Rohani ngasai opis menteri ke baru dipegai iya patut beratika baru isu bansa Penan lebih agi ke bekaul enggau tuduh pasal sekeda orang indu bansa nya udah dipenyati.

“Tajapan isu Penan tu udah diputar bedau lama tu tadi tang raban ari PKR mengkang ngungkit pekara ke sama dikena nyarut runding aku.

“Raban pemesai ari opis menteri udah begulai enggau bansa Penan pengelama seminggu ngambika tau mereti enggau dalam penanggul sereta pemar ke ditapi sida.

“Aku mega udah minta pemesai opis menteri mantaika atur ti udah dikereja dikena ngintu pemaik enggau pengelantang bansa Penan ngambika ditemu bala mayuh. Taja pia aku deka beratika baru isu tu enggau dalam sereta silik,” ku Rohani.

Iya mansutka jaku tu lebuh dikerandau pemberita pengudah betemu enggau Kepala Menteri Pehin Sri Abdul Taib Mahmud ba Indu Opis PBB Jalai Bako ditu, kemari.

Ku iya, perintah angkun nentuka nadai sebarang raban bansa ti nguan menua Malaysia dipejera, dipenyati sengapa lalu tanggungpengawa nya deka ditangkup enggau bebendar.

Bejaku ngenang pengawa iya sereta sekeda raban menteri ke baru dichiri ti betemu enggau Taib, Rohani madahka kepala menteri udah meri jaku lalau ti chukup manah ngagaui sida seraban.

“Taib minta kami seraban nyadi menteri ungkup semua peranak Malaysia. Taja pia iya (Taib) mega minta kami enda ngenudika pinta rayat di Sarawak.

“Sarawak unik ari negeri bukai, lalu enda sebaka enggau sekeda nengeri di Semenanjung ti udah jauh mansang. Taib madahka mayuh pekara di Sarawak enggau Sabah ti begunaka perening enggau runding ari kami seraban ke nyadi menteri,’ ku Rohani.

Entara menteri baru ke dipeda betemu enggau Taib kemari iya nya Menteri Industri Betanam Betupi enggau Komoditi Dato Sri Douglas Uggah Embas, Menteri Kereja Raya Datuk Fadillah Yusuff, Menteri ba Opis Menteri Besai Nancy Shukry, Sapit Menteri Dalam Menua Datuk Wan Juanidi Tuanku Jaafar sereta Sapit Menteri Pemansang Menua Pesisir enggau Kandang Menua Datuk Alexander Nanta Linggi.

Menteri Kereja Raya Datuk Fadillah Yusuff netapka opis menteri ti dipegai iya setipak enggau pelin pemansang infrastruktur menua Sarawak ti bekaul enggau manifesto perintah Barisan Nasional (BN).

“Aku ngarika BN Sarawak megai opis menteri ke setipak enggau pelin pemansang infrastruktur menua Sarawak.

“Aku pechaya pemutus meri pangku pengawa tu ngagai aku bisi kaul enggau manifesto BN ti deka ngemansang infrastruktur menua Sarawak nyengkaum jalai Pan Borneo sereta pemansang bukai,” ku Fadillah.

Iya mansutka jaku tu lebuh dikerandau pemberita pengudah betemu enggau Kepala Menteri Pehin Sri Abdul Taib Mahmud ba indu Opis PBB Jalai Bako ditu, kemari.

Ku iya, Taib udah bekunsi runding enggau iya senentang pekara ti patut dulu dikemerat ba pengawa bejalaika atur pemansang infrastruktur di Sarawak.

“Pemansang infrastruktur di Sarawak bebida enggau di Semenanjung Malaysia. Kitai deka bebesaup enggau mayuh macham ijinsi ke nyengkaum opis kereja raya Sarawak ngambika pelin pemansang ulih dipejalai enggau engkeman, lurus sereta setipak enggau pemayuh belanja,” ku iya.

Pekara tu meh dulu deka diperatika aku ngambika rayat nerima atur pemansang ke patut sereta nyapai pemujur ke besai agi, tandu iya.

Iya mega madahka jalai Pan Borneo nyadi sebengkah projek ti dikemerat ke alai iya mega pechaya dia semua rayat di Sarawak enggau Sabah ngarapka projek nya ditembu enggau lengkas.

“Kitai dulu deka mansik ni bagi jalai ke patut dikemanah, dikemansang dalam projek jalai Pan Borneo. Jalai ke dikemansang patut ulih nyambung kandang menua pesisir ngagai jalai besai.

“Nengah chara nya, kitai ulih mai pemansang ngagai kandang menua ti disambung jalai baru lalu ngangkatka penatai pemisi rayat ke diau besemak,” ku iya.

Speaker DUN Datuk Amar Mohamad Asfia Awang Nassar madah, dua bill perintah iya nya Supplement Supply (2012) Bill, 2013 enggau Members of Administration sereta Members Of Dewan Undangan Nengeri (Remuneration, Pension and Gratuities) Bill, 2013 deka dibantai Menteri Wang II Dato Sri Wong Soon koh.

“The Supplement Supply (2012) Bill, 2013 deka dibantai kenaka 21 Mei lalu deka dibachatandu ungkup kedua enggau ketiga kena 23 Mei.

“Members of Administration enggau Members of Dewan Undangan Nengeri (Remuneration, Pension and Gratuities) Bill, 2013 deka dibantai ila (21 Mei) lalu deka dibachatandu ungkup kedua sereta ketiga ba hari ke sama (ila),” ku Asfia.

Iya mansutka jaku tu ba siti aum pengarang berita pengudah aum pra-DUN ti betuaika Kepala Menteri Pehin Sri Abdul Taib Mahmud ba indu Opis PBB ditu, kemari. Asfia madah bill nya dibantai ngambika tau dipejurai, dikemendar nambah gaji kepala menteri, sapit kepala menteri, menteri kanan, menteri, speaker, sapit speaker, menteri muda, kaban kunsil nengeri sereta sekretari politik.

“Penerang ke silik senentang penyampau ke ditambah deka ditemu maya bill nya dibantai Menteri Wang II kenaka 21 Mei tu.

“Penudi sekali bill tu diubah iya nya ba taun 1980 maya perintah Tun Abdul Rahman Yakub,” ku iya.

DUN nadai nerima sebarang motion serak tu, tandu iya.

Iya mega madah, pengawa milih senator baru deka diatur kenaka 21 Mei pengudah timpuh kuasa senator ke diatu Dayang Madinah Tun Openg tembu kenaka 18 Julai 2013.

Dua buah opis menteri nerima tanya ke pemadu mayuh iya nya Opis Menteri Kunsil Kandang Menua enggau Pemansang Komuniti sereta Opis Menteri Pengatur Pengeraja asal enggau Rampa Menua Kededua nerima 27 tanya.

Sepenyampau 186 tanya ti begunaka saut oral bisi dianjung 33 iku pengari (YB) lalu tanya ti begunaka saut betulis bisi 91 ke dianjung 15 iku pengari (YB).

Aum pra-DUN kemari digulu semua raban menteri sereta YB.

Pengawa sereta ulah ti tau ngasuh orang bukai ensiban enda patut dikemesai lebih agi nengah laman sosial baka ke ditemu kitai diatu.

Aktivis Rama Wan Zain Syed Mohdzar madah, isu tu udah kelalu balat dipusin nengah laman rama dikena ngerenggang penyerakup entara raban bansa di menua tu.

“Ulah ke chelupa besadungka petenah, nyabung orang belaya, sereta bejaika orang tauka raban bansa bukai dalam laman rama aruh diketu jampat enti rayat semua ngemeratka pengelikun sereta kedut kaul tegap belama.

“Aku enda meda bansa kitai bepechah belah di menua tu tang sekeda orang sengaja ngungkit berindik ari pemutus PRU13 ti enda ngemuaska ati sida,” ku iya kilah ensana.

Perintah enda tau enda mansik enggau dalam puncha sekeda raban orang nulak BN ngambika isu beripih bansa tu enda ngulang agi ba pengawa bepilih besai jemah ila.

“Ukai semina sebengkah bansa nulak BN, tang tu mega nyengkaum bansa bukai di menua tu.

“Berebak enggau nya, isu bebagi bansa pengudah pengawa bepilih enda nyengenda bisi,” ku iya.

Agensi perintah baka Opis Penyerakup Bansa enggau Integrasi Nasional (JPNIN) aruh matau pekara ke dibantai dalam laman rama.

“Sebendar iya penyerakup bansa di menua tu mengkang tegap, rayat agi mengkang begulai sejalai enggau pangan diri baka selama .

“Isu betunjukka jari nyalah pangan diri ngambika orang bukai nya ringat udah pengawa bepilih tu enda tau enda diketuka ngambika penyerakup entara raban bansa di menua tu tegap belama,” ku iya.

Menteri Muda Pemansang Menua Pesisir Datuk Francis Harden Hollis madah, sida ke megai tanggungpengawa nyadi ketuai raban bansa enda tau enda bejalai betemu enggau redak sida nanya penanggul ke ditapi peranak menua ba genturung nya.

“Anang meram penanggul ke bisi laban penanggul nya enda teputar lalu tau ngujungka redak pegai sida ringat enti enda diputar enggau jampat,” ku iya .

Harden ke mega ADUN Simanggang bejaku munyi nya lebuh nemuai ngagai Rumah Bleck Burong, Kampung Nanga Undop, bedau lama ke udah.

Nundaku iya, setiap penanggul bisi chara mutarka iya lalu anang nyalah sesapa, tang tuai raban bansa patut bejalai meda penusah ke ditapi redak sida sebedau meri riput ngagai Opis Residen tauka Opis Pelilih Mit Menua tauka pengari rayat.

“Nya meh pemesai guna kerejasama rapit enggau piak Opis Residen tauka Opis Pelilih Mit Menua enggau wakil rayat ba sitak ke dipegai sida lalu anang melakang piak ke patut,” ku iya.

Ba pekara ke sebaka, Harden ngelalau semua ketuai raban bansa di rumah panjai enggau genturung pendiau ngambika ngembuan ulah ke menyana dikena mandangka teladan ke menyana ngagai anak buah sida.

“Enti ketuai nadai ngembuan ulah ke menuku , peranak sida mega deka nunda ulah iya.

“Tuai ke ngembuan ulah ke menuku beguna amat laban iya deka nyadi teladan sida,” ku terang iya.

Bela bisi ngulu atur pengawa nya Ketuai Nembiak Parti Rakyat Bersatu Sarawak (SUPP) Simanggang Patrick Michael Dian, Kunsilor Sawing Sumar, Kunsilor Mana Jugam, Tuai Rumah Japing Gema, Tuai Rumah Kadenny Menggong sereta ketuai raban bansa ke bukai.

Dalam penerang berita ke dipansut apin lama ke udah, SAVE Rivers madahka perintah nengeri enggau SEB nguna kongres ke diatur dua taun sekali iya nya IHA ke deka diatur di Kuching nyadika forum kena ngelaku sereta ngenetapka pengawa ngaga tekat ai di Sarawak.

IHA nya sebengkah gerempung (lobby group) ke nyengkaum orang ti beranakka puku, orang ke ngaga enggau orang ti ngemansutka belanja ke bisi ati deka ngaga tekat ai ke bebesai. Mayuh industri ke bebesai sereta decision-makers dipelaba enggau ba kongres nya ke deka diatur belabuh ari 21 nyentuk ke 24 Mei tu ila.

Sekretari SAVE Rivers Mark Bujang madah, sida berasai irau endar ati perintah nengeri enggau SEB bedau tetitihka setindit antarabansa ba pengawa ngemansangka tekat ai lebih agi ba pekara sereta pemesai hak mensia ke dibungkur atur pengawa nya sereta empas pemansang nya ke ngeruga pemanah rampa menua lebih agi baka ke ditetapka United Nations Declaration on the Rights of Indigenous People (UNDRIP) ke alai perintah menua Malaysia udah setuju nitihka penerit atur ke patut.

“Perintah nengeri agi belalai ba mensia mayuh senentang pekara Social and Environmental Impact Assessment (SEIA) baka kes ke nyadi ba tekat Hidroelektrik Murum, lebih agi ke bekaul enggau peranak menua bansa asal.

“Perintah nengeri enggau SEB majak enda ibuhka ungkup raban bansa asal ke kena bungkur projek nya baka ke nyadi di tekat Hidroelektrik Bakun enggau Murum,” ku iya seraya madah taja pan nadai pemendar diberi ngaga projek hidroelektrik Baram sereta ngaga jalai nuju tekat ai nya.

Ku iya baru, NGO nya mega madahka majoriti raban bansa asal baka bansa Kayan, Kenyah enggau Penan ke kena bungkur projek tekat ai nya ngenggaika perambu projek ngaga Tekat Ai Baram.

“SAVE Rivers bebendar minta perintah menua Sarawak nginsil perambu ngaga mayuh agi tekat ai ke bebesai di Sarawak laban ari nya semua ungkup raban bansa asal diaku magang,” ku iya.

NGO nya mega minta IHA nginsil SEB nyadi kaban gerempung nya laban naka ke diatu sida lalu bedau mutarka penanggul ke lama ti bekaul enggau raban bansa asal Tekad Ai Batang Ai, Bakun enggau Murum.

SAVE Rivers mega madah, ketuai eksekutif SEB Dale Sjotveit enda patut nyadi kaban komiti IHA laban mayuh macham pekara baka ke disebut diatas tadi bedau diputarka SEB.

Berebak enggau nya, Bruno Manser Fund madahka tekat ai nya deka ngampuhka lebih 2,300 km2 kampung ujan tropika enggau tanah raban bansa asal.

Ku sida, tekat ai tu ila deka ngampuhka pemadu kurang 235 buah kandang menua raban bansa asal ke diuan urung 30,000 nyentuk ke 50,000 iku mensia.

Ex-Sapit Speaker Datuk Wan Junaaidi Tuanku Jaaafar madah Dewan Negara agi ulih bejalaika tanggungpengawa nyadi palan endur ngemetulka pengawa Dewan Rakyat.

“Enti bisi orang meri penemu sida senat nya dibuai, iya patut nitihka atur undang-undang.

“Enggai nyadi semina bejaku aja, laban atur undang-undang mesti diubah,” ku Wan Junaidi madah lebuh dikerandau pengudah aum pemesai PBB di Indu Opis PBB di Jalai Bako ditu, kemari.

Wan Junaidi ti mega Kaban Parlimen (MP) madahka ari sukut pemerat sejarah senat, iya ulih nyadi pemetul seraya ngemataka pengawa ke salah laban sesebuah menua sigi begunaka senat.

“Enti diperatika mayuh etnik ari Sarawak enggau Sabah enda ulih masuk ke dalam parlimen, kebuah kitai ulih ngena chara baka tu.

“Nya alai, gerempung etnik nyangka ulih masuk nengah Menteri Besai tauka Agong masuk ke dalam dewan Negara ngambika sama-sama bisi pengari dalam Parlimen,” ku iya.

Kelimpah ari nya Wan Junaidi madah ari numbuhka atur undang-undang kediri empu, orang ke bisi pengelandik dalam sekeda bidang nyangka enda ulih menang lebuh bediri nyangka ulih dibai masuk nengah Dewan Negara nengah padu ari Agong.

“Enti nitih, kitai bisi tiga chara masuk Dewan Rakyat, iya nya ngarika menua nengah ke dichalun dalam DUN, dipaduka Agong atas sadang Menteri Besai enggau chara dipilih terus,” ku iya.

Kebuah Wan Junaidi munyi nya laban nimbal Karpal Singh ke ngasuh atur undang-undang renggat perintah besai diubah kena ngetuka kuasa Dewan Negara.

“Enda ibuh begunaka Dewan Negara. Nya ngena belanja ke enda ibuh ditanggung rayat…Nadai guna nya.

“Iya semina meransang orang ke enda dipilih rayat tauka orang bukai dibai ngagai Parlimen nengah ‘pintu belakang’ nengah Dewan Negara laban beratika undang-undang Parlimen nyengkaum Dewan Negara,” ku Karpal.

Sapit Presiden Badan Amal Tenaga Isteri-isteri Sarawak (SABATI) Dato Sri Empiang Jabu madahka, genap iku pengereja pengawa KKM patut bejalaika pengawa, enda ngira sesapa aja ke sakit ti datai berubat, sereta nyaga ulah diri lebuh ti bejalaika pengawa sida.

Ku iya, pengaga ati lebuh ke sida bejalaika pengawa ulih nyaup ngurangka pemedis orang sakit ke berubat ba sepital.

“Enti kita tuchum lebuh ke ngubat orang sakit tauka betemu enggau kaban orang ke sakit, nya mandangka pemaik kita raban KKM, kelimpah ari nyeliahka penyaru runding orang ke sakit ngagai staf di sepital.

“Kita patut ingat, genap iku orang ke datai nya enda sebaka penatai sereta jalai runding.

“Sida mega mayuh enda nemu pekara enggau atur ke ditetapka ba hospital.

“Tanggungpengawa kita madahka sida enggau silik nitihka atur ke betul ngambika sida enda saru runding,” ku iya lebuh nyuaka hamper beserimbai enggau pengerami ngintu Hari Gawai 2013, Tikas Pelilih Menua Betong ba Sepital Betong ditu ensanus.

Ku Empiang, anang nanyaka penyakit ngagai orang ke sakit laban nya tau ngenusahka ati sida, tang kita patut meri peransang ngambika sida ngasai diri dikeibuhka.

Ku iya baru, pengawa meri hamper nya besai endar reti, ngambika sida gaga ati sereta ngasaika pemeri ari sekeda raban.

“Program ke baka tu diatur ninting taun beserimbai enggau pengerami Hari Gawai sereta enda tau enda dikereja komiti Gawai,” ku iya.

Berebak enggau nya, Empiang mega ngungkupka belanja RM2,000 ngagai Kelab Medical Betong ngambika bisi dikena sida bejalaika pengawa.

Kelimpah ari nya, bisi 60 iti hamper diberi Komiti program ngagai orang ke sakit ba wad sepital nya.

Sekeda opis mega enggau ngemujurka program nya nyengkaum Opis Pengintu Pengelantang Mensia Mayuh Betong (JKMB) ke udah nyaup nyendiaka hamper, lalu baka nya mega Opis Tanah enggau Survei Pelilih Menua Betong.

Sama bisi maya nya, Chairman Pengatur Program Pengerami Gawai 2013 Anthony Aboi, pengari Direktor Sepital Dr Melvin Chung, D.O Betong Friday Belik, Sapit Direktor Opis Pengintu Pengelantang Pendiau Betong Emilda Piar Kunchui Uli enggau Sekretari Opis Kunsil Pelilih Betong, Anthony Luta Juing.

Menteri Muda Pengintu Pengelantang Pendiau Robert Lawson Chuat madah, nyentuk ke bulan April taun tu RM50.4 juta udah diberi ngagai 53,536 iku penerima bantu ninting bulan di serata nengeri tu.

“Ungkup Pelilih Menua Betong, dalam kandang empat bulan keterubah taun tu, RM1,314,000 udah diungkupka ngagai 5,606 iku penerima ke patut.

“Tanggungpengawa JKM deka nentuka nadai raban orang ke patut menerima bantu nya tinggal tauka enda ampit ari nerima nya. Mayuh macham sekim bantu udah disediaka perintah ke nguntungka semua orang ke patut nerima nya,” ku iya.

Ku iya nandu, bansa sekim bantu ke bisi disediaka baka sekim bantu Orang Tuai, nembiak mit, Elawin Pengereja pengawa timpang pendiau, Pesakit Kronik Raya, Orang Nyelai Pendiau (OKU) Enda Ulih Gawa sereta Bantu Nupi Anak.

Kelimpah ari nya, Robert mega arapka bala penerima bantu JKM ke agi kering sereta ulih gawa ngena bantu ke diberi nya nyadika sebengkah ari chara ngemansutka penatai pemisi.

“Bisi mayuh macham bantu disediaka JKM, tang orang ke begunaka bantu nya enda tau enda ngerejister diri masuk program e-Kasih kena ngulihka bantu nya.

“Kena ngemujurka nya, JKM mega deka nentuka raban orang ke tusah ba pengidup tu ulih dikeluarka ari penyeranta nengah ‘kebajikan produktif’,” ku iya bejaku ba Pengerami Sejambak Kasih Hari Gawai 2013 JKM di Rumah Intai, Suri Baroh ditu ensanus.

Ku iya nandu, program ke diatur nya sebengkah chara dikena ngelempungka tating pengidup sereta ngagaka ati bala penerima nyerumba pengerami Hari Gawai tu ila.

“Tu sebengkah ari pengawa ke diatur genap kali bisi pengerami baka Hari Raya, Taun Baru China enggau Hari Gawai ke deka diintu enda lama agi. Nya alai orang ke patut nerima sereta bisi ba lis JKM nadai enda dikeingatka,” ku iya.

Seraban 150 penerima bantu ninting bulan ari JKM ditu nerima pemeri angpau enggau hamper beserimbai enggau Hari Gawai.

Sama bisi ngulu pengerami nya, Sapit Residen Pelilih Menua Betong Dr Anthony Valentine Laiseh, SAO Debak Dr James Luing enggau Sapit Direktor JKM Pelilih menua Betong, Emilda Piar Kunchui Uli.

BERAMI: Masing (tiga kiba) begulai enggau semua enam chalun ke menang, berami sepengudah mu-jur nempuh PRU13 tu tadi. Bisi ayan (ari kiba) Nyalau, Aaron, Entulu, Salang, Masir enggau Ugak.

KUCHING: Presiden Parti Rayat Sarawak (PRS) Tan Sri Dr James Masing madahka pemujur parti ba Pengawa Bepilih Besai Ke-13 (5 Mei) tu tadi ketegal parti ngembuan tuju ti manah ba pekara politik.

Iya netapka dia politik sereta kuing politik patut bepelasarka ideologi enggau tuju ke engkaman ke alai PRS deka semampai ngemeratka pekara nya.

“Pemujur menang ba pengawa bepilih suah agi ditempa raban ke ngembuan tuju politik ke manah sereta iya ke setipak ke alai kitai PRS semampai ngemeratka pekara nya.

“Tuju ke manah ditambah enggau pengawa ke setipak udah ngiring pemujur ngagai PRS menang ba pengawa bepilih,” ku Masing.

Iya mansutka jaku tu ba pengerami pemujur PRS maya PRU13 di KTS Garden malam ensanus.

Ba PRU13, PRS menang semua enam penuduk ba Sri Aman, Lubok Antu, Kanowit, Julau, Selangau enggau Hulu Rajang.

Pengerami malam nya mega digulu semua enam chalun PRS ke menang iya nya Masir Kujat, William Nyalau, Datuk Aaron Ago Dagang, Datuk Joseph Salang Gandum, Datuk Joseph Entulu enggau Wilson Ugak Kumbong.

Bejaku ngenang Sarawak Worker’s Party (SWP), Masing ke mega Menteri Pemansang Tanah madah chalun PRS ukai bediri ketegal ti deka mandangka pengeringat tauka deka bebalas.

“Kitai (PRS) bediri ketegal ngembuan kebuah deka ngerebut penuduk…kitai bediri ketegal ngasaika diri ngembuan penegap sereta pengulih ngiring menua nuju pemansang jemah. Pemaik enggau pengelantang menua tu jemah patut ngalahka peneka diri diatu.

“Kitai enda patut bediri ketegal ti deka nyadi pengari rayat (YB) aja tauka mengkang deka bediri ketegal gilaka kuasa,” ku Masing.

Ba jaku iya mega, Masing ngaku dia pengawa bepilih ti baru udah tembu udah nyadi sebengkah penguji ti besai kala ditempuh parti sepemanjai lapan taun sepengudah ditumbuh.

Iya madah PRS betapi enggau tiga bansa parti bukai, Pakatan Rakyat (PR), chalun Ngatika Diri sereta Sarawak Worker’s Party (SWP).

Masing madah PRS napi chalun Ngatika Diri ti netapka iya ukai ngelaban BN tang semina ngelaban chalun BN. SWP ngembuan juluk deka ngalah tauka nguburka PRS.

Ku iya, betapi enggau SWP udah matak tenung raban media, pengemata politik ke alai sekeda mega madahka PRS deka dialahka SWP serak tu.

Taja pan pia, Masing gaga dia parti udah mujur nempuh semua nya enggau naka iya pemanah lalu menang ba semua enam penuduk.

NGEPAN ASAL LUN BAWANG: Dua iku indu mandangka ngepan bansa Lun Bawang.

KUCHING: Pengerami Hari Lun Bawang 2013 tauka ‘Irau Aco Lun Bawang’ deka diatur berengkah 31 Mei nyentuk ke 2 Jun 2013.

Pengerami ke diatur ungkup ke 26 kali (ninting taun) nyadi sebengkah pengerami besai raban bansa Lun Bawang lalu deka diintu di Dataran Bandar Lawas.

Irau tauka pengerami mega deka ngatur pekit Kumang (Rurun Ulung) sereta Keling (Padan Liu Burung), pekit pancaragam buluh kelimpah mandangka main enggau adat bansa Lun Bawang.

Chairman Pengatur Pengerami Ipoi Datan madah entara main asal Lun Bawang ti disengkaum dalam program 3 hari berunggu iya nya ‘Perituban’g tauka tabuh Gong enggau tanda asal ‘Alai Keror’.

“Kelimpah ti mandangka budaya enggau main asal raban bansa Lun Bawang, kitai mega deka ngundang raban bansa bukai ngambika tau bela mantaika adat enggau main asal bansa diri.

“Irau Aco Lun Bawang mega deka ngundang raban bansa Lun Bawang ke diau di Sabah enggau Kalimantan Timur ke dikumbai ‘Lun Daye’,” ku Ipoh ba siti aum pengarang berita di Dewan Tun Abdul Razak, Muzium Sarawak ditu, kemari.

Irau Aco Lun Bawang deka dipenyadi Menteri Pengatur Pemansang Pengeraja Asal enggau Rampa Menua II Datuk Amar Awang Tengah kena 1 Jun tu.

Pekit lumba enggau main sereta pengawa mandang servis ari 10 buah ijinsi perintah bisi mega disedia ngagai raban pengabang dalam timpuh tiga hari pengerami nya diatur.

Ipoi madahka urung 20,000 iku bansa Lun Bawang nguan menua Sarawak, 6,000 di Sabah, 4,000 di Brunei sereta 40,000 di Kalimantan Timur.

KUCHING: Penyukung enggau kaban Parti Rayat Sarawak (PRS) dikeingatka nagang asai ati diri empu lebuh betapi enggau sebarang isu kelebih agi ti bekaul enggau parti sereta Barisan Nasional (BN).

Sapit Presiden PRS, Datuk Joseph Entulu anak Belaun mansutka penemu nya bekaul enggau tusun nama kabinet perintah besai ti enda ngelantangka ati penyukung enggau kaban parti nya.

Ku Entulu, enda ngira nama ti nyadi tauka penanggul dalam parti, penyukung enggau kaban parti patut tegap begempung nyadi BN sereta ukai ngelui ari ke patut ke tau ngeruga parti.

“Endang kitai bisi berasai enda lantang ati laban ti enda nerima ungkup ke patut ari BN pengudah kitai meri mandat besai ngagai BN merintah menua lima taun agi.

“Taja pia, parti nengah Presiden Tan Sri James Masing benung dalam atur berandau enggau Menteri Besai ngambika berundingka baru portfolio ke patut ungkup pengari kitai (PRS) dalam kabinet perintah besai.

“Nya kebuah, aku minta semua penyukung enggau kaban parti ngambika enda nitihka asai ati diri sereta meretika nama ti deka dikereja ketuai dalam parti kena mutarka pekara tu,” ku iya.

Iya mansutka penemu nya lebuh bejaku ba ‘Majlis Kesyukuran Meraikan Kemenangan PRS’ ba PRU13 di KTS Garden ditu malam ensanus.

Pengerami nya ukai semina dikena ngerami pemujur enam chalun PRS ti menang ngetanka sitak Parlimen ti ungkup parti nya, tang mega dikena meri basa enggau terima kasih ngagai semua kaban enggau injin parti ti mai pemujur ngagai PRS maya PRU13.

Dulu ari nya lebuh bejaku ba pengerami nya, Entulu ti mega Kaban Parlimen Selangau madahka pemujur PRS ba semua enam sitak Parlimen mega bepun ari sukung enggau penyerakup tinggi ari semua kaban enggau injin parti.

Ku iya, sejarah udah nunjukka nadai penyerakup ulih ngeruntuhka penegap parti baka ti kala nyadi dalam parti Dayak sebedau tu.

Taja pia ku iya, PRS untung laban ngembuan seiku ketuai ti bepengelandik (Masing), sereta ulih ngiring parti ngambika enda bepechah taja pan betapi enggau mayuh penanggul ti ngeruga parti.

Ngenang pemujur di sitak Parlimen Selangau ti menang majoriti 7,555 undi, Entulu ke baru dipaduka nyadi Menteri ba Opis Menteri Besai madahka iya deka nukuka raban bansa kitai Dayak ba sitak nya terus begempung tauka beserakup.

Ku iya, riput asil ari pansik madahka Selangau iya sebengkah ari sitak chelum ti dipelabaka enda ulih ditanka iya maya PRU13 lebuh betapi enggau Penyanding Penemu Parti Pekerja Sarawak (SWP) Datuk Sng Chee Hua.

Nitihku Entulu, asil ari ti gawa bebendar iya begulai enggau ijin parti sepemanjai nyadi penyandang sitak nya sereta maya bekimpin, pengunjung iya nunjukka iya enggau BN agi dikedeka sereta diguna ba sitak nya lalu ukai seseiku orang ti bemain politik duit.

Entulu madahka iya ti menang ba sitak nya iya nya pengaga ti kedua dalam pengidup iya pengudah ti kala diberi sekulasip nampung pelajar di menua tasik sebedau masuk pengawa politik.

Nitihku Tukang Pengerembai Berita pengerami nya Tuai Rumah Tungku Balang, pengerami serak tu diatur Opis Pemadam Pelilih Selangau sereta Tuai Pengabang ba pengerami nya iya nya Menteri ba Opis Menteri Besai Datuk Joseph Entulu anak Belaun.

“Raban pengatur pengerami deka nyendiaka 60 iti mija lalu udah berengkah dijual ngagai mensia mayuh ke ngelingi menua Selangau tauka genturung menua bukai ke besemak.

“Ba pengerami nya mega, kitai deka ngatur pekit Keling enggau Kumang Gawai ke diungkup ngagai raban orang indu rumpas Dayak di pelilih menua Selangau,” ku iya madah ngagai Utusan Borneo, kemari.

Tandu iya, pengawa nyuaka insentif pelajar ngagai nembiak nyulut dalam peresa perintah bagi menua Selangau mega diatur ke deka disuaka Entulu empu.

Mensia mayuh ke deka meli tikit mija pengerami nya tau betelefon ngagai Penghulu Michael Jelani ba lumur 014-2087288, Penghulu Thomas Jawa (013-8338080), Penghulu Jerome Jerampang Ratoh (019-8287106) enggau Tuai Rumah Tungku Balang (019-8050057).

Indu Dayak ke bisi pengerindu masuk pekit Kumang Gawai Dayak Pelilih Selangau tau betanya ngagai Nangku Unggang ba lumur 0198146738 tauka Dami Dingon (019-8245751) bekaul enggau penerang ke silik.

Hari bulan tutup nganjung nama masuk Pekit Kumang Gawai iya nya kena 22 Mei tu.

Kelimpah ari nya, apai indai ke bisi anak bulih pemutus peresa ke nyulut dalam peresa perintah taun nyin tadi, tau ngerejister nama anak sida ba bagi pengatur pengerami di Opis Pelilih Selangau ngambika nerima insentif pelajar.

Iya madah enti nya amat seiti pengilap, dia pekara nya patut diserenih ke alai parti mega patut bejuraika pekara nya ngambika tau diputar jampat.

“Senentang pangku pengawa menteri ke diberi ngagai PRS, aku arapka nya seiti pengilap Najib lalu ukai sengapa digaga sesapa.

“Enti nya amat pengilap (Najib), aku arap parti ulih betemu enggau Najib sebarang maya lalu mutarka pekara nya lengkas,” ku Entulu ba pengerami ngintu pemujur PRS ba pengawa bepilih ke-13 kena malam ensanus ke diatur di KTS Garden.

Pengerami nya dipenyadi Presiden PRS Tan Sri Dr James Jemut Masing.

Entulu entara enam iku chalun PRS ke menang ba pengawa bepilih ke alai parti udah menang ba semua enam penuduk.

Petalat entara kaban PRS majak didinga ke alai semua enda tepantup ati enggau pangku pengawa menteri ke diberi Najib dalam tusun kabinet menteri kenyau ari 15 Mei tu tadi.

Datuk Joseph Salang Gandum ke diberi mangku pengawa Sapit Menteri Dagang Temuai enggau Main Asal enda nerima pangku pengawa nya.

Entulu, ke diberi mangku pengawa Menteri Ba Opis Menteri Besai bela ngembuan runding ke sama enggau Masing ke alai parti patut diberi basa sepengudah nyaup menang ba enam penuduk parlimen ungkup BN.

Pangku pengawa menteri ke diberi ngagai parti enda ulih dikena mantu pinta rayat menua pesisir ke mengkang nagih pemansang perengka guna, tandu Entulu.

“PRS ke nyadi parti ti ngarika penyukung di menua pesisir ngarapka mayuh agi bantu ngagai rayat ti mengkang tinggal ari atur pemansang,” ku Entulu.

Ba pengerami nya, Masing besemaya deka berunding baru pangku pengawa Salang enggau Najib ngambika penau sereta peneleba iya ke udah lama dalam kabinet menteri tau dikena ngemansangka rayat menua pesisir di Sarawak.

Dulu agi ari tu, ba siti aum pengarang berita ke diatur kena Hari Lima tu tadi, Masing mega bisi madahka deka berunding enggau Najib senentang pangku pengawa Entulu.

Masing ngarapka Entulu diberi pangku pengawa menteri ke ngembuan kuasa ti tau dikena ngemansangka rayat di menua pesisir.

KUCHING: Kaban Parlimen (MP) Bandar Kuching Chong Chieng Jen patut madahka enggau terang sereta silik ngagai orang mayuh, bakani chara iya ulih mantu rayat minta belanja Projek Mit Menua Pesisir (MRP).

Pekara nya dipadahka kaban Bon Fire Team Parti sa’ati Rayat Sarawak (SUPP) dalam aum pengarang berita ditu, kemari.

Ketuai Raban Nembiak SUPP ti mega kaban Bon Fire Team, Tan Kai lebuh bejaku madahka belanja MRP kebendar semina diungkup ngagai Kaban Parlimen Barisan Nasional (BN) ke dipilih, iya nya sida ulih nguna nengah Opis Pelilih Mit Menua.

Formula ke sama dikena ba nengeri ke endur Pakatan Rakyat (PR) merintah, iya nya semina Kaban Parlimen Pakatan diberi ungkup belanja nya, ku iya.

“Nya alai, lebuh Chong madahka iya ulih mantu Gerempung Ukai Dikuasa Perintah (NGO) minta belanja nya, aku deka nemu sekalika iya enggau semua Kaban Parlimen DAP dipilih di Sarawak bisi diungkupka belanja MRP?.

“Aku minta iya madahka enggau terang sereta silik, bakani chara iya ulih mantu minta belanja (MRP) nya lalu nama dana nya,” ku Tan Kai.

Bejaku baru iya madahka belanja MRP ti diberi ngagai Kaban Parlimen BN ngambika bisi diagih ngagai NGO.

Nya alai ku iya, SUPP ti enda mujur ngetanka enam sitak Parlimen ungkup parti nya mega ngujungka enda ulih mantu raban NGO ba sitak nya.

Beduduk ari pekara nya ku iya, amat muntang endur Chong madahka NGO enda bepanggai ngagai belanja perintah maya ngatur pengawa.

Tang ke nyata bendar agi mayuh sida NGO dipeda bedau ulih ngatika diri ti patut dibantu ari segi belanja, ku iya.

Berebak enggau nya raban Bon Fire Team tu mega minta Kaban Parlimen DAP baru dipinta ngamatka pekara ti udah disemaya sebulan ke udah, laban rayat ti milih sida ketegal arapka pengari rayat DAP nya.

“Kitai minta penyakal anang agi besemaya bula sereta ngasaka ati rayat,” ku iya

Kelimpah ari nya, Tan Kai ngarika Raban Nembiak SUPP madahka diri gaga ati laban Sapit Presiden SUPP Datuk Richard Riot Jaem dipaduka nyadi Menteri Penguasa Mensia Mayuh enggau Pengereja Pengawa.

“Kitai pechaya bendar iya (Richard) ulih gawa manah ke rayat Malaysia, lebih agi ke rayat ba sitak (Serian) ti diarika iya beduduk rayat milih iya baru,” ku Tan Kai.

Sama bisi ba aum pengarang berita nya kemari, Ketuai Raban Indu SUPP Pusat ti mega kaban Bon Fire Team Amy Tnay, Sivanesan Sanmugalingam enggau Hanna Kho ti mega kaban Bon Fire Team.

Ba pengawa mantaika tusun nama kabinet baru lemai ensanus Datuk Seri Najib Tun Razak nyirika Datuk Rohani Abdul Karim nyadi Menteri Pemansang Orang Indu, Ruang Bilik enggau Raban Bansa enggau Nancy Shukry nyadi Menteri ba Opis Menteri Besai.

Chairperson, Persekutuan Perkumpulan Wanita Sarawak (PPWS) Negeri, Aishah Edris (gambar) madahka, Rohani enggau Nancy ke dipadu nyadi Menteri nya mega nunjukka basa ngagai rayat Sarawak, kelebih agi ba raban orang indu.

“Kitai berasai temegah ati sereta terima kasih ngagai Menteri Besai laban ti meri pengarap ngagai Kaban Parlimen Batang Lupar Datuk Rohani enggau Kaban Parlimen Batang Sadong Nancy Shukry nyadi menteri. Tu nunjukka basa ngagai rayat Sarawak kelebih agi kitai orang indu.

“Bisi sida tu ba renggat tinggi di perintah besai, kitai ngarapka lebih mayuh agi pekara ke ulih dibantu, program tauka aktiviti diatur sereta ungkup belanja, ngambika kitai ulih ngemajuka agi tikas orang indu di nengeri Sarawak.

“Ngarapka udah tu kitai lebih senang agi ngenataika sebana sereta merambu mayuh agi pekara bekaul enggau orang indu, tambah mega Rohani ti udah dipaduka Menteri Pemansang Orang Indu, Ruang Bilik enggau Raban Bansa,” ku Aishah lebuh dikerandau pengarang berita kemari ba pengawa ngerejister raban Komiti Kereja Nengeri begulai enggau pengereja pengawa PPWS enggau chairperson sitak.

Ba Pengawa Bepilih Besai Ke-13 Rohani mujur ngetanka sitak Batang Lupar menang enggau majoriti 10,964 undi betapi enggau Abang Zulkifli Abang Engkeh (PKR). Nancy ngetanka sitak Parlimen Batang Sadong menang enggau majoriti 11,260 undi betapi Mohamad Jolhi (PAS).

Nambahka nya lebuh dipinta ngenang gempuru ninting taun 2013 ti diatur berengkah 16 ngagai 19 Mei tu ke diatur ba Wisma Wanita, di Jalan Bakti Off Jalan Sultan Tengah, Semariang, Aishah madahka, dikena ngerapitka kaul enggau kerejasama entara chairperson, pengatur enggau delegasi.

“Kelimpah dikena ngerapitka kaul enggau kerejasama entara kaban dalam PPWS, nengah pengawa begempuru ninting taun tu mega kitai ngarapka ulih nambahka penyampau kaban PPWS.

“Nyentuk ke diatu penyampau kaban PPWS serata Sarawak, lebih 12,000 iku kaban,” ku iya seraya madahka PPWS sebengkah kaban kunsi ijinsi perintah, ti mantu ngenataika polisi perintah.

Pengawa gempuru PPWS 2013 ti digulu 60 iku pesereta ari serata Sarawak, berambaika leka jaku “Kerjasama Tonggak Kecemerlangan PPWS”.

Entara program tauka aktiviti sepemanjai pengawa begempuru nyengkaum Team Building, nemuai ngagai Medan Satok di Kubah Ria enggau Homestay Santubong enggau aum besai Koperasi Perkumpulan Wanita Sarawak Berhad (KOPERWANIS).

Ku iya, taja pan bedau tentu mayuh orang meretika Konsep 3R tu, tang enti iya majak dikerembaika ngagai mensia mayuh, iya endang deka mantu ngurangka pengamah rampa menua laban ti angkun ke pemeresi rampa menua enggau kandang alai diau.

“Nya alai, aku bisi pengarap ati Konsep 3R tu endang sebengkah chara ti engkeman dikena ngurangka pengamah menua beduduk ari pengawa ti bebuaika uras enggau nadai sekat sereta enda ngena jalai ti betul,” ku iya lebuh bejaku ba pengerami bejadika Program 3R ti diatur ba Taman Millennium Fasa 1 enggau 2 Tanjung Kidurong, ditu pagi kemari.

Ba pengawa gutung-ruyung tu, urung 200 iku pengereja pengawa ABF begulai enggau diri sebilik sama bisi datai meresi sereta ngaduka perengka ba taman alai ngelantangka ati nya berengkah ari pukul 7 pagi.

Ku Zainol, nengah Program 3R tu endang ulih meri lalau ngagai nembiak rebak dudi ambika sama bela angkun nyaga rampa menua sereta mutarka penanggul pengelebang pengeraja asal menua tu.

“Enggau jalai meretika Konsep 3R tu deka mantu opis penguasa perintah ti bejalaika pengawa nyaga rampa menua mutarka penanggul rampa menua ti seruran kamah ngambika semampai likun alai mensia diau,” ku iya.

Ku Zainol, pengawa baka tu sigi deka dipejalaika ninting taun laban ti nyadi sebengkah Program Tanggungpengawa Sosial (CSR) ABF dalam nyukung sereta mantu pengawa ijinsi ti bekaul enggau nyaga rampa menua.

Maya nya mega, iya ngansak mayuh agi ijinsi swasta kelebih agi kompeni industri bukai ti bisi ba menua Bintulu ngambi bagi ba Program 3R ngambika sama enggau mantu nyaga rampa menua kelebih agi di Bintulu.

“Enti ulih, sama meh kitai besaup nyaga pemeresi menua Bintulu sereta mantu ngadaka mayuh agi rengka guna mensia mayuh ba palan ngelantangka ati enggau rekreasi laban nya tau pulai ke pemanah kitai semua ti nguan menua tu,” ku iya.

Ba pengawa gutung- ruyung nya, bala pengereja pengawa ABF bejalaika mayuh bengkah pengawa dikena meresi kandang taman alai ngelantangka ati nya baka nanam pun kayu, ngechat, ngumpul uras, meresi parit enggau ngaduka perengka guna ti jai ba endur nya.

Nundaku penerang ke difaks kemari, orang ke deka masuk pekit tu enda tau enda peranak Malaysia diau mendam di Sarawak dibagi ngagai dua kategori iya nya orang mayuh beumur 16 taun ke atas (ukai nembiak sekula) enggau mega kategori nembiak sekula (Sekula Sekondari Atas) beumur 16 taun ke atas.

Pekit tu dibagi ngagai tiga bengkah kategori iya nya Bahasa Melayu, Jaku English enggau Iban ke alai seiku pesereta semina tau ngambi bagi ba seiti kategori aja.

Tuju pekit tu diatur nya mansik, ngaga analisis lalu ngadaka buah penemu enggau bantah ke tau nyungkak ngagai pelasar, program pemansang perintah pia mega nyerungkai isu ke nyadi maya ke diatu.

Esei kategori orang mayuh nya enda kurang ari 2,300 leka jaku enda lebih ari 2,500 seraya kategori nembiak sekula, esei enda tau kurang ari 1,300 lalu enda lebih ari 1,500 leka jaku.

Esei ke dianjung nya mesti ditaip di atas keretas saiz A4 nguna komputer, takah dua baris, nguna font ‘Arial’, saiz 12 lalu penyampau leka jaku dipadah sereta tetiap lambar mesti belumur.

Ba kategori orang mayuh, champian deka bulih perais mata duit RM1,200 ditangkan RM1,000 lumur dua lalu lumur tiga bulih RM800 lalu tiga perais sinu ati bulih RM500.

Ba kategori nembiak sekula, champian deka bulih mai pulai duit RM1,000 ditangkanka RM800 ungkup lumur dua lalu lukur tiga bulih RM600 seraya tiga perais sinu ati nya RM300 tetiap seiku.

Pom dikena masuk pekit tu tau diambi ari Opis Pemadah Pelilih/Pelilih Mit di serata nengeri Sarawak.

Pekit tu ditutup kena 31 Julai tu ila lalu penerang ke silik agi tau diambi ari laman web www.penerangan.gov.my/sarawak tauka betelefon ngagai lumur 082-319735/319741/319742/319743.

KUCHING: Menteri ari Parti Rayat Sarawak (PRS) patut diberi megai pangku pengawa (potfolio) ti ngembuan kuasa ke tau dikena mantu sereta ngemansang rayat enggau kandang menua di menua pesisir.

Presiden PRS Tan Sri James Jemut Masing netapka PRS ukai semina minta sebarang aja pangku pengawa menteri tang dekaka pangku pengawa ke setipak.

“Pangku pengawa ke diberi patut ulih mai pemaik ngagai rayat kelebih agi di menua pesisir ke udah nyukung. Enti pangku pengawa enda engkeman tauka enda setipak, asaika aku nadai meh guna kitai nerima,”ku Masing ke mega Menteri Pemansang Tanah Sarawak.

Iya netapka, pangku pengawa ke dikearapka PRS patut bekaul enggau pekara pemansang infrastruktur di menua pesisir sereta pemansang pengawa betanam betupi.

“Sarawak nyadi nengeri ke penudi ba pengawa pemansang tanah, tanah di Semenanjung Malaysia udah abis dikemansang sereta pia mega enggau di Sabah.

“Tanah kitai di Sarawak agi mayuh bedau dikemansang.Berindik ari nya kitai begunaka pangku pengawa menteri ti tau ngemansangka tanah Sarawak,”ku Masing ba sebengkah aum pengarang berita pengudah ngulu aum ngenyit kaban Kunsil Tinggi PRS pagi kemari.

Ba aum nya, presiden sereta semua kaban kunsil tinggi parti enda lantang ati enggau pemutus Menteri Besai Datuk Seri Mohd Najib Tun Razak meri penuduk Sapit Menteri Dagang Temuai enggau Main Asal ngagai Datuk Joseph Salang anak Gandum enggau penuduk Menteri ba Opis Menteri Besai ngagai Datuk Joseph Entulu anak Belaun.

“Kitai selubang penemu netapka parti ti ngarika rayat di menua pesisir, PRS enggau SPDP enda diintu manah ba pekara nyirika menteri sereta pangku pengawa ke dipegai.

“Kandang menua pesisir kelebih agi di Sarawak semampai nyadi kubu tegap Barisan Nasional (BN). Enti kubu tu enda diintu enggau manah…engka dudi hari ila deka dirampas orang bukai,”ku iya.

Masing madahka diri deka betemu enggau Menteri Besai dalam awak ke semak tu bejuraika sekeda pekara nya.

“Aku deka ningaka penemu Najib ke alai aku mega deka minta basa manah ari iya berundingka baru pangku pengawa menteri ke diberi ngagai PRS.

Datuk Joseph Salang udah netapka pemutus enda nerima pangku pengawa nyadi Sapit Menteri Dagang Temuai enggau Main Asal ke alai iya minta penuduk nya diberi ngagai pengari PRS ke biak agi.

Ba kaul ke sama, Datuk Joseph Entulu mega udah ngelempaika pemutus ngagai Kunsil Tinggi PRS meratika penuduk iya ke diberi pangku pengawa nyadi Menteri ba Opis Menteri Besai.

Iya (Entulu) nitihka penerang ari Masing enda bangat setuju mangku pengawa ke diberi lalu minta diperunding disilih enggau pangku pengawa bukai ke setipak tauka ke tau dikena ngemansangka rayat enggau kandang menua kelebih agi di menua pesisir.

Nyaut tanya pemberita sekalika PRS deka ningkilka diri ari serakup BN enti pinta enda diberi perintah besai, Masing madah: “Ningkilka diri ari serakup BN nadai kala dalam runding kami. PRS semampai nyukung BN lalu kami semina enda tepantup ati aja.”

Nundaku Chairman PRS Bukit Assek, Kunsilor Duli Sanggau, sida enda lantang ati lebuh nemu Salang mengkang diberi pangku pengawa Sapit Menteri taja pan udah mangku pengawa nya kenyau ari semilan taun ke udah.

“Semua kaban PRS Bukit Assek asa ati laban Salang mengkang diberi pangku pengawa sapit menteri. Enti ulih, kami ngarapka iya diambi nyadi menteri penuh,” ku iya kemari.

Nitihku Duli, enti sema Salang dipadu nyadi menteri penuh, iya ulih mai mayuh agi pemansang ngagai raban bansa Dayak di serata nengeri tu.

“Nya alai, kami minta iya diperundingka baru ngambika diberi pangku pengawa nyadi menteri penuh, enda ngira ni bagi Opis Menteri,” ku terang iya.

Duli ke udah nyadi kaban PRS kenyau ari parti nya ditumbuhka madahka, Salang ngipak endar mangku pengawa nyadi menteri penuh dalam rintai kabinet ke ditebah Menteri Besai Hari Tiga tu tadi.

Iya mega gaga ati Kaban Parlimen Selangau, Datuk Joseph Entulu Belaun diambi nyadi menteri ba Opis Menteri Besai.

“Kami ngarapka sada penyukung parti ari tikas baruh dipending orang atas,” ku Duli.