SRI AMAN: Bala nembiak patut nyendiaka diri napi ubah jeman, pia ku Penulung Menteri Dagang Temuai enggau Pemansang Betanam Betupi Sarawak, Mong Dagang.Ku iya, dunya ke majak mansang sereta mayuh beguna ke penemu ti bekaul enggau teknologi meransang bala nembiak ngering diri sereta nyeliahka pengawa ti ulih ngerusakka pikir runding sida.
“Bala nembiak lebih agi ke benung belajar patut meruan ngemeranka pelajar sida lalu enda bejalaika pengawa ti nadai ngenataika asil ti ulih ngemai pengerugi ngagai sida, diri sebilik enggau mega menua.
“Tajapan kes-kes sosial ti bekaul enggau bala nembiak kelebih agi di nengeri tu ulih ditagang, tang kitai mesti meruan betati awakka sida enda ngereja pengawa ti ulih meri pengerugi ngagai sida,” ku iya.
Iya ke mega Kaban Kunsil Nengeri (ADUN) Bukit Begunan mansut ke jaku nya lebuh bejaku ba atur nutup Kus Motivasi Remaja Cemerlang 2009 ti dipejalaika Jawatankuasa Kebajikan Kanak-Kanak Daerah (JKKD) Sri Aman enggau kerejasama Jawatankuasa Pengurusan Masjid Darul Syarikin, Gabung 7 JKKK Kampung Muhibbah sereta RPR Sri Aman ba Dewan Mesyuarat Kompleks Sukan Opis Pemansang Sosial enggau Urbanisasi (KPSU), Sri Aman ditu, kemari.
Mong madah, penegap sereta pemujur siti-siti menua bepanggai enggau rayat iya lalu ukai semina bepanggai enggau pemansang menua nya aja.
“Nembiak rebak baru nyadika pelapis ngemansangka menua tu. Enggau nya, sida patut meruan sedia napi chabar enti dibandingka enggau jeman kelia.
“Nyadika chunto ari segi sida ngena gari, suba enti suba gari semina sebengkah aja tang diatu mayuh bengkah fesyen gari lalu ke mayuh agi di bai ari menua ribai. Kitai ngarapka sida landik milih bagi ke manah enggau enda,” ku iya.