PILIH KAMI: George (kiba) enggau Wong maya pansut ari DUN pengudah aum ke diatur ngalihka lemai.

ADUN ke kala ngambu diri bakih BN nyukung Andrew ke diperambu PKR ngambika dipilih nyadi Senator

KUCHING: Parti Pekerja Sarawak (SWP) ke ngambu diri nelap sereta bebakih enggau Barisan Nasional (BN) ngelama tu enda nyata diayan lebuh pengawa ngundi perambu pangku pengawa nyadi senator ke alai semina dua iku aja pengari disa nitihka penemu Parti Keadilan Rakyat (PKR).

Kededua nya Kaban Kunsil Nengeri (ADUN) Pelagus George Lagong enggau ADUN Meluan Wong Judat ngundi Andrew Lo nyadi senator, ti dichalunka Chairman PKR Nengeri Baru Bian.

Chalun bukai iya nya Dayang Madinah Tun Openg ti dichalunka Datuk Fatimah Abdullah.

Madinah menang pengudah 53 iku pengari rayat ari BN nyukung iya dipilih nyadi senator, ti ngujungka iya mangku pengawa nya dua penggal.

Lo semina nerima sukung ari 17 iku ADUN ke  alai semua iya ari Pakatan Rakyat nyengkaum George enggau Wong.

Semua ADUN dipinta nyebut sekali ‘Yes’ tauka ‘No” , dikena nentuka sukung ngagai Lo tauka Madinah.

“Kebuah kami nyukung Lo, dikena “reciprocate” nama ke udah dikereja BN ngagai parti nya maya pengawa bepilih besai apin lama ke udah,” ku George ke mega Sapit Presiden SWP madah, lebuh ditelefon pengudah nya.

Ditanya sekalika lebuh nyukung Lo nunjukka SWP deka masuk PR, George madahka parti nya deka ngatur Aum Kunsil Tinggi Parti kena 25 Mei tu.

“Pemutus (sekalika masuk tauka enda) PR deka dikerandauka maya aum (kunsil tinggi parti) nya ila sereta pemutus digaga bepelasarka pemutus ari kaban parti maya aum besai (AGM) parti nya ila.

“Maya AGM diatur deka dikerandau sereta ditukuka maya aum tinggi parti kena 25 Mei tu,” ku George.

Hari Tiga apin lama, presiden parti nya Larry Sng madahka pemutus deka masuk PR nya pemutus kolektif.

Iya meri timbal ngagai Sekretari DAP Chong Chieng Jen ti mai SWP masuk PR enggau syarat parti nya (SWP) nitihka atur enggau polisi PR lebuh gawa ke rayat.

Naka ke diatu semina sebuah aja rumah buding nya tembu nguna kereban ke dianjung pemekal sebedau tu.

Irok Industries Sdn Bhd, kontrektor ke betanggungjawab ngaga rumah nya madahka diatu sida benung ngiga pemekal baru ungkup projek ke patut iya tembu bulan ba March tu tadi.

“Kami udah mesan kereban dikena ngaga dua buah rumah buding dua bulan ke udah tang kereban ke dianjung naka ke diatu semina chukup dikena ngaga sebuah rumah aja,” ku Menijer Besai Irok Industries Alexander Asing Sadai lebuh ke dikerandau kemari.

Alexander madahka serikat iya bedau ulih netapka maya projek nya deka tembu nyentuk ke sida bulih pemekal ke baru.

“Kereban ke dipeguna ari Semenanjung datai dalam kandang seminggu,” ku iya.

Penyampau RM2 juta udah diungkupka dikena begagaka dua buah rumah buding ungkup nembiak sekula di Punan Ba kira dua jam pejalai ari Bandar Belaga.

Charan nguna konkrit lempung pasang siap deka dipenggau begagaka rumah nya ngambika jampat agi tembu.

Dalam bulan Januari 2012  berandah rumah buding indu SK Punan Ba rubuh ti ngujungka 23 iku nembiak sekula dia bebadi.

Sekumbang ari nya, rumah nya enda dikena nyengkaum rumah buding lelaki seraya nembiak lelaki ngenduh di Rumah Sebiro betiban enggau sekula.

Bala nembiak indu ngenduh di rumah kepala pengajar enggau rumah pengajar Arifin Madon seraya nganti rumah buding nya tembu.

Cherita bekaul rumah buding SK Punan Ba ditemu mensia mayuh lebuh seiku apai indai nembiak dia nganjung gambar ngagai  The Borneo Post ngayanka bala nembiak ke tinduk ngachir sereta besekut di rumah buding ke endur ngenduh enda lama nya.

SELAMAT HARI GAWAI: Chairman pengatur Akau (tengah) ngulu raban gereja nyeradak Ai Pengayu.

KAPIT: Raban Katolik ari Gerija St. Mary Immaculate Conception udah ngatur sembiang misa kudus kena Hari Minggu tu tadi (19 Mei ) ke diungkupka pengerami Pentekos enggau Gawai Dayak.

Betuaika Parish Priest, Father David Ho iya madahka sembiang misa kudus nya sebengkah pekara ke diintu raban gerija seraya sida ngintu Minggu Pentekos  iya nya pengerami 50 hari pengudah Easter lebuh Roh Kudus datai ngagai rasul laban deka ngayanka kuasa pengerindu Tuhan  Jesus enggau pengerami Gawai Dayak.

“Pentekos nya sebengkah gawai ungkup raban gerija lalu Gawai Dayak nya pengerami bansa Dayak lalu kededua nya bisi bendar tuju kediri empu,” ku  father David Ho dalam jaku iya ngagai orang ke datai besembiang sehari nya.

Iya ngelalau sida ke ngintu Gawai nyambut pengerami nya nunda chara Katolik.

“Seraya kitai ngerami Gawai lakka Roh Kudus enggau nuan lalu nagang kita ari kelalu ngirup ai bisa,” ku ajar iya.

Sembiang misa kudus nyambut Hari Gawai nya nyeremin raban bansa 1Malaysia ke datai ari mayuh pupu raban bansa ke ngena pekayan asal bansa diri.

Sekeda ari bala ke datai tebal agi nya Iban, raban Orang Ulu baka Kayan, Kenyah enggau Sekapan, Melanau, seiku Kadazan ari Sabah, seiku Sino-Pakistani (Dr. Ignatius, lutur ngeli ari Semenanjung Malaysia), Tanjong, Bidayuh, India enggau China.

Legit pengerami nya nyeradakka Ai Pengayu diketuaika chairman Gawai Mass, Akau. Tembu sembiang nya, genap iku orang diberi kueh asal Iban ke dikumbai ‘kueh chuan’.

Sekeda orang ke bisi datai sembiang nya Residen Kapit Dahim Nadot enggau bini iya Francesca Bawing Bilong, chairperson Marian Guild Agnes Jemat, katekis Kenneth Kanyan enggau Edward Antas, kunsil parish enggau raban pastor China enggau urung 800 iku raban gerija.

KUMANG ENGGAU KELING: Rabecca (duduk ba tengah) enggau Fidelis (bediri ari kiba) begambar enggau pemenang ti bukai sepengudah pengawa nyuaka perais malam ensanus.

BINTULU: Endu Rabecca Gerang, 22, mujur teulihka gelar Kumang Gawai 2013 ngalahka lima iku dara bajik ke bukai ba pekit Kumang Gawai ti diatur beserimbai enggau pengerami Makai Lemai Mantar Gawai Pelilih Menua Mit Sebauh ti diatur ba Balai Raya Sebauh, bedau lama ke udah.

Enggau pemujur bulih gelar kumang tu, Rabecca nerima perais mata duit sepenyampau RM800  sereta selampai, bungai enggau trofi.

Lumur dua pulai ngagai Terisa Leja Alin, 19, ti nerima perais mata duit RM600 lalu lumur tiga pulai ngagai Fionalyn Emu Bujang, 20, ti nerima perais mata duit RM400 lalu kededua seduai iya mega sama bisi nerima trofi enggau bungai.

Ba Pekit Keling Gawai, Fidelis Parin Nibon, 20, udah teulihka gelar Keling Gawai 2013 ngalahka tujuh iku bujang sigat ti bukai.

Fidelis nerima perais mata duit sepenyampau RM800, trofi enggau hamper.

Lumur dua pulai ngagai Nicholas Salang, 25, ti nerima perais mata duit RM600 lalu lumur tiga pulai ngagai Joiani Januoh, 35, lalu kededua seduai iya mega sama nerima trofi enggau hamper.

Ba pengerami tu, urung 1, 000 iku peranak Menua Sebauh bisi datai nyengkaum pemesai ari opis perintah enggau swasta sereta mega raban orang dagang ba menua tu empu.

Malam nya mega, mayuh bengkah program diatur nyengkaum tanda asal bansa Iban baka ngajat, pekit pemanah ai tuak sereta diperindang penyanyi tebilang Iban iya nya Joicy Menti.

Menteri Muda Perengka Guna Mensia Mayuh (Bekal Ai Enggau Telekomunikasi) Datuk Dr Stephen Rundi Utom, Kaban Parlimen Pelilih Menua Bintulu Dato’ Sri Tiong King Sing, Pemesai Pelilih Mit Menua Sebauh David Kala, Pemancha Utong Sigan enggau Penghulu Michael Lanyau Ruma antara ke bisi datai.

Chairman komiti pengatur, Dennis Ngau madah, maya nya diubah ngambika mensia mayuh ke bedau meli tikit ulih meli tikit dikena ngulu pengerami nya.

“Kami gaga bendar ati laban pengerami nya bulih timbal manah ari mensia mayuh. Kelimpah ari nya pengerami keterubah suba nya deka diatur di balai raya mega udah ditukar ngagai Koridor Musikal di Eastwood Valley Golf and Country Club ngambi alai ke besai agi dikena napi mayuh agi pengabang,”  ku iya kemari.

Iya nambahka, pengerami nya diadangka digulu Sapit Kepala Menteri Datuk Patinggi Tan Sri Alfred Jabu Numpang enggau Menteri Muda Main Asal enggau Pesaka lama, Liwan Lagang.

Dennis nambah, lebih 100 mija bisi dijual ngagai mensia mayuh ke ulih muat 1,000 iku pengabang lalu tetiap mija dijual nengah rega RM500 enggau RM1,000.

Sekeda aktiviti ke deka diatur malam nya ila Pekit Kumang/Keling enggau Keligit.

Tikit tau dibeli nengah betelefon ngagai Caroline Siburat ba lumur 013-5682378 tauka Kitty Rumah Dayak Miri (085-435467).

Pengerami nyambut Gawai Dayak Peringkat Pelilih Miri sekali tu diatur Gempung Gerempung Orang Ulu Malaysia (FORUM) enggau Opis Residen Miri.

Menteri Muda Pemansang Menua Pesisir enggau Pekara Berumah  Sarawak, Datuk Francis Harden Hollis madahka, ubah pemansang maya ke diatu dikena ngubah runding nuju ngagai pemansang jemah ila.

“Kitai anang enda ngadang lalu berani neruska ubah dalam nempa jati diri enggau penuai runding,” ku iya.

Iya ke mega nyadi Kaban Kunsil Nengeri (ADUN) Simanggang bejaku munyi nya lebuh ke ditemu pengudah bejadika Pekit Main Bol diatur Serakup Main Bol Pelilih Sri Aman di Stadium Kompleks Sukan Pelilih Sri Aman, bedau lama ke udah.

Ku iya diatu kitai anang semina bemimpi aja tang numpu perati kitai ngagai pekara ngemansangka diri empu seraya ngubah kuing nuju pemansang.

Ku iya baru, perintah udah mayuh meri projek pemansang ngagai rayat, ukai semina di kandang mengeri tang enda tinggal mega ngagai rayat di menua pesisir.

Ku iya, rugi enti sema rayat enda ngambi awak tu ari segang pemansang lalu nya deka nasal pemansang rayat nya empu.

Kelimpah ari nya, ku iya rayat aruh ngetanka penyerakup bansa lalu bekerejasama sereta enda bepechah belah ke tau ngujungka penasal agenda politik pemansang ari perintah Barisan Nasional (BN).

Iya nyemetak madahka diri enda kala mantu apai iya sepemanjai timpuh PRU13 lalu nyerah penuh pekara tu ngagai Kunsil Tinggi  Parti dikena ngenukuka iya bisi ngereja utai nya tauka enda.

“Baka ke udah dipadah aku sebedau tu, aku terang madahka aku ngambi penemu tengah hari  ba aktiviti kimpin ngambika enda dipeda ngarika sepiak-sepiak.

“Tang enti sida (parti) madahka aku salah, aku nyerahka ngagai sida ba pemutus kepenudi bekaul enggau pekara tu,” ku Snowdan ke nyadi Kaban Kunsil Nengeri (ADUN) Balai Ringin.

Iya bejaku munyi nya ngagai pemberita lebuh ke ditemu pengudah tembu Bejadika Aum Keterubah Penggal Ketiga Kunsil Nengeri (DUN) Sarawak Ke-17 di Kompleks DUN ensana.

Presiden PRS Tan Sri James Masing sebedau tu kala ngelalau Snowdan bekaul enggau penuduk iya dalam parti enti apai iya agi keran deka betanding ngelaban chalun Barisan Nasional (BN), Masir Kujat di Parlimen Sri Aman.

Snowdan keterubah iya enda setuju enggau apai iya bediri tang nyau kelama diau diri laban menua tu ngamalka adat demokrasi lalu ngemendar barang sapa ti deka betanding.

Tambah Snowdan, enti sida bepikir iya mantu apai iya maya kimpin ayanka mega bukti laban iya arap enda tau nadai bukti ke ngayanka iya ngereja utai nya ambika chunto baka gambar-gambar enggau utai bukai.

AARON AGO

Seraya nya, iya diintu dikena ngenegap penyerakup sereta pemereti entara raban bansa di menua tu

KANOWIT: Pengerami ke diintu sesebengkah raban bansa ukai semina mandangka pengaya adat sereta basa tang dikena ngedut kaul sereta pemereti ati semua peranak menua tu.

Kaban Parlimen Kanowit Datuk Aaron Ago Dagang madah, program konsert Panggau Gawai Dayak 2013 ulih ngedutka kaul enggau bala pangan ari raban bansa bukai.

“Konsep penyerakup adat tu berindik ari pengerami ke diatur sereta mungkur mensia mayuh nengah program tu sereta patut dipajak belama dikena ngenegapka penyerakup entara pupu raban bansa di menua tu,” ku iya.

Iya bejaku munyi tu lebuh ke bejadika Panggau Gawai Dayak 2013 ba Dewan Opis Pelilih Mit ditu, malam kilah ensana.

Ku Aaron, iya meri terima kasih ngagai semua ke udah bejalaika pengawa ngelama tu sereta bediri tegap ba belakang perintah Barisan Nasional (BN).

“Kita patut nemu, pemujur ke dijapai aku maya pengawa bepilih besai tu tadi ngelaika rayat mengkang pechaya, tambah mega polisi pemansang BN tauka ketuai kitai majak tegap sereta deka ngemujurka pemansang nyapai juluk 2020,” ku iya.

Program ke diatur nya sebengkah pengawa ninting taun Radio Televisyen Malaysia (RTM) Sibu, lalu pengerami ke dirikut nya deka dibantaika nengah RTM tauka WAIFm kena 1 Jun tu lagi.

Program ke sekali tu sama bela dirami raban betanda ari Kusenitari Sibu, gerup muzik The Plotters Sibu, penabur berita WaiFm, Bunyau enggau Mujap enggau sekeda artis Iban baka Watt Rock, Florence Lo, Nur Syuhada, Peter Aaron, Wendy, Lucy M, Rosiana Urai enggau Rickie Andrewson.

Lebih 2,000 peranak ari mayuh pupu raban bansa ngelingi Kanowit datai ngulu Panggau Gawai Dayak 2013 ke dipejalaika pengelama empat jam diatur RTM Sibu enggau Unit Pemerindang RTM Kuching.

Sama bisi ngulu atur pengawa nya, Sapit Direktor Opis Penabur Sarawak Fee Lin Chiew, Pemangku D.O Kanowit Ibrahim Kipli, Sekretari Politik Kepala Menteri Sarawak Moris Gerry, Menijer Bagi Penabur RTM Sibu Albert Mentri Tudin, Pengatur Servis Iban SIBUfm Rapael Ampi enggau Ketuai Bagi Program RTM Sibu, Hasnah Ibrahim.

KEREJASAMA: PPKS ti diarika Baharuddin (tiga kiba) betukar MOU ti udah disain enggau MMCSB ti diarika Kamarulzaman (tiga kanan) bekaul enggau pengawa nyendiaka program pematih ICT sepemanjai umur. — Gambar Muhammad Rais Sanusi

KUCHING: Palan Pemansang Pengelandik Sarawak (PPKS) kemari mujur besainka sempekat pemereti ati (MoU) enggau Irshad HR Consulting Sdn Bhd (IHRCSB) sereta Multimedia Consulting Sdn Bhd (MMCSB).

Kerejasama entara PPKS enggau MMCSB nya deka ngemuntangka program ICT sepemanjai idup. Sempekat PPKS enggau IHRCSB iya nya IHRCSB deka nyendiaka pengajar sereta mantu PKKS bejalaika program latih ungkup kaban  klien.

Direktor Eksekutif, PPKS, Baharuddin Abdullah ngarapka kerejasama ulih mujur sereta nempa nembiak ti bekualiti dalam program ke dipejalaika begulai enggau  dua bengkah institut nya.

“Seharitu (kemari), PPKS enggau MMSCB deka berengkah bekerejasama nyendiaka latih program ICT sepemanjai idup ke orang besai tuai. MOU deka ngansak pengawa betukar penerang pasal pekara ti bisi reti ngagai sida ke nyain sempekat nya lebih agi dalam pelajar enggau program Pematih ICT, sistem enggau standard, perengka ngajar enggau kurikulum sereta mega standard sistem akreditasi enggau nomenclature of certification.

“Kerejasama PPKS enggau IHRCSB, nyendiaka servis bekaul enggau penyikap pengajar sereta sida mantu PKKS ngatur program latih nyengkaum servis consulting,” ku Baharuddin lebuh bejaku ba pengawa besainka MOU entara PPKS enggau IHRCSB sereta MMSCB ti diatur ba PPKS ditu kemari.

Nambahka nya, Chief Operating Officer MMCSB, Kamarulzaman Nordin ba pengerami ke sama, arap bendar kerejasama MMCSB enggau PPKS ulih nyapai juluk deka ngemansangka orang bepengelandik kelas dunya kelebih agi ba raban profesyenal rebak baru diatu.

Iya madah, modul Pematih ICT ke dipejalai nyengkaum IT Strategy and Governance; IT Service Management; IT Security; Project Management sereta pekara ke bukai.

“Diatu, program pelatih bekaul software nyadi komoditi standard, taja pia dunya ngelar ICT certification in Project Management tauka Service Management agi baru sereta bisi sekat,” ku Kamarulzaman seraya madah setipikit pematih ICT bisi peminta tinggi.

Kelimpah ari nya, Chief Operating Officer, IHRCSB, Ahmad Raji Yakub ba pengerami nya madahka pengandal ati diri ulih bekerejasama ba taun ke deka datai ba pengawa ngemansangka modal mensia Sarawak sereta Malaysia.

Iya madah, kerejasama profesyenal entara IHRCSB enggau PPKS nguntungka semua orang ke bisi sangkut paut.

Kami deka nyendiaka mayuh agi program inovatif, diatur kena napi guna pematih kedua-dua sektor korporat enggau sektor perintah ba Sarawak, ku iya.

“Enggau juluk ti deka nyadi siti kompeni konsultan bepelasarka solusi, kami deka gawa segulai sejalai enggau PPKS dalam pengawa mai pemandai ke jemah ila, ngambika ulih mantu nengeri Sarawak dalam Program Transformasyen, lebih agi dikena napi peminta guna pengereja pengawa lebuh manggai ba ytaun 2020,” ku Ahmad seraya madahka IHRCSB bekerejasama enggau PPKS dalam pengawa nyendiaka ‘training and consulting services’ ari taun 2010.

Orang mayuh ti deka nemu penerang silik pasal program nya tau meda ba website, www.ppks.edu.my sereta ulih nyelak enggau ngisi pom peminta sereta dianjung ngagai PPKS/iCAT di Tabuan Jaya berengkah Hari Satu ngagai Hari Lima maya jam gawa (8.00 pagi – 5.00 lemai).

TEMEGAH: Kaban Kunsil Nengeri (ADUN) Ba’Kelalan, Baru Bian temegah ati enggau perambu Kaban Kunsil Nengeri (ADUN) Dalat Datuk Fatimah Abdullah, ti minta Senator Dayang Madinah Tun Openg dipaduka baru nyadi Kaban Dewan Rakyat diterima DUN. — Gambar Kong Jun Liung

Iya ngalahka chalun ke diperambu penyakal, Andrew Lo Kian Nyan nengah majoriti 36 undi

KUCHING: Senator Dayang Madinah Tun Abang Openg dipilih baru nyadi Kaban Dewan Negara ke timpuh sepenggal agi.

Speaker Kunsil Nengeri Datuk Amar Mohd Asfia Awang Nassar madahka, nya berindik ari ti dipesetuju 53 ari 70 iku Kaban Kunsil Nengeri (ADUN) ke dalai ngulu Aum Kunsil Nengeri ba Hari Kedua lemai kemari.

“Bepelasarka pemutus nya aku madahka Senator Dayang Madinah Tun Abang Openg dipilih nyadi Kaban Dewan Negara,” ku Asfia.

Pengawa milih nyadi Senator tauka Kaban Dewan Negara nya kemari, ti dibantai Datuk Fatimah Abdullah (BN-Dalat) sereta disukung Datuk Amar Awang Tengah Ali Hassan (BN-Bukit Sari).

Timpuh pengawa Madinah ke nyadi Kaban Dewan Rakyat ba penggal keterubah ti dipaduka tiga taun ke udah sereta deka tembu kena 19 Julai 2013. Beduduk ari dipilih baru, Madinah deka bejalaika pengawa nyadi Kaban Dewan Negara ba penggal kedua.

Ba pengawa milih senator kemari Fatimah ti nyadi Menteri Pengintu Pengelantang, Orang Indu enggau Pemansang Ruang Bilik merambuka pengawa Madinah ke nyadi Kaban Dewan Negara patut dilanjarka ngagai sepenggal agi.

Iya madahka pemutus nya bepelasarka peneleba enggau penyulut ke dipandangka Madinah ngelama tu.

“Aku andal sereta arap bendar Madinah bisi pengelebih, pengelandik sereta peneleba ke chukup besai sekalika dalam pekara politik tauka gawa ke raban bansa iya nya mantaika juluk enggau guna Nengeri Sarawak sereta raban indu di Dewan Negara.

“Sejarah ruang bilik iya enggau pengawa iya ti nyadi aktivis sosial enggau politik, ti sama chakah enggau kaban bukai dalam macha, ijinsi perintah sereta Gerempung Ukai Dikuasa Perintah, nunjukka penegap enggau peneleba ti amat berega,” ku Fatimah,

Dalam pekara politik, berengkah ari taun 1983 dipaduka nyadi kaban PBB Pampang Satok, Senator Madinah seiku raban orang indu ti bagas sereta chakah bejalaika pengawa.

Madinah nyadi kaban Majlis Tertinggi Pergerakan Wanita PBB Sarawak ari taun 1987 nyentuk ke diatu, kelimpah ari ti mangku mayuh macham pengawa nyengkaum Setiausah Kehormat ari  taun 1989 ngagai 1995.

Nambahka nya Madinah nyadi Naib Ketua Pergerakan Wanita PBB Sarawak nyentuk ke seharitu sereta nyadi Ketuai Raban Indu PBB Pampang Satok, ke dipegai iya ari taun 1992.

Nengah surat nuju Kunsil Nengeri  kena 20 Mei, Madinah madahka diri deka bejalaika pengawa enti nyema dipilih baru.

Ba pengawa milih senator kemari, Baru Bian (PKR) merambuka Sekretari Besai Kongres Kesatuan Sekerja Malaysia Sarawak, Andrew Lo dipilih nyadi senator sereta disukung Wong Ho Leng (DAP). Taja pia enda disukung 53 ari 70 iku ADUN ke bisi datai ngulu aum kunsil nengeri lemai kemari.

NAMA BERITA?: Kaban Kunsil Nengeri (ADUN) Pakan, Tan Sri William Mawan Ikom (kiba) berandau seraya nanya ke berita Wong Ho Leng (ADUN) Bukit Assek penembu aum kunsil nengeri ba hari kedua lemai kemari. — Gambar Kong Jun Liung

Melor Janting

SERIAN: Seiku lelaki baka ke kena rasuk utai sebedau nancham diri empu nguna lungga ke lalu nabanka nyawa iya ke nyadi di Kampung Seruit tengah hari kemari.

Mansa, Melor Janting ,53, disahka parai di dalam penusah ke nyadi urung pukul 12.50 tengah hari nya.

Nundaku pengari ari polis, mansa sebedau tu ngeligan lalu nancham iya empu sebedau ditemu orang gegaring sereta bedarah.

“Raban MPV (Unit Kereta Pematau Polis) datai di palan ke alai penusah tu nyadi enggau bala  paramedik, tang maya sida ngampir mansa, iya ngenyit angkat terus nyerang raban polis.

“Tang taja pia iya ulih dipujuk sebedau rebah lalu maya ke diperesa bala paramedik, mansa udah enda benyawa agi,”ku iya.

Kepala Polis Pelilih Serian DSP Mohd Jamali Umi lebuh ke dikerandau ngesahka pekara tu lalu madahka pengawa tasat deka dipejalaika.

Dulu agi ari nya ku beberapa iku saksi, mansa dipeda pansut ari rumah di genturung pendiau nya tang gaya iya baka ke selama.

“Kemari iya ringat enggau menyadi indu tuai iya laban deka nganjung diri berubat ngagai sepital ketegal nyepi diri enda ulih tinduk kenyau ari seminggu ke udah lalu pagi tadi iya dipeda megai sebilah lungga lebuh bebelika ikan sebedau dipeda gegaring di mua rumah iya,” ku saksi.

Bangkai iya udah dianjung ngagai Sepital Pelilih Serian ngambika dibuntastasat.

Kes nya diatu dikumbai parai ngenyit seraya nganti pemutus buntastasat.

Iya diangkat ngemudika serakup tu pengudah ex -presiden William Ghani Bina ningkil diri empu ari mangku pengawa nya pengudah iya ke pinchin gawa nyadi pengajar.

Pangku pengawa sapit presiden diatu mengkang puang.

Bala mandal presiden nya Datin Diana Tay Ai Ai, Dundang Bantin, Iric Ambau, enggau Tan Kuang Wui.

Yong Ing Thung dipadu mangku pengawa sekretari besai dibantu mandal Fu Yung Yung.

Pemantu sekretari besai nya Daisy Ollivia Dominic, Morni Aksha, Theresa Panyup, enggau  Willis Unjie Ganyai seraya  Jong Lai Fook mangku pengawa nyadi tukang wang seraya dibantu Chan Chiew Sze.

Adress Indu Opis STU diubah ngagai  “Setiausaha Agung, Sarawak Teachers’ Union, Wisma STU, Lot 10966, Jalan Song, 93350, Kuching, Sarawak”.

Enggau nya semua pekara bekaul enggau serakup tu deka dipegai bala pengereja pengawa ba palan baru nya.

Serakup tu tau mega ditelefon nengah lumur  082-575120 tauka lumur faks 082-574120, tauka email swktu@streamyx.com.

Sekretari EXPOAM Pampang Sarawak Mohd Poasa Sahar madahka nadai pengawa bepilih tauka bechiri deka diatur maya nya ila.

“Kami semina deka milih dua iku raban selama ngarika EXPOAM Pampang Sarawak ngagai Aum Besai  EXPOAM Pusat ke deka diatur di Taiping Perak bulan Jun ila,” ku iya.

Bekaul enggau nya Poasa ngelalau semua raban sida datai ngulu aum nya kelimpah ti milih pengari, sida tau mansutka penemu diri tauka perambu ngambika meri penguntung ngagai semua sereta gerempung.

Program ke diatur Kem PLKN Junaco Park begulai enggau Opis Residen Bagi Menua Sibu nya mega digulu pengari Residen Sibu, Brin Munsang, komanden kem Lt Kol Mohd Melintang Abdullah sereta Penghulu James Semilan.

Ku James, program nya diatur dikena mandangka ngagai raban pesereta PLKN kelebih agi ari Semenanjung Malaysia ba jalai pengidup peranak di rumah panjai.

“Pengawa tu diatur kelebih agi mandangka ari sukut pendiau pengidup enggau adal asal bansa Iban, kelimpah ti mantaika chura pengidup ti semampai beserakup enggau pangan diri entara peranak rumah panjai,” ku iya.

James mega madah, mayuh macham aktiviti udah diatur sepemanjai program baka pengawa beripai meresi kandang rumah panjai sereta ngechat bansal jelatung.

Raban pesereta ku iya, mega dibantaika enggau pengawa ngaga kuih asal bansa Iban baka ‘sarang semut’ enggau ‘chuan’.

“Pelatih mega diberi awak mantaika pengelandik diri nyumpit,” ku iya seraya madah semua tu endang meri besai reti ngagai sida kelebih agi ke datai ari Semenanjung Malaysia.

Kelimpah ari nya mega, ku iya, pesereta dipandangka enggau pengawa ngerebahka ranyai iya nya tetiap iku pesereta dipinta ngajat ngelingi ranyai nya.

Ku tandu iya, semua pesereta enda ngira ari bansa India, China enggau Melayu mega diasuh ngajat ngelingi ranyai, seririh enggau konsep 1Malaysia.

“Kitai berasai gaga ati laban penatai sida ke Rumah Jimbun tu lalu kami ngarapka sida deka datai baru ila ngagai rumah-rumah panjai ke bukai di Bawang Assan.

“Dikearap pesereta pulai mai kenang ke manis maya pulai ke menua diri empu,” ku James.

Nitihku iya, semua projek ke diperambu sereta iya ke deka dipejalaika enda deka meri sebarang asil enti enda ngelantangka ati rayat.

“Nya alai, perintah dalam pelasar iya amat ngarapka semua projek ke diperambu bejalai enggau lanchar sereta meri penguntung ngagai rayat,” ku iya.

Iya ke mega nyadi Kaban Kunsil Nengeri (ADUN) Simanggang bejaku munyi nya lebuh ke ditemu pengudah penemuai iya ngagai Rumah Naggles Lambai, Sungai Tandok Undop, bedau lama ke udah.

“Nya alai, tanggungpengawa tuai-tuai raban bansa enggau kaban Komiti Pemansang enggau Pengelikun Gneturung Pendiau (JKKK) di sesebuah kandang menua nya beguna amat dalam matau setiap projek ke digaga  perintah ngambika seruran senutuk enggau peneka rayat.

“ Kitai enggai meda bisi orang beambi ulih ari serekang penemu antara diri sama diri  lalu ngujungka rayat nya empu bulih pengerugi,” ku iya.

Bisi datai mega nyempulang iya Pemuda Parti Sa’ati Rayat Sarawak (SUPP) N.27 Simanggang, Patrick Micheal Dian enggau Kunsilor Sawing Sumar.

Ba penemuai iya, Francis mega nyuaka geran perintah sepenyampau RM5,000 ngagai JKKK nya dikena sida bejalaika aktiviti sepemanjai taun.

Bala indu tu bejaku dalam Jaku English datai lalu ngampir orang ke ditaga sida ba sebelah kedai kopi enggau palan bejualka barang lalu mandangka famplet minta duit mantu orang di menua nya,” ku Mohamad Saruji madah ngagai  The Borneo Post kemari.

Nundaka Saruji, peranak Miri mentas enggau orang ke kurang benasit lalu deka meri duit enti sida diampir raban ke begumpulka bantu nya.

Iya madahka, kami enda nemu senentang pengamat sida ke begumpulka duit bantu nya laban ke dipeda nusuk palan bejualka barang enggau kedai kopi besehari-sehari.

Bekunsika penemu ke sebaka, Sim Boon Tee, 45, madahka, sekali iya udah diasuh meri ngagai raban pengelantang pendiau nya baka ke dipandang sida indu nya.

Seraya nya, sebengkah survei udah digaga The Borneo Post beratika sida tu bejalai bepasang lalu ngampir orang ke ditagit sida udah nya mindah ngagai palan bukai.

Orang ke dituduh , Voon Jong Pau, 36, ari Kampung Lereng Bukit ngaga aku nya di mua  Majistret Lovely Natasha Charles udah kes tuduh iya dibacha tukang penyalin jaku kot ba iya .

Iya didawa ngereja penyalah nya pukul 10.30 malam, 14 Mei di sebuah kedai di Boulevard Commercial Centre ditu.

Ba penyalah nya, ke dituduh tu udah didawa nitihka Seksyen 5 (2) Ordinan Hiburan 2001 ke ngungkupka ukum enda lebih ari RM20,000 tauka ukum jil lima taun tauka kedua-dua nya dipejalaika sekali, enti salah.

Udah ninga aku enda salah ke dituduh, kot netapka 12 Jun tu dikena ngemaska  kes lalu  24 Jun ditetapka hari bechara.

Seraya nya ke dituduh dilepas tang enggau ikat jamin RM3,000 sereta dua iku penjamin.

Taja pia, lima iku lelaki, nyengkaum dua iku sida nya tuai umur ditangkap maya nya urung pukul 5 lemai.

Tiga iku manuk sabung enggau sekeda rengka sabung mega ditangkap maya nya.

Ku berita, bala lelaki tekenyit tepedaka raban polis datai ngagai kandang endur dia.

Bisi nya begadai nyawa terejun ke ai ngerarika diri ari polis.

Semua saspek beumur 40-an ngagai 60-an udah dibai ngagai Balai Polis Sentral ngambika ditasat.

Lelaki beumur 18 taun maya nya enggau bakih iya dikelingi lapan iku lelaki ke enda dikelala dalam penyadi urung pukul 12 tengah malam nya.

Bala saspek ngerampas duit, dokumen ke beguna sebedau  chechapu ngerarika diri.

Mansa berasal ari Kampung Pasir Pandak nadai diapanama.

Riput polis digaga ngambika kes ditasat.

ALFRED JABU

KUCHING: Dalam kandang dua taun ke udah, bisi 46 buah stesyen pengawa betanam betupi udah dikemendarka ngambika dikemanah ba sitak Krian, Saratok.

Nyentuk ke diatu, 41 buah stesyen udah tembu digaga lalu sekeda agi dalam renggat pemansang.

Sapit Kepala Menteri Datuk Patinggi Tan Sri Alfred Jabu madah stesyen pegawa betanam betupi ke udah tembu dikemanahka deka dijaga pemadi nadai pan seiku pengereja pengawa nyaga pemansang nya.

“Staf nya nyadi orang penyambung enggau ijin pengubah entara Opis Betanam Betupi Sarawak (JPS) enggau komuniti betanam betupi di kandang menua pesisir,” ku iya.

Iya madah munyi tu lebuh nyaut tanya ari ADUN Krian Ali Biju ke nanya berapa buah stesyen pengawa betanam betupi ke udah diidupka  baru ari dua taun ke udah, lalu nanya perambu perintah bekaul enggau stesyen pengawa betanam betupi nya, ba Aum Hari Kedua Aum Kunsil Nengeri (DUN) ke-17 di Kompleks DUN ditu, kemari.

Ku Jabu nandu, stesyen pengawa betanam betupi nya nyadi ‘forward-based stations’ ke deka dikena JPS nyadi palan nyendiaka servis teknikal, program pemansang ekonomi diri sebilik enggau program pemansang pengawa betanam betupi, ngambika efisien sereta engkeman ke orang betanam betupi lebih agi sida ke diau di menua pesisir ngambika jampat agi transformesyen pampang pegawa betanam betupi ulih digaga sereta ulih nyungkak penatai pemisi raban orang betanam betupi nengah atur projek industri kebun baka sawit enggau getah.

Ba Tanya enggau Saut nya mega Jabu nyaut tanya ari ADUN Tamin, Joseph Mauh Ikeh ke deka nemu berapa buah rumah e-kasih ke udah digaga di sitak N52 Tamin lalu berapa buah agi ke deka digaga enggau penyampau ungkup dibagi kena ngaga projek tu.

Jabu madah Perintah udah ngemendarka geran urung RM4 juta kena ngaga 197 unit projek e-kasih, iya nya Program Bantuan Rumah (PBR) ke taun 2010, 2011 enggau 2012 ke sitak Tamin.

Kelimpah ari nya, iya madah, taun tu perintah udah ngemendarka geran urung RM2.36 juta kena ngaga 57 unit projek PBR.

Sebedau nya, Menteri Muda Perengka Guna Mensia Mayuh (Ai) Datuk Sylvester Entri madah atur pengawa ngaga projek ai beresi ke sitak Belingan/Tanjung Asam di Saribas udah tembu kena 31 Disember 2012 tu tadi.

Enggau penembu projek tu, iya nyendiaka ai beresi ngagai Kpg Belingan, Kg Sebemban enggau Tanjung Asam.

Ku Entri baru, Perintah mega udah nganjung peminta rayat di Saribas ngagai Opis Menteri Pemansang Menua Pesisir enggau Kandang Menua (KKLW) minta ai beresi disediaka nengah projek Sadang Bekal Ai Tuie/Supa/Medang enggau Manggut dipasukka dalam GTP 2.0.

Ba tanya ari ADUN Engkilili Dr Johnichal Rayong bekaul enggau perambu Perintah deka ngemanahka Jalai Lidong, Betong/Nanga Skrang 10km ke Sri Aman sereta ngaga Jematan Batang Lupar kena nyambung jalai-jalai ba sitak nya, saut Menteri Pemansang Infrastruktur enggau Penyambung Dato Sri Michael Manyin madah perambu ngaga Projek Jalai Betong/Lidong/Sri Aman nyengkaum  jematan Batang Lupar udah dianjung ngagai perintah besai ngambika diperunding nengah Lumpar Pemansang Malaysia Ke-10 (RMK-10) Rollin Plan (2014-2015).

Ba Tanya enggau Saut nya mega, tanya ari ADUN Balai Ringin Snowdan Lawan bekaul enggau kereja ngemanahka Jalai Mugah ngagai Batu Kepit, Simunjan, renggat keterubah (Fasa I) mungkur jalai pemanjai 2.7km, Menteri Muda Pemansang Infrastruktur Datuk Daud Abdul Rahman madah projek ngemanahka jalai nya udah tembu dalam taun 2012 ngena ungkus urung RM500,000.

Daud nambah, Renggat II (Fasa II) ke deka digaga manah agi mungkur jalai pemanjai lebih 2.4km, dipelaba penyampau ungkus ke deka dikena ngaga renggat kedua tu urung RM400,000.

Pengawa ngaga Renggat II tu ku iya, agi nganti pemendar geran ari perintah.