Opis MIDA di New York optimis enggau ekonomi AS 2010

0

NEW YORK: Taja pan 2009 nyadi taun ti nadai ngenataika penguntung ngagai agensi-agensi menua luar di New York ke bejalaika tanggung pengawa dagang menua Amerika Syarikat ngagai menua-menua luar, sida seruran optimis enggau ekonomi menua nya ba taun 2010 ti deka datai.Pengerembai positif berengkah mansut ke asil dalam penusut ekonomi sekumbang dua taun ti udah lepas.

Pekara tu mega diasai Opis Pemansang Dagang Industri Malaysia (MIDA) di New York ti bejalaika tanggung pengawa narit dagang ngagai menua Malaysia.

“Kami bisi ngasaika tanda-tanda ekonomi berengkah nyulut kena ujung taun tu lalu kami optimis enggau pekara tu lalu tu diadang ulih negapka ekonomi dunya,” ku Arham Abdul Rahman, Tuai MIDA New York lebuh ditemu pengarang berita Bernama.

Arham ti udah setaun bejalaika tanggung pengawa sekumbang pun taun 2009, madahka taja pan dagang di Amerika Syarikat udah nyulut manah, sektor swasta agi betati lebuh deka bejalaika dagang sida.

“Enti dipeda diatu, sektor swasta agi bedau ba tikas ke baruh,” ku Arham. Enggau nya ku iya, Opis New York agi beratika pekara tu.

Iya madah perintah menua Malaysia udah bejalaika atur liberalisasi ngagai 27 subsektor ba sektor servis nyengkaum pengerai enggau sosial, dagang temuai, pengangkut sereta dagang ti bekaul enggau komputer.

“Atur liberalisasi subsektor tu dipejalaika dikena nyendiaka makit dagang ke ulih narit orang dagang bedagang dalam sektor teknologi lalu tu ulih meri peluang kereja ke tinggi.

“Atur tu dikena ngemanahka sektor servis di Malaysia setanding enggau menua bukai,” ku Arham.

Iya mega udah bejalaika atur promosi peluang dagang ba Malaysia ngagai mayuh kompeni di menua Amreika Syarikat.

“Aku bisi ngembuan siti lis kompeni-kompeni ke deka bejalaika pengawa dagang ba Malaysia tang ketegal penusut ekonomi, sida agi kakang ati deka bejalaika pengawa dagang di menua kitai.

“Enggau nya, kitai enda nemu sida deka neruska niat sida tauka enda,” ku iya lalu nambah iya optimis enti sepengudah ekonomi Amerika Syarikat nyulut, kompeni-kompeni menua nya deka ngerambaika pengawa dagang sida ngagai menua luar.

Arham madah, taun 2009 nyadika taun ti nadai ngenataika untung ukai semina ngagai menua Malaysia tang mega ngagai semua agensi dagang menua luar di New York.

“Kami udah ngasaika penusut ekonomi enggau dagang ba taun 2009 lalu nya bekaul terus enggau penusut ekonomi di Amerika Syarikat ke mega nyadi menua ke bejalaika ungkus dagang ke besai di menua Malaysia ba taun 2008.

Taun tu, Malaysia udah narit lebih AS$2.4 biliun bagi 22 projek iyia nya 10 projek baru lalu 12 agi pengerembai operasi ulih Amerika Syarikat di Malaysia,” ku Arham.

Ke diatu, Arham bisi di menua California mantu raban delegasi MIDA ari Malaysia, ti betuaika Tan Sri Dr. Sulaiman Mahbob. Iya gaga ati enggau minat sida ke enggau ba seminar dagang nya.

Seminar nya udah narit bisi 132 orang ngarika kompeni-kompeni Amerika Syarikat. Sulaiman mega deka bejalaika atur baum enggau tuai-tuai eksekutif ari 20 kompeni di Santa Clara lalu mega baum enggau 10 pengari ke bukai ari Los Angeles.

Perintah Malaysia, ku Arham udah berengkah bejalaika atur deka nikika stindit ekonomi Malaysia ari tikas tengan pemesai ngagai tikas ekonomi ke tinggi.

“ Enggau nya, model ekonomi kitai diadang berubah ari sektor ti bepelasarka orang gawa tengan pengelandik ngagai model ekonomi ti bepelasarka sektor teknologi tinggi engau sektor servis moden ti bekenaka orang landik ari menua kitai empu,” ku iya.

“Menua kitai ngembuan prasaran enggau sistem agih ke manah sereta raban orang gawa ke ngembuan pengelandik ke tinggi, Malaysia nyendiaka diri nyadi palan ukai semina bejalaika dagang ngagai menua Amerika Syarikat, India enggau China tang mega bagi makit dagang dalam menua Asean,” ku iya.

Atur narit kompeni-kompeni Amerika Syarikat tu ku  Arham deka meruan dipejalaika ba taun 2010 tu ila lalu iya mega ngarapka gaya ekonomi dunya majak nyulut jauh lebih manah ari gaya ekonomi ba taun 2009. — Bernama