Anang alah kena pejal gengster

KUCHING: Orang mayuh ke bisi tanah pesaka (NCR) patut bejimat ngambika enda kena panjuk gengster ti semina ngambi untung.

Pansik dulu sebedau nyual tanah tauka kunsi gawa enggau orang

MALIK KITU MAGANG: Awang Tengah diberi pemadah baka ni gaya ngena kamera udah bejadi Hari Diri Sebilik RTM, kemari.

Menteri Pengatur Pemansang enggau Pemansut Pengeraja Asal, Datuk Amar Awang Tengah Ali Hassan madahka, tu kena nyeliahka orang ke bisi tanah NCR ari kena tipu bala gengster ti mejal sida nyual tanah sereta nguji bambi ulih tauka untung.

“Kitai enggai meda sida ke bisi tanah NCR kena pejal sereta kena tipu, nya kebuah kitai ngingatka sida tu seruran bejimat lalu mansik enggau silik sebedau nyual tanah ngagai orang.

“Tuju nya ngambika sida enda kena tipu orang ke nadai pemereti ati laban gengster nya nguna chara ke enda betul ngulihka penguntung kelimpah ari beduan (memanipulasikan),” ku iya.

Awang Tengah mansutka jaku nya ngagai bala pemberita udah tembu bejadi Hari Diri sebilik Radio Televisyen Malaysia (RTM) Sarawak beserimbai enggau ngintu pengada RTM ke manggai umur 60 taun ba RTM ditu kemari.

Lebuhka ditanya berapa mayuh kes ke bisi ditemu, Awang Tengah madahka, sida (perintah menua) bisi nerima berapa iti ripot ari orang ke bempu tanah.

“Kami bisi nerima berapa iti ripot ke madahka sida kena tipu tauka kena pejal nyual tanah sida,” ku iya ti enggai nerang enggau panjai madahka chuto kes ke baka nya bisi nyadi ba sekeda endur di Bekenu.

“Kami semampai ngemata sereta ngemeratka pekara tu, kena nyeliahka penanggul tu ngambika orang ti bempu tanah pesaka enda mudah kena tipu,” ku iya.

Hari Diri Sebilik ke diatur RTM dipejadika Awang Tengah lalu ba pengerami nya bisi 34 bengkah palan mantaika barang, lalu ari penyampau nya 14 bengkah palan ejensi perintah, kelebih ari nya bala dagang Lembaga Pemasaran Pertanian Persekutuan (FAMA).