Program Sejiwa Senada, langgur penemu perintah
June 26, 2010, Saturday
BINTULU: Sitak Bintulu deka ngatur siti program ti ulih ngerakup semua bansa nitihka konsep 1Malaysia iya nya ‘Program Sejiwa Senada’ ti deka diatur kena 2 Julai ngagai 4 Julai ba Padang Bilun Lama Bintulu ditu.
ANANG ENDA DATAI: Razali (dua kiba) maya bejaku enggau raban media ba Opis Residen Bintulu.
Pengerami nya disadang deka dilancharka Kepala Menteri Sarawak, Pehin Sri Haji Abdul Taib Mahmud kena 3 Julai urung jam 10 pagi.
Nitihka penerang ari Direkta Opis Pemansang Orang Gawa sereta Kualiti, DR Razali Abon madahka atur nya siti ari palan dikena raban ejensi perintah menua sereta perintah besai ngenataika mayuh macham penerang senentang tanggung pengawa enggau tuju ejensi ngagai rayat ba menua tu.
“Program Sejiwa Senada deka diatur pengelama tiga ari ba Bintulu. Lalu tuju atur nya cukup manah laban nitihka konsep 1Malaysia: Rakyat didahulukan, Pencapaian diutamakan,” pia ku iya bejaku maya sidang media ba Opis Residen empai lama.
Ku iya, tuju atur program Sejiwa Senada dikena mandangka atur pengawa ti ulih mantu rayat ngejampatka proses pengawa perintah, pia mega nyediaka ‘One Stop Centre’ ngambi ulih meri atur pengawa ti lengkas ngagai rayat sereta ulih meri kaul ti terit entara perintah enggau rayat.
Kelimpah ari nya, atur Sejiwa Senada mega nyediaka mayuh macham program ngagai rayat menua tu, ketuai raban mensia mayuh, nembiak sekula, raban kereja perintah enggau mayuh agi. Entara program ke bisi diatur iya nya main lumba enggau reakreasi, pameran, licha, pemerindang ati sereta mayuh macam pekit bisi diatur.
“Enti ulih aku deka meda semua raban orang Bintulu ngenataika diri ngagai pengerami nya ila laban lebih ari 200 iti kedai bedagang bisi ngambi bagi ba pengerami nya.”
“ Pia mega, ngarapka orang Bintulu sama bela ngambi bagi ba mayuh macham lumba ke bisi diaturka,” pia ku Razali bejaku baru.
Penerang ti silik senentang orang ke deka minta lisin bedagang maya pengerami nya ila tau talipaun ngagai Wan Ibrahim Wan Ali (BDA) ba lumur 019-8851058. Pia mega, ngagai raban orang deka ngambi bagi ba lumba main tau talipaun ngagai Opis Tanah enggau Survei Bintulu, Ajmaen Superi tauka Raymond Tan ba lumur 086-318255. Hari penutup deka enggau ngambi sebarang pekit tu iyanya kena 30 Jun 2010.
