuai  laban ulih ngubah sereta pemansang ngagai menua Sibu,” ku iya.

Awang Tengah mansutka jaku nya ngagai bala pemberita udah tembu bejadika Hari Diri sebilik Radio Televisyen Malaysia (RTM) Sarawak beserimbai enggau ngintu pengada RTM ke manggai umur 60 taun ba RTM ditu kemari.

Ku Awang Tengah, Lau ti senang bebakih tauka begulai enggau orang enda ngira bansa ke lalu mai iya bulih sukung ke pemadu manah ari rayat ngujungka iya ulih lama nyadi pengari rayat.

“Niang siku ari tuai ba Sibu ke bisi wawasan sereta amat rajin tauka aktif,” ku iya.

Ngenang penudi endar betemu enggau Lau, Awang madahka, iya betemu enggau ninag lebuh maya ngintu pengerami Taun Baru Cina apin lama ke udah ba Sibu.

“Dua hari udah nya, niang datai betemu enggau aku ba Kuching ketegal deka ngemutarka penanggul ke bekaul enggau pemasang sekula ba Sibu.

“Niang amat serius lalu amat keran deka meda projek ti dipejalaika iya dikereja dataika tembu,” ku iya.

Lau nyadi Sapit Menteri Pengawa Pengangkut ti mega Kaban Kunsil Sibu pengelama lima penggal berengkah ari taun 1990 udah nadai ba rumah iya di Kuala Lumpur pukul 11.10 pagi hari lima tu tadi udah iya ti sakit raya ketegal riman ati ke udah lama ‘mangka’ iya.

Hari Diri Sebilik ke diatur RTM dipejadika Awang Tengah lalu ba pengerami nya bisi 34 bengkah palan mantaika barang,  lalu ari penyampau nya 14 bengkah palan ejensi perintah, kelebih ari nya bala dagang Lembaga Pemasaran Pertanian Persekutuan (FAMA).

Awang Tengah mega bisi bejalai ngagai semua palan ti mantaika barang lebuh pengerami Hari Diri Sebilik RTM kelimpah ti nyuaka Skim Galakan Pelajaran.

RTM ngatur mayuh bengkah pengerami enggau pengawa iya nya Treasure Hunt, dart 64, Bola Jaring, Boling Kelapa enggau kebukai sereta bisi ngagauka bala pemerindang (penyanyi).

Ngenang pekara pasal tanah, Awang madahka orang mayuh ke bisi tanah pesaka (NCR) patut bejimat ngambika enda kena panjuk gengster ti semina ngambi untung.

Menteri Pengatur Pemansang enggau Pemansut Pengeraja Asal, Datuk Amar Awang Tengah Ali Hassan madahka, tu kena nyeliahka orang ke bisi tanah NCR ari kena tipu bala gengster ti mejal sida nyual tanah sereta nguji bambi ulih tauka untung.