Berita Sarawak ngatur PRN ba 2014 bula: Rundi

0

Penyakal sengaja nempa jaku selebubu, sepengudah PRU13 pengari BN deka meri servis ke rayat

KUCHING:  Sekretari Besai Barisan Nasional (BN) Sarawak Datuk Stephen Rundi Utom pechaya perintah nengeri enda deka ngatur Pengawa Bepilih Nengeri (PRN) ba taun baru (2014), iya nya setaun pengudah atur Pengawa Bepilih Besai Ke-13 (PRU13) diatur.

RUNDI

Pengudah PRU13 tu, mayuh bendar penerang enggau pelaba madahka Sarawak deka ngatur pengawa bepilih ba taun baru ngambika sama ulih ngatur seretai Pengawa Bepilih Besai (PRU) sebaka enggau nengeri bukai ba taun 2018.

Dr Rundi ngenggaika jaku selebubu nya laban naka kediatu nadai aum udah diatur, nya alai pekara nya enda deka nyadi.

“Naka ke ditemu aku, perintah nengeri nadai kala berandau enggau perintah besai ti ngemendarka Sarawak ngatur pengawa bepilih besai seretai enggau nengeri bukai.

“Kami nadai berandauka pekara nya,” ku iya ke mega Kaban Kunsil Nengeri (ADUN) Kemena.

Iya madah, ketuai BN Nengeri diatu deka belelak dulu sepengudah bebendar bekimpin mantu chalun BN ke bediri ba PRU13 tu tadi sereta numpuka pengawa meri servis ke rayat.

“Kami nadai masa sereta enda ulih ngatur pengawa bepilih ninting taun. Kami begunaka masa ke chukup mega bejalaika pengawa ke rayat.

“BN enda semina ngemeranka politik aja. Tang aruh gawa ke rayat, nya alai, kami begunaka masa ke chukup kena nukuka semua nya,” ku Dr Rundi madah ngagai The Borneo Post kemari.

Tandu Rundi, iya udah bansu ninga jaku raban penyakal ke madahka diri deka megai perintah. Berindik ari pengawa bepilih besai udah tembu diatur, diatu meh maya iya BN ngamatka semaya sida ngagai rayat.

Sarawak berengkah ari 1979, semina sebuah nengeri dalam Malaysia ke ngatur pengawa bepilih nengeri ke enda sebaka timpuh enggau nengeri bukai.

Nitihku ex-presiden Parti Sa’ati Rayat Sarawak(SUPP) Datuk Patinggi Tan Sri Dr Wong Soon Kai, perintah BN nengeri udah ngaga pemutus kediri enda deka disengkaum enggau politik di Semenajung Malaysia nya alai, perintah nengeri ngatur pengawa bepilih nengeri kediri empu (enda diserangkung sama dalam PRU baka nengeri bukai).

Ketegal ke udah nyadi tradisyen, Sarawak ngembuan peneleba ngatur pengawa bepilih nengeri (enda nyengkaum pengawa bepilih mit) ba takah dua tauka tiga taun nangkanka nya.