KUCHING: Siti chara baru kena ngulihka raban baru iya nya nengah chara ngulihka siku raban lalu raban nya deka mai siku agi raban bukai deka mutarka dulu nengah aum kunsil besai sebedau iya deka dikemendarka.Ku Presiden Parti Progresif Demokratik Sarawak (SPDP) Dato Sri William Mawan Ikom madahka enti penemu tu udah dikemendarka ila, iya meri timpuh dalam kandang tiga bulan beratika chara tu ulih dikena tauka enda.
“Enti chara ngulihka raban baru tu dikemendarka ba aum kunsil besai ila baru aku madah ngagai raban parti bukai ba sekeda sitak sereta pampang opis SPDP serata menua pasal pekara tu.
“Sida iya enda tau enda komited pasal pekara tu lalu aku deka meda pemansang iya dalam kandang tiga bulan nya ila laban tu chara iya kitai nyukat pemujur objektif tu….Aku empu deka beratika tu.
“Nadai guna enti kitai semina bejaku deka mai 1,000 iku orang, chukup enti siku raban ulih mai siku raban bukai. Enti deka besemaka dalam kandang tiga bulan nya ila, siku raban ulih mai tiga iku, iya deka nyadi pemansang ke manah tang taja pia sebedau iya di kemutarka kitai patut beratika sekeda atur iya dulu, baka enda tau ngambi raban ari parti bukai…..Nadai jalai pandak baka nya,” ku iya madah ngagai pengarang berita udah abis mantaika jaku gulung iya ba atur pengawa Aum Besai Tiga Taun Sekali (TGA) Kedua SPDP ditu, kemari.
Taja pia iya madah ngagai raban parti anang kelalu ngemerat ngulihka raban baru dataika enda kiruh pasal pemerat parti ba ruang bilik ke nyadi komponen parti Barisan Nasional (BN).
“Enti raban baru nya masuk BN, tu enda ngachau SPDP ke nyadi entara parti komponen dalam BN.
“Enti nyukung BN kitai enda irau, asal enda masuk parti penyakal. Ba pengawa beratika BN terus lekat ba hati rayat, renggat pun menua patut terus neritka kaul sida iya enggau parti komponen bukai ba BN,” ku iya.
Ba pengawa deka nambah raban parti Mawan nyamin deka meri sebarang baka bantu ngagai sitak tauka pampang SPDP.
Ba pekara bantu nya mega, bisi sekeda raban parti mantaika penanggul ngatur mayuh macham pengawa bekait ngangkatka SPDP ba siti-siti sitak.
Maya mending nya, Mawan ke beratika penanggul nya madahka iya deka nemuai ngagai tiap sitak SPDP nitihka atur ke udah di tetapka.
“Ba Opis Indu SPDP kami deka ngemutarka pejalai kami nemuai ngagai sitak SPDP. Kelebih agi ngagai sitak ti bedau kala di gagai kami,” ku iya.
Ba atur pengawa ke sebaka mega, raban parti meri penemu sida iya ngasuh pemesai SPDP beratika pemujur pengawa ba renggat pampang deka bejalai enggau manah sereta patut putarka enggau jampat.