Blog palan alai bejurai sereta bekunsika penemu

0

www.williammawan.com deka nyadi endur bejuraika pekara pasal politik, pelajar, pemansang enggau sosial

KUCHING: Ruai siber www.williammawan.com benung digaga lalu dipelaba tembu ba ujung bulan Januari taun baru tui ila.Presiden Parti Progresif Demokratik Sarawak (SPDP) Dato Sri William Mawan Ikom madahka laman web nya ila deka mantaika mayuh macham pekara ti bekaul enggau politik, pemansang, sosial, dataika ngagai pekara pelajar.

“Laman web nya diatu benung digaga lalu dipelaba tembu ujung bulan Januari 2010 tu ila.

“Laman web nya ila deka mantaika mayuh macham interaksi ari pekara ti bekaul enggau politik datai ngagai pelajar. Kira ke udah maya iya ngaga blog tu laban enti diperatika mayuh endar blog ke bisi dibantai kemaya hari tu lalu nya siti chara ke popular dibacha mensia mayuh,” ku iya madah ngagai Utusan Borneo kemari sepengudah bejaku ba atur pengawa Gempuru Besai Tiga Taun Sekali (TGA) Parti Demokratik Progresif Sarawak (SPDP) ba Dewan Suarah ditu, kemari.

Mawan ti mega Menteri Pemansang Sosial enggau Urbanisasi madahka ba lama web tu ila, bisi mega palan alai berandau, kelimpah ari kair blog tu enggau sekeda blog gerempung Dayak bukai.

“Laman web nya muka peluang ngagai mayuh macham gerempung Dayak alai sida iya ulih bejurai tauka berandau pasal siti-siti pekara. Aku bekaul terit enggau gerempung Dayak baka Sarawak Dayak Graduate Association (SDGA), Sarawak Dayak Iban Association (SADIA), Sarawak Dayak National Union (SDNU) enggau Dayak Chamber of Commerce Industry (DCCI).

“Peragam ati aku postif pasal pekara tu. Kemaya hari tu kitai enda ulih semina macha ari surat berita aja, blog tu siti chara palan alai berandau ke berat mega, nya alai kebuah aku ngaga laman web tu,” ku iya.

Mawan mega madahka laman web nya ila mega dibuka ngagai tiap renggat orang mayuh.

Kelimpah ari nya mega, laman web tu mega siti palan ke ulih alai bala mayuh betukar sereta bekunsi penemu sida iya bekaul enggau pengerembai berita kemaya hari tu.

“Tang taja pia, laman web tu ukai nyadi palan ‘beperang jaku’ enggau mensia mayuh tang siti ari chara kitai beterang pasal pekara ke betul kelimpah ari palan alai berandau,” ku iya.