SIBU: Bekau Sapit Chermin Palan Meri Servis Ngagai Rayat enggi Parti Sa’ati Rayat Sarawak (SUPP) Seduan Dato Hii Hua Seng madah kediri diatu enggau Parti Progresif Penduduk Malaysia(PPP).
Penerang nya dipadah ngagai pemberita kira udah tiga minggu iya ke udah pansut ari SUPP.
Hii ke lalu dipadu nyadi raban Majlis Tertinggi PPP Malaysia sereta Chermin pampang Dudong mansut ke pekara nya maya aum media, kemari.
Ku Hii, iya enggau PPP laban parti nya siti ari pati Barisan Nasional.
“Aku udah ngadang kitak (pemberita) segi deka nanya pekara baka tu…aku semina madah PPP siti ari parti meri servis ngagai semua pupu raban bansa ba menua Malaysia,” pia ku iya.
Ku iya, pengawa parti nya ti meri pengelantang ngagai semua pupu bansa ba menua tu beserimbai enggau rambai jaku 1 Malaysia baka udah ditengkebang Menteri Besai Malaysia Datuk Seri Najib Abdul Razak.
Maya nya mega, Presiden PPP Datuk M Kayveas lebuh ditanya (nengah talipaun) madah, pejalai pemujur parti nya bepangai enggau pengingin rayat ba menua tu.
Iya mega madah, PPP udah nyikap diri ba pengawa mantu perintah BN ba menua tu kena napi pengawa bepilih besai apin lama agi.
PPP udah numbuhka pampang sida ba Sibu baka Bukit Assek , Bawang Assan, Lanang enggau Pahlawan.
Nitihka lis diatu, PPP ngembuan kira bisi 8000 iku raban ba serata menua tu.