RM69.3 juta kena ngemansangka menua Miri
June 26, 2010, Saturday
Penyampau tu nambah ngagai RM14 juta enti dibanding enggau RM55.1 juta taun 2009
MIRI: Penyampau RM69.3 juta deka diagihka kena ngemansangka Bandaraya Miri taun baru enti dibandingka enggau RM55.1 juta duit agih ke bisi taun tu.
Penyampau nya bisi nambah RM14 juta ari taun tu.
Bepelasarkaka ripot bajet ninting taun MBM ungkup taun 2011, penyampau belanja RM69.3 juta diguna kena bejalaika projek-pemansang ba Miri nyengkaum pengawa ngangkatka mayuh bengkah perengka guna mensia mayuh enggau pemanah rampa menua, dibandingka enggau penyampau RM55.1 juta taun nyin kemari.
Belanja ke besai endar MBM diungkupka kena ngaduka jalai, parit ampuh bah, pemanah rampa menua, meresi kandang pasar, lampu jalai sereta nguruska uras.
Serebak enggau nya, MBM nagit tebulihka penatai pemisi RM4 juta taun baru.
Taun 2011, MBM ngarapka bulih RM70.9 juta dibanding enggau RM66.5 juta taun tu tadi.
“Kami agi meresa sereta ngatur ripot bajet nya sebedau nganjung nya ngagai KASKA (Opis Rampa Menua enggau Pengerai Mensia Mayuh).
Kami agi bisi timpuh sebulan kena mansik baru bajet nya,” ku Datuk Bandar Lawrence Lai.
Lawrence bejaku munyi nya ngagai media udah bekau becherminka aum penuh raban MBM ditu, kemari.
Ngenang pengawa ngangkat sereta ngemanahka pasar enggau tamu ditu, Lawrence madahka, duit agih RM1.3 juta udah dikemendarka.
Duit turu nya deka dikena ngangkatka lapan iti pasar enggau tamu ditu nyengkaum, ngeripir Central Market dipelabaka beungkus RM370,000, Tamu Muhibbah enggau Tamu Khas (RM50,000), Unity Market (RM35,000), Pasar Minggu Saberkas (RM200,000), Lutong Market (RM110,000), Taman Seroja (RM250,000), Taman Tunku (RM80,000) enggau Morsjaya (RM60,000).
Penyampau RM100,000 digalau sereta deka diguna nyadi duit maya tasah (dana kecemasan) pengawa ngeripir sereta dikena maya ti beguna aja.
“ Duit agih udah dikemendarka lalu kitai semina nganti projek tu dipejalaika taun tu.
Projek ngeripir sereta ngangkatka pasar minggu Saberkas nyengkaum parit enggau letrik ngambika pengelantang orang bedagang dia ila sebedau bulan puasa berengkah,” ku iya.
