Enti iya ukai Kumang ari Panggau Libau, semina ngerasukka ngepan Iban nya ke dikumbai Kumang Menyarung
NGEPAN KUMANG IBAN KE BETUL: Udah tu ila, bala indu kitai Iban ke deka enggau bepekit anang enda berati ke chara enggau tusun ngepan ke betul. Ukai nya ta tau dipasukka tua sebarang. — Gambar diberi Opis Kunsil Penyimpan enggau Penusun Adat Asal Menua Sarawak
KUCHING: Konsep ‘Kumang’ kemaya diatu hari nyau nyadi ‘kebuah’ tauka batang randau ari tiap renggat kitai bansa Iban ke bela meri mayuh macham timbal ari serata menua Sarawak kelebih agi maya nyau deka semak enggau pengerami Hari Gawai laban maya pengerami hari besai baka nya mayuh macham pekit mantai ke pemajik ti bisi diatur, lalu ketebal agi nya pekit ‘Kumang Gawai’.
Leka jaku Kumang tu sudah endar disemaka enggau indu ke ngembuan gamal ke pemadu bajik lalu landik dalam semua macham pengawa baka betenun, ngebat, nganyam, enggau mayuh macham pengawa bukai ke sigi dikereja indu kitai Iban dulu kelia.
Kelimpah ari nya, iya sigi alai orang bukai belajar, endur orang betanya, ngulu ke orang tuai lalu ‘Kumang’ tu mega indu ti pemadu beberita sereta tampak nama.
Ukai semina bajik tang mega nemu lalu landik gawa sereta ngembuan ulah ke manah. Nya alai ari ‘Kumang’ tu meh kitai Iban endang ari dulu kelia suah endar besema ke indu ke bajik sereta tampun puji nya baka ‘kumang’.
Tang kemaya hari itu reti pemai nama ‘Kumang’ tu bisi nyibil mimit. Nama kebuah, laban reti ‘Kumang’ kemaya hari tu semina disema ke ba pemajik indu nya aja. Nya ke lalu ngujung ke pekit pemajik orang indu maya pengerami Hari Gawai lalu dikumbai ‘Kumang Gawai’.
Tang bakani ke pemai diri sida iya, kelebih agi mantai ke pemajik diri ba atas panggau. Bakani enggau pengelandik?
Enti kelia suba pengelandik Kumang sigi disema ke enggau pengelandik iya gawa baka betenun, ngebat, nganyam enggau mayuh macham pengawa indu Iban ke bukai, tang kemaya hari tu pengelandik tu disema ke enggau pemandai tauka pengelandik runding orang indu, ke selalu diuji nengah pengawa betanya saut, maya ke bepekit tu.
Lalu hari nya dia bala akim ulih nentuka sapa bagi ke patut nangkup gelar ‘Kumang Gawai’.
Tang taja pia, munyi ke dipadah ba atas tadi, pengerami pekit ‘Kumang Gawai’ tu nyau udah nerima mayuh macham timbal ke mayuh agi nya sida nya enda senang ati enggau atur pekit ‘Kumang Gawai’ kemaya hari tu, ke lebih agi enti orang ke enggau masuk pekit nya ukai nyelan indu Iban, nyau bansa bukai nyengkaum sida ke penakan. Orang ke patut enggau bepekit tu iya nya patut tulin indu Iban laban Kumang tu ga sigi indu Iban lalu enggi bangsa Iban ukai diungkup ke kitai ke bansa bukai.
Kena nentuka ke pekara tu, Berita Iban kemari bisi betemu sereta nanya Penulung Pemesai Pemansik Pengawa Rama ari Opis Kunsil Penyimpan enggau Penusun Adat Asal Menua Sarawak, Jimbun Tawai.
“Enti nitih ke jerita tuai tauka ensera kitai Iban, Kumang tu mayuh orang madahka iya anak Bujang Sebalu Ngenang, lalu diri menyadi enggau Tutong.
Lalu Tutong tu Tuai Rumah orang di menua Gelong. Menua Gelong Batu Nakung tu ku jerita tuai, bepenuduk ba sungai mit Batang Gelong ke bepampangka ai Batang Panggau ba menua Panggau ke alai sida Tutong menyadi diau.
“Nyadi gamal kumang tu enda ulih disemaka kitai mensia laban badas agi kitai, iya ga badas agi,” ku iya. gEnda jauh nyema, baka kitai ke ngagai emperaja tauka jaku orang kemaya hari tu – ‘mengejar pelangi’. Kebuah pia laban iya udah nyadi siti ‘idealism’ dalam pengidup kitai Iban maya nya menya.
“Pengidup semua bansa di dunya tu bisi idealism kediri empu, ideal soceity sida iya. Ambika banding baka sida orang putih, ‘idealism’ sida iya ke hidup rambau Robin Hood kelia. Nya alai sida iya mayuh ‘fairy tale’ pasal jerita raja-raja sida iya. Ambika sekeda chunto cerita Cinderella, The Princess and the Frog, Snowhite and Seven Dwarfs enggau mayuh cherita ‘fairy tale’ bukai. Nyadi ba kitai ‘Fairy Tale’ tu ke ensera, ku kitai Iban,” ku iya.