MIRI: Pengawa raban pengundi kelebih agi ari raban parti penyakal, ti mantah perintah enggai nurun ngundi maya bepilih nya semina ngemutanka pemansang ngagai rayat menua tu aja. Tuai Parti Keadilan Rakyat (PKR) Sarawak, Baru Bian bejaku madahka mensia mayuh patut ngena peluang sida milih chalun tauka parti ulih dikarapka sida.
“Rayat patut ngundi laban nya hak sida. Pengawa mantah enggai datai ngundi ukai chara ti manah tang nya meri besai pengerugi ngagai semua,”
“Ngelarika diri ari nama macham pekara tauka isu pen enda manah lalu aku madah ngagai mensia mayuh datai nurun ngundi,” ku iya nerang lebuh ti tanya senentang pekara nya kemari.
Baru madahka agi, rayat ngembuan runding milih perintah ti deka dipilih sida lalu sida patut nurun ngundi.
Bisi berita sebubu ngapa madahka raban pengundi ti udah ngerijista ari menua pesisir lalu diatu diau ba bandar enggai nurun ngundi kena nanda sida mantah sereta enda kibuh enggau penuduk ba menua sida.
“Enti pekara tu amat nyadi, nya endang enda manah kelebih agi ngagai pemansang dunya politik ba menua kitai,” ku iya.
Baru ti deka bediri ba penuduk Ba’kelalan madahka, bisi 30 persin pengundi ti udah ngerijista diri ba sitak nya diatu bekereja ba nengeri.