Najib ngelalau nembiak rebak baru nguna bantu sekula enggau manah

KUALA LUMPUR: Menteri Besai Datuk Seri Najib Tun Razak kemari minta nembiak rebak baru ba menua tu ngena awak ti disediaka perintah ngambika maju dalam pelajar sekula sereta ulih nyapai juluk ati sida.Iya madahka perintah udah bejalaika mayuh macham pekara sereta ngatur mayuh bengkah perambu bukai ngambika sida nyamai agi nyapai juluk ati sida.

Ku iya reti mayuh macham pekara ti dipadahka iya nya nyengkaum scholarship ari Opis Gawa Perintah ngagai sida ke bulih pemutus ti manah ba peresa Sijil Pelajaran Malaysia (SPM).

“Pemutus nya udah digaga enda ngira bansa Melayu, Cina, India tauka ari raban pupu bansa bukai – semua nembiak ti tebulihka 9A+ tauka lebih patut nerima scholarship.

“Perintah tu semampai sinu sereta siru enggau utai ke diguna rayat ba sebarang endur lalu aku bisi endar pengarap ati sereta setuju enggau peluang bepelasarka merit tu mandangka aku enggau bala kaban aku endang sigi bebendar ngatur ubah pemansang, sebaka enggau konsep 1Malaysia,” ku Najib dalam blog iya, www.1malaysia.com.my.

Taja pan baka nya, Menteri Besai nya madahka polisi meritokrasi nya patut dipejalaika sebaka enggau polisi enda bechiping ati lalu bala nembiak ti tebulihka pemutus kurang ari 9A+ ketegal kurang benasit ari segi sosioekonomi, mega deka dibantu nampung pelajar sida.

“Ambika chunto, siku nembiak ke seranta diau ba genturung pendiau ti enda chukup manah, tang tebulihka pemutus ti manah taja pan gaya pendiau iya baka nya.

“Laban iya mandangka pengelikun ati sereta pengering semengat nyapai pemar pengidup ke baka nya, nya alai nembiak tu patut diberi bantu nampung pelajar ngagai tikas ke tinggi agi. Berindik ari nya, beberapa bulan ti udah aku ulih meda beberapa iti geran diberi ngagai nembiak ti diau ba Tumpat, Long Banga, Kanowit, Brickfields enggau Putrajaya, lalu nya semina beberapa iti chunto,” ku iya.

Beberapa iti pekara bukai ti deka dipejalaika, nundaku Najib, deka diperatika iya enggau silik ila.

Menteri Besai nya mega madahka asil ti diulih ari pengawa bekelimat sereta nusun baru sabsidi apin lama ti udah deka dikena nyediaka mayuh agi peluang alai belajar.

“Ngagai sida ke biak ti bisi macha pekara ke ditulis tu:guna meh peluang tu kena ngemujur kediri.

Tu meh manifesto ke chukup terang lalu kami sedia deka nulung kita. Kami deka meda kita mujur,” ku iya.

Tulis Najib: “Kami ninga utai guna enggau peminta apai indai kita nengah blog tu lalu udah muka jalai ke besai alai kita ngemujur ke diri ba bidang akademik. Aku minta kita nguna peluang tu kena nyapai juluk ati kita .”

Najib mega minta apai indai enggau pengajar ngambika “ngiring sereta ngansak nembiak rebak baru ngulihka juluk ati enggau bebendar”.

“Jaku tangkan, sida ke mujur tebulihka gred ti tinggi deka diberi pemeri lalu anang ngasuh sida iya lemi semengat. Pelajal sekula berengkah ari rumah,” jaku tulis iya. — Bernama