Pengawa perintah diatu mayuh bepanggai ba ICT

Rayat mayuh di menua tu dilalau anang tinggal ari ngembuan penemu dalam ICT : Dr Chan

KUCHING: Chara mutarka atur pengawa perintah diatu mayuh bepanggai ba bejalaika pengawa sida iya nengah Teknologi, Komunikasi enggau pemadah (ICT) ke udah nyadi pekara ke suah dikena kemaya hari tu.Berindik ari tu, Perintah Menua mega mayuh ngeluarka belanja ba pekara ngemansangka sistem perintah elektronik ke sama tikas enggau stindit dunya.

Sapit Kepala Menteri Datuk Patinggi Tan Sri Dr George Chan Hong Nam madah, ambika chunto baka portal e-government Sarawak udah mujur dipejadika berindik ari taun 1995 kena  ngerapitka agi tikas digital entara mensia mayuh, pengawa dagang enggau perintah tauka nyadi entara perintah enggau mensia mayuh tauka pengawa dagang.

“Diatu portal e-government Sarawak mansang nyadi siti palan penatai ke tau alai mensia mayuh beratika e-recruitment, alai mayar bil nengah e-payment, portal MyOneStopSarawak (eMOSS) ke tau alai sida iya tama ngagai ruai siber perintah ngagai orang mayuh, beratika surat perintah enggau dokumen nyengkaum E-DUN.

“E-DUN siti ari sistem ruai siber elektronik ke tau alai kaban kunsil nengeri mantaika tanya enggau saut sida iya nengah ‘online’. E-DUN mega palan alai rayat menua Sarawak ngulihka pemadah pasal pejalai aum Kunsil Nengeri (DUN) nengah ‘online’. Pelaba aku menua Sarawak entara menua keterubah ngena sistem baka tu ba menua tu.

“Pemanah sistem tu laban iya ngayanka ADUN tauka wakil rayat kitai ba menua tu beterang ba tiap pekara ke dibantai sida iya ba DUN,” ku iya.

Iya madah bansa tu maya bejadika Turbo 3G DiGi Internet Servis, produk keterubah ti diatur ulih DiGi Telecommunications Sdn Bhd (DiGi) ba pasar besai tHe Spring ditu, kemari.

Kelimpah ari nya mega, Dr Chan madahka orang mayuh ke begunaka broadband nyadi siti pekara ke berat ngangkatka menua tu besemekih enggau menua bukai lalu mantaika peluang pengawa ke manah sereta pengelantang mensia mayuh ke bekualiti.

“Kena ngangkatka status sosio-ekonomi menua tu, kitai patut ngemanahka agi pemansang mudal mensia sereta terus ngemansangka generasi baru rayat Sarawak ke bepenemu, ulih besemekih sereta muntang diubah kelebih agi ba pengawa ngemansangka pengguna komunikasi internet,” ku iya.

Iya nambah baru, Pemadah enggau Komunikasi pekara ke berat kena ngemanahka produktiviti sereta penyampat tiap atur pengawa ba siti-siti menua.

“Nya alai, kena ngemanahka agi pemansang internet, pejalai broadband ba menua tu pekara berat ba agenda menua Sarawak.

Mensia mayuh ke ngena internet kemaya hari tu ukai pekara ke semina dikena sekeda orang aja, tang iya nyadi pekara ke berat ba pendiau kitai tiap hari, baik iya kena pengawa dagang, kena ngulihka penemu tauka chara komunikasi siku-siku enggau diri sebilik tauka enggau bala pangan.

“Chara orang dagang kemaya hari tu pan makin jampat laban ulih ngena internet, lalu ulih kena mutuska sebarang pemutus ke deka dikemutarka sida iya. Laban infrastruktur komunikasi kemaya hari tu makin maju nyengkaum rayat kitai ke nyau makin bepenemu sereta bepengelandik deka ngulihka pemadah enggau naka pengelengkas,” ku iya.

Nya alai, ku Dr Chan kompeni besai baka DiGi ke ngerembaika dagang sereta mantu ngemansangka menua tu bempu servis internet ke bekualiti deka mai menua tu ngerapitka agi tikas digital broadband ngagai 50 peratus sebedau ujung taun tu.

“Aku mega temegah hati laban kurang ari setaun tu ke udah, DiGi bejadika Turbo 3G lalu diatu kitai udah ngasaika servis tu ba Sarawak belabuh ari Kuching dulu,” ku iya.

Kelimpah ari nya, DiGi mutus deka melabur ngemansangka servis komunikasi DiGi ba menua tu dalam kandang tiga taun tu ila.

“Aku ngarapka DiGi deka terus ngemansangka rayat Sarawak enggau servis internet ke bekualiti ke disukung ulih Turbo 3G, ke deka ngenyadika mayuh agi orang ke deka ngemansangka sida iya empu enggau chara teknologi muden baka tu,” ku iya.

Sama bisi datai ba atur pengawa nya, Sapit Menteri Pemadah, Komunikasi, (Kesenian) enggau Adat (Kebudayaan) Datuk Joseph Salang Gandum, Ketuai Pegawai Eksekutif DiGi Johan Dennelind, Ketuai Suruhanjaya Komunikasi enggau Multimedia Sarawak Zulkarnain Mohd Yassin enggau Ketuai DiGi Sarawak Benny Wee.