Sarawak Hun Nam Siang Tng meri pemeri gawai

KUCHING: Sarawak Hun Nam Siang Tng meri pemeri gawai ngagai 53 orang ti enda bidik lansik beserimbai enggau nyambut pengerami Gawai Dayak taun tu.

Tia iku sida tu diberi barang pemakai tiap hari ti beungkus RM350.

Entara barang nya ia nya minyak kachang, telu, roti, tepung, garam, gula, manok sereta barang bukai ti dikena nyambut gawai.

Kelimpah ari nya sida tu mega nerima mata duit RM50 tiapa iku.

Sapit Kepala Menteri, Datuk Patinggi Tan Sri Alfred Jabu anak Numpang udah nyuaka pemeri tu ba pengeramai ti diatur ba Dewan Rama Dato Tay Thian Siong ba palan gerempung tu kemari.

Jabu ba pengerami tu mega bisi ngungkup belanja RM10,000 ngagai gerempung tu kena ngatur program pengintu pengelantang ia.

Gerempun diatu bisi meri tulung ngagai 385 iku orang  ti enda bidik lansik tiap bulan.

Jabu lebuh ti bejaku ba pengerami tu madahka pengaga ati diri meda gerempung tu ti enda nemu leju meri tulung ngagai orang ti seranta kenyau ari ia ditumbuhka lebih 15 taun ti udah.

Enggau tu dia iya arapka semua gerempung pengintu pengelantang ba menua tu terus bejalaika tanggung pengawa rama sida.

Ku iya, perintah amat beterima kasih ngagai semua gerempung ti baka tu di menua tu laban sida ngembuan penyiru lalu enda bansu mantu orang ti kurang penatai pemisi.