Mensia mayuh ba Pujut minta MBM ngatur program fogging

0

MIRI: Mensia mayuh ba genturung pendiau Pujut minta Kunsil Kandang Nengeri Miri (MBM) ngatur program nyembur kena tagang nyamuk aedes betelu ba endur nya.Sida madahka ai enggau uras ti tepagang ba parit tau bendar nyadika endur nyamuk tu betelu.

“Mayuh bendar parit ba kandung menua tu alit  laban sida kontrekta ti ngadu pengawa meresi parit semina bejalaika pengawa nya seminggu sekali nya ke kunjungka ai enggau uras tepagang ba parit tu,” ku sida.

Siku urang driba ti ditanya pasal pekara tu madahka, maya musin pengujan tu nambahka agi penusah tu.

“Kami ngarapka urang ti bekaul enggau parit tu tau ngatur program nyembur asap kelebih maya lemai hari kena ngurangka nyamuk ba endur tu,” ku iya mansutka sebana ati diri pasal pekara tu.

Sida sinu amat ati laban naka kediatu aktiviti nyembur asap tu semina dipejalaika urang ti bekaul enggau pengawa tu ba endur ti ditemu mayuh agi kes denggi.

“Amat meh mensia mayuh ba kandang menua tu ngatika diri meresi kandang menua sida, tang enti bisi aktiviti nyembur asap diatur ditu ia tau ngelempungka agi penusah tu.

Sebedau tu, Kaban Kunsil Nengeri Pujut, Andry Chia madahka nyamuk aedes udah mujur dipunaskan ba genturung pendiau ba Pujut Corner

Beserimbai enggau nya iya ngelalu mensia mayuh ba genturung pendiau tu awakka nentuka pemeresi kandang menua diri empu.

Dalam jaku iya rambau tu, iya minta mensia mayuh bebuaika tin kusung, taya entuka, butul enggau uras kena nyaga pemeresi lalu nyeliahka nyamuk besarang.

Seninjik enggau tu, nitihka diperati Utusan Borneo bisi sekeda urang ba kandang pendiau tu enda tentu pedulika pemeresi kena nagang nyamuk aedes.

Bisi sekeda kandang rumah sida agi bebabas sereta parit alit laban uras ti tau bendar endur nyamuk betelu.